ఎన్నికల ముందు తొందరపడి హామీ ఇచ్చాం: మంత్రి బొత్స సత్యనారాయణ

ఎన్నికల ముందు సీపీఎస్‌ రద్దుపై తాము తొందరపడి హమీ ఇచ్చామని మంత్రి బొత్స సత్యనారాయణ వెల్లడించారు. మేనిఫెస్టోలో పేర్కొన్న 95 శాతం హామీలు నెరవేర్చామని చెప్పినట్లు పేర్కొన్నారు. నెరవేర్చని 5 శాతం హామీల్లో సీపీఎస్‌ రద్దు కూడా ఉందని చెప్పామన్నారు. ఇంకా ఉద్యోగులు ఆందోళన కొనసాగిస్తే తామేం చేస్తామని ప్రశ్నించారు. తమపై ఉన్న కేసులు ఎత్తివేయాలని ఉద్యోగులు కోరారని.. తీవ్రమైన కేసులు పెట్టిన వాటిపై గురువారం ముఖ్యమంత్రి వైఎస్ జగన్మోహన్ రెడ్డి దగ్గరకు తీసుకెళ్లి చర్చిస్తామని చెప్పారు. ఉద్యోగులపై పెట్టిన కఠిన కేసుల ఎత్తివేతపై సానుకూల నిర్ణయం తీసుకుంటామని ఉద్యోగులతో చెప్పామని మంత్రి బొత్స వివరించారు.

రాష్ట్ర ప్రభుత్వ ఉద్యోగుల కోసం కాంట్రిబ్యూటరీ పెన్షన్ స్కీమ్ (సీపీఎస్‌) కంటే మెరుగైన స్కీమ్‌ తీసుకురావాలని జీపీఎస్‌ విధానాన్ని తీసుకొచ్చామని రాష్ట్ర విద్యా శాఖ మంత్రి బొత్స సత్యనారాయణ తెలిపారు. జీపీఎస్‌లోనూ మరిన్ని సదుపాయాలు పెంచుతున్నట్లు ఉద్యోగులతో చెప్పినట్లు వెల్లడించారు. సీపీఎస్‌పై ఏర్పాటైన మంత్రుల కమిటీ బుధవారం ఉద్యోగ సంఘాల నేతలతో చర్చలు జరిపింది.

మంత్రులు బొత్స సత్యనారాయణ, బుగ్గన రాజేంద్రనాథ్‌రెడ్డి, ఆదిమూలపు సురేష్, పలు ఉద్యోగ సంఘాల నేతలు ఈ సమావేశంలో పాల్గొన్నారు. అయితే, ఈ సమావేశానికి ఏపీ జేఏసీ అమరావతి, ఏపీ సీపీఎస్‌ యూఎస్‌, ఏపీ సీపీఎస్‌ ఈఏ సంఘాలు సమావేశానికి దూరంగా ఉన్నాయి.

ఈ సమావేశం ముగిసిన అనంతరం మంత్రి బొత్స సత్యనారాయణ మీడియాతో మాట్లాడుతూ.. ఉద్యోగి రిటైర్‌ అయ్యాక కనీసం రూ. 10 వేలు పింఛన్ ఉండేలా చర్యలు తీసుకుంటామని చెప్పామన్నారు. ఉద్యోగి, వారి భాగస్వామికి ప్రమాద బీమా, హెల్త్‌ కార్డు సదుపాయాలు కల్పిస్తామని.. ఉద్యోగి చనిపోయినా స్పౌజ్‌కు పింఛను సదుపాయం ఇస్తామని ఉద్యోగులతో చెప్పినట్లు తెలిపారు. అయితే, జీపీఎస్‌ను అంగీకరించేది లేదని ఉద్యోగ సంఘాలు చెప్పాయన్నారు. ఉద్యోగ సంఘాలతో మరోసారి చర్చిస్తామని.. సవరించిన జీపీఎస్‌పై సీఎం వైఎస్ జగన్మోహన్ రెడ్డితో చర్చించి తుది నిర్ణయం ప్రకటిస్తామన్నారు. జీపీఎస్‌కు చట్టబద్ధత కల్పిస్తామని వెల్లడించారు.