నర్సింగ్ విద్యార్థిని అదృశ్యం కేసులో....ఎన్ఐఏ సోదాలు

తెలుగు రాష్ట్రాల్లో ఎన్ఐఏ సోదాలు అలజడి రేపుతున్నాయి. విశాఖపట్నంకు చెందిన నర్సింగ్ విద్యార్థిని రాధ అదృశ్యం కేసులో జాతీయ దర్యాప్తు సంస్థ (ఎన్ఐఏ) అధికారులు సోమవారం ఏకకాలంలో సోదాలు నిర్వహించారు. రెండు తెలుగు రాష్ట్రాల్లోని మూడు జిల్లాల్లో ఎన్ఐఏ అధికారులు సోదాలు చేపట్టారు. 2017లో విశాఖకు చెందిన నర్సింగ్ విద్యార్థిని అదృశ్యం కేసులో కృష్ణా జిల్లా, తెలంగాణలోని హైదరాబాద్, హనుమకొండల్లో ఏక కాలంలో ఎన్‌ఐఏ అధికారులు సోదాలు చేశారు.

మావోయిస్టులతో సంబంధాలు ఉన్నాయన్న ఆరోపణలతో హైదరాబాద్‌లోని చైతన్య మహిళా సంఘం రాష్ట్ర కన్వీనర్ జ్యోతి ఇంట్లో 5 గంటల పాటు సోదాలు నిర్వహించి.. పుస్తకాలు, జ్యోతికి సంబంధించిన డైరీలను స్వాధీనం చేసుకున్నారు. కృష్ణా జిల్లాలోని సంఘం కో-కన్వీనర్ రాధ, హన్మకొండలో ఉంటున్న మరో సభ్యురాలు ఇళ్లలోనూ అధికారులు సోదాలు నిర్వహించి డైరీలు, పుస్తకాలు స్వాధీనం చేసుకున్నారు.

తమ కుమార్తె రాధను నర్సింగ్‌ చదివిస్తామని చెప్పి తీసుకెళ్లారని 2017 డిసెంబర్‌లో విశాఖలోని పెదబయలు పీఎస్‌లో రాధ తల్లి పోలీసులకు ఫిర్యాదు చేశారు. మావోయిస్టు అనుబంధ సంస్థ చైతన్య మహిళా సంఘం (సీఎంఎస్) నాయకులు రాధను కిడ్నాప్ చేసి బలవంతంగా మావోయిస్టు పార్టీలో చేర్చుకున్నారని రాధ తల్లి ఫిర్యాదులో పేర్కొన్నారు. సీఎంఎస్ నాయకులు దేవేంద్ర, స్వప్న, హైకోర్టు న్యాయవాది శిల్ప, తదితరులు తమ నివాసానికి వచ్చేవారని ఫిర్యాదులో తెలిపారు. వైద్యం పేరుతో దేవేంద్ర రాధను తీసుకెళ్లినట్లు ఫిర్యాదులో తెలిపారు. ఈ క్రమంలో విచారణ ప్రారంభించిన ఎన్‌ఐఏ అధికారులు.. గతంలోనే శిల్ప, దేవేంద్ర, స్పప్న, నరేందర్‌ నివాసాల్లో ఎన్‌ఐఏ సోదాలు జరిపింది. ఇదే కేసులో ఎన్‌ఐఏ అధికారులు మరోసారి సోదాలు జరుపుతున్నారు.