టీ20 ప్రపంచకప్ ఫైనల్‌లో,,,,ప్రపంచకప్ చరిత్రలో అభిషేక్ శర్మ ఫాస్టెస్ట్ హాఫ్ సెంచరీ నమోదు

టీ20 ప్రపంచకప్ 2026 ఫైనల్‌లో టీమిండియా ఓపెనింగ్ బ్యాటర్ అబిషేక్ శర్మ.. అదిరే ఆటతీరుతో అదరగొట్టాడు. ఎన్నో అంచనాలతో ఈ టోర్నీలో బరిలోకి దిగిన అతడు.. ఇప్పటివరకు చెప్పుకోదగ్గ బ్యాటింగ్ చేయలేదు. దీంతో అతడిని తుది జట్టు నుంచి తప్పించాలనే డిమాండ్‌లు వినిపించాయి. కానీ మేనేజ్‌మెంట్ మాత్రం అతడిపై నమ్మకం ఉంచింది. న్యూజిలాండ్‌తో ఫైనల్‌లో బరిలోకి దించింది. జట్టు నమ్మకాన్ని నిలబెడుతూ.. అభిషేక్ షేక్ చేశాడు. కీలకమైన మ్యాచ్‌లో 18 బంతుల్లో హాఫ్ సెంచరీ చేశాడు.

ఎంతో ఒత్తిడితో క్రీజులోకి వచ్చిన అభిషేక్ శర్మ .. స్వేచ్ఛగా బ్యాటింగ్ చేశాడు. ఎడాపెడా ఫోర్లు, సిక్సర్లతో విరుచుకుపడ్డాడు. బౌలర్ ఎవరనేది చూడకుండా.. బంతిని బౌండరీకి తరలించడమే లక్ష్యంగా పని పెట్టుకున్నాడు. దీంతో టీమిండియా స్కోరు బోర్డు పరుగులు పెట్టింది. ఇదే సమయంలో సంజూ శాంసన్ కూడా.. జోరు పెంచడంతో న్యూజిలాండ్ బౌలర్లు తేలిపోయారు.

ధాటిగా బ్యాటింగ్ చేసిన అభిషేక్.. పవర్ ప్లే ముగిసేలోపే హాఫ్ సెంచరీ స్కోరు చేశాడు. 18 బంతుల్లో 50 మార్కు చేరుకున్నాడు. టీ20 ప్రపంచకప్ ఫైనల్ చరిత్రలో ఫాస్టెస్ట్ ఫిఫ్టీ కొట్టిన ప్లేయర్‌గా అభిషేక్ నిలిచాడు. ఇక పవర్ ప్లే ముగిసే సరికి భారత్.. 92/0తో నిలిచింది. అయితే హాఫ్ సెంచరీ పూర్తయిన కాసేపటికే అభిషేక్ శర్మ ఔట్ అయ్యాడు. ఇన్నింగ్స్ 8వ ఓవర్‌లో రచిన్ రవీంద్ర బౌలింగ్‌లో క్యాచ్ ఔట్ అయ్యాడు. ఈ ఇన్నింగ్స్‌లో అభిషేక్ మొత్తంగా 21 బంతుల్లో 52 రన్స్ చేసి ఔట్ అయ్యాడు.

ఈ ఇన్నింగ్స్‌లో భారత్.. 7.2 ఓవర్లలోనే 100 పరుగుల మార్కును చేరుకుంది. దీంతో టీ20 నాకౌట్ మ్యాచ్‌లలో ఫాస్టెస్ట్ సెంచరీ నమోదు చేసిన జట్టుగా కూడా భారత్ రికార్డు క్రియేట్ చేసింది. అంతేకాకుండా టీ20 ప్రపంచకప్‌లో అత్యధిక పవర్ ప్లే స్కోరు చేసిన జట్టుగా కూడా భారత్ నిలిచింది.

టీ20 ప్రపంచకప్‌లో పవర్ ప్లేలో అత్యధిక స్కోర్లు..

92/0 - భారత్ vs న్యూజిలాండ్, 2026

92/1 - వెస్టిండీస్ vs అప్ఘానిస్థాన్,2024

91/1 - నెదర్లాండ్స్ vs ఐర్లాండ్, 2014

89/3 - ఇంగ్లాండ్ vs సౌతాఫ్రికా, 2016

86/1 - భారత్ vs నమీబియా, 2026