స్నేహం కోసం...పుతిన్ కు మద్దతుగా కిమ్

ఉక్రెయిన్ పై యుద్దం చేస్తున్న వ్లాదిమిర్ పుతిన్ కు మద్దతుగా ఉత్తర కొరియా అధినేత కిమ్ రంగంలోకి దిగబోతున్నారు అన్న ప్రచారం ఊపందుకొంది. ఇదిలావుంటే ఎన్ని నెలలు గడుస్తున్నా ఉక్రెయిన్‌-రష్యా యుద్ధం ఒక కొలిక్కి రావడం లేదు. రష్యా ఎన్ని దాడులు చేస్తున్నా.. ఉక్రెయిన్ అంతే ధీటుగా ఎదుర్కొంటుంది. ఉక్రెయిన్ సైనికులు.. రష్యా బలగాలతో తీవ్రంగా పోరాడుతున్నారు. అయితే ఇరు దేశాలు ఏ మాత్రం వెనక్కి తగ్గడం లేదు. పోరుకు స్వస్తి చెప్పి.. చేతులు కలిపేందుకు సిద్ధపడడం లేదు. ఈ నేపథ్యంలో యుద్ధంలో ఓ కీలక పరిణామం చోటుచేసుకుంది. రష్యా అధ్యక్షుడు పుతిన్ నార్త్ కొరియా సాయం కోరారు.

యుద్ధంలో విజయ బావుటా ఎగురవేయాలనే కృతనిశ్చయంతో ఉన్న వ్లదిమిర్ పుతిన్.. తన మిత్రుడు నార్త్ కొరియా అధ్యక్షుడు కిమ్ జోంగ్ ఉన్ సాయం కోరారు. దీనికి నార్త్ కొరియా కూడా ఒప్పుకున్నట్టు తెలుస్తుంది. రష్యాపై ఇప్పటికే అనేక ఆంక్షలు ఉన్నాయి. పశ్చిమ దేశాలన్నీ రష్యాపై గుర్రుగా ఉన్నాయి. ఆర్థిక, వాణిజ్యం ఆంక్షలతో రష్యాను కట్టడి చేసేందుకు ప్రయత్నించాయి. దీంతో పుతిన్ ఉత్తర కొరియా బాట పట్టారు. అక్కడ నుంచే ఆయుధాలు దిగుమతి చేసుకుంటున్నారు. ఈ విషయాలను అమెరికా వార్తా సంస్థ న్యూయార్క్ టైమ్స్ తన నివేదికలో వెల్లడించింది.

ఆ నివేదిక ప్రకారం ఉత్తర కొరియా నుంచి రష్యా ఆర్టిలరీ షెల్స్, రాకెట్లు వంటి ఆయుధాలను దిగుమతి చేసుకున్నట్టు తెలుస్తుంది. అయితే ఎన్ని ఆయుధాలను రష్యా దిగుమతి చేసుకుందనే విషయాన్ని మాత్రం వెల్లడించలేదు. ఆంక్షలు కొనసాగినంత కాలం ఉత్తర కొరియా నుంచి రష్యా మరిన్ని ఆయుధాలు కొనుగోలు చేస్తుందని నివేదికలో తెలియజేశారు. నిజానికి రష్యా సైనికులు యుద్ధంలో ఇరాన్ తయారు చేసిన డ్రోన్లు ఉపయోగిస్తున్నారు. కానీ అవి సరిగ్గా పనిచేయకపోవడంతో ఇబ్బందులు ఎదుర్కొంటున్నారు. ఈ క్రమంలో ఉత్తర కొరియా నుంచి ఆయుధాలు తీసుకుంటుంది. భవిష్యత్తులో కూడా మరిన్ని ఆయుధాలను తీసుకునే అవకాశం ఉందని అమెరికా నిఘా వర్గాలు పేర్కొన్నాయి.

ఉక్రెయిన్‌తో హోరా హోరీగా సాగుతున్న యుద్ధంలో రష్యా చాలా నష్టపోయిందనే వార్తలు వస్తున్నాయి. రష్యా దగ్గర ఆయుధాల నిల్వ తరిగిపోయినట్టు తెలుస్తుంది. మొదట్లో ఉక్రెయిన్‌తో యుద్ధం మొదలైనప్పుడు.. కేవలం రెండు, మూడు రోజుల్లో ముగిసిపోతుందని అందరూ భావించారు. కానీ దానికి భిన్నంగా ఉక్రెయిన్.. నేటికీ రష్యాతో పోరాడుతూనే ఉంది. నిజానికి రష్యాతో పోల్చుకుంటే.. ఉక్రెయిన్ బలం, బలగం రెండూ తక్కువే.. కానీ ఏ మాత్రం వెనక్కి తగ్గడం లేదు. ఆ దేశ అధ్యక్షుడు జెలెన్ స్కీ ఎప్పటికప్పుడు తమ సైనికుల్లో ఆత్మ స్థైర్యాన్ని నింపుతున్నారు. ఆ దేశ ప్రజలు కూడా రష్యా చర్యని తీవ్రంగా వ్యతిరేకిస్తున్నారు.