"ఇదేమీ చారిటీ లీగ్ కాదు" ,,,,లిట్టన్ దాస్ షాకింగ్ కామెంట్స్

బంగ్లాదేశ్-పాకిస్తాన్ మధ్య జరిగిన రెండో వన్డేలో జరిగిన వివాదాస్పద రనౌట్‌పై బంగ్లాదేశ్ వికెట్ కీపర్ లిట్టన్ కుమార్ దాస్ స్పందించాడు. పాకిస్తాన్ బ్యాటర్ సల్మాన్ అలీ ఆఘాను రనౌట్ చేయడం పూర్తిగా క్రికెట్ నియమాల ప్రకారమే జరిగిందని దాస్ స్పష్టం చేశాడు. రెండో వన్డేలో భాగంగా పాకిస్తాన్ జట్టు బ్యాటింగ్ చేస్తున్న సమయంలో మ్యాచ్ 39వ ఓవర్‌లో ఈ ఇన్సిడెంట్ చోటుచేసుకుంది. అప్పటికే పాకిస్తాన్ జట్టు తరఫున ఆఘా, మొహమ్మద్ రిజ్వాన్ మంచి భాగస్వామ్యం నెలకొల్పి జట్టును ముందుకు తీసుకెళ్తున్నారు. ఆ ఓవర్ నాలుగో బంతిని రిజ్వాన్ బౌలర్ వైపు డ్రైవ్ చేశాడు. బంగ్లాదేశ్ కెప్టెన్ మెహదీ హసన్ మిరాజ్ తన ఫాలో-త్రూ సమయంలో బూట్‌తో బంతిని ఆపేందుకు ప్రయత్నించాడు. ఈ క్రమంలో నాన్-స్ట్రైకర్ ఎండ్ వద్ద ఉన్న ఆఘాను ఢీకొన్నాడు.

దాంతో బంతి వారి దగ్గరే ఆగిపోయింది. ఆ సమయంలో ఆఘా క్రీజ్ బయట ఉండడంతో బంతిని తీసుకుని మిరాజ్‌కు ఇవ్వడానికి వంగినట్లు కనిపించాడు. అయితే వెంటనే స్పందించిన మిరాజ్ బంతిని తీసుకుని నాన్-స్ట్రైకర్ ఎండ్ స్టంప్స్‌పై విసిరాడు. ఆ సమయంలో ఆఘా క్రీజ్‌లోకి చేరకపోవడంతో అతను ఔట్ అయ్యాడు. మిరాజ్ అప్పీల్ చేయడంతో ఫీల్డ్ అంపైర్ తన్వీర్ అహ్మద్ నిర్ణయాన్ని థర్డ్ అంపైర్‌కు పంపాడు. టీవీ అంపైర్ పరిశీలించిన తర్వాత బంతి ఇంకా ఆటలోనే ఉందని, బ్యాటర్ క్రీజ్‌లో బ్యాట్ పెట్టలేదని నిర్ధారించి ఆఘాను రనౌట్‌గా ప్రకటించాడు.

ఆఘా అప్పటికే 62 బంతుల్లో 64 పరుగులు చేసి మంచి ఇన్నింగ్స్ ఆడుతున్నాడు. ఔట్ అయిన తర్వాత అతను అసంతృప్తి వ్యక్తం చేస్తూ మిరాజ్‌తో మాటల యుద్ధానికి దిగాడు. ఆ సమయంలో లిట్టన్ దాస్ కూడా ఆ వాదనలో చేరడంతో కొద్దిసేపు ఉద్రిక్త పరిస్థితి ఏర్పడింది. అయితే రిజ్వాన్ మధ్యలో వచ్చి పరిస్థితిని శాంతింపజేశాడు.

మ్యాచ్ అనంతరం మాట్లాడిన లిట్టన్ దాస్ ఈ ఘటనపై తన అభిప్రాయం వెల్లడించాడు. “మొదటగా చెప్పాలంటే, ఇక్కడ ఎవరూ చారిటీ లీగ్ ఆడేందుకు రాలేదు. ఇది ఒక అంతర్జాతీయ మ్యాచ్” అని అక్కడి మీడియా పేర్కొంది. మ్యాచ్ సమయంలో వ్యాఖ్యాతగా ఉన్న పాకిస్తాన్ మాజీ కెప్టెన్ రమీజ్ రజా మాత్రం ఈ ఘటనపై విమర్శలు చేశారు. “నియమాల ప్రకారం ఇది ఔట్ అయినప్పటికీ స్పోర్ట్స్‌మన్ స్పిరిట్ దెబ్బతింది. బ్యాటర్ బౌలర్‌కు సహాయం చేయడానికి వెళ్లాడు. అతను ఇలా రనౌట్ అవుతాడని ఊహించలేదు” అని రాజా వ్యాఖ్యానించాడు.

అయితే లిట్టన్ దాస్ ఈ అభిప్రాయాన్ని ఖండించాడు. “నియమాల ప్రకారం ఔట్ అయితే స్పోర్ట్స్‌మన్ స్పిరిట్ దెబ్బతిందని నేను అనుకోను. ప్రతి ఒక్కరికీ వారి అభిప్రాయం ఉంటుంది. కానీ ఆటగాళ్లుగా మేము భావించింది మాత్రం ఔట్ అంటే ఔట్‌నే” అని అతను స్పష్టం చేశాడు. మ్యాచ్ అనంతరం ప్రెస్ కాన్ఫరెన్స్‌లో మాట్లాడిన ఆఘా కూడా ఈ ఘటనపై స్పందించాడు. “స్పోర్ట్స్‌మన్ స్పిరిట్ ఉండాలి అని నేను భావిస్తున్నాను. అతను చేసినది నియమాల ప్రకారం సరైనదే. కానీ నేను ఆ పరిస్థితిలో ఉంటే వేరేలా వ్యవహరించేవాడిని” అని ఆఘా చెప్పాడు.