రెబల్ స్టార్...దాదాపు అంత కూడబెట్టారటా

రెబల్ స్టార్ కృష్ణంరాజు సంపాధించిన ఆస్తులపై తాజాగా చర్చ సాగుతోంది. 1966లో సినిమాల్లోకి ఎంట్రీ రెబల్ స్టార్‌గా తెలుగు ప్రేక్షకుల హృదయాలపై చెరగని ముద్ర వేసిన ప్రముఖ నటుడు కృష్ణంరాజు ఆదివారం తెల్లవారుజామున తుదిశ్వాస విడిచారు. నటుడిగా, నిర్మాతగా, కేంద్ర మంత్రిగా ఆయన అనేక బాధ్యతలను నిర్వర్తించారు. కృష్ణంరాజుకు ముగ్గురు కుమార్తెలే కావడంతో.. తన తమ్ముడి కుమారుడైన ప్రభాస్‌ను తన కొడుకుగా భావించేవారు. ప్రభాస్‌ కెరీర్‌ను తీర్చిదిద్దడంలో ఆయనది కీలక పాత్ర. పశ్చిమ గోదావరి జిల్లా మొగల్తూరులో క్షత్రియ వంశంలో జన్మించిన కృష్ణంరాజుది సంపన్న కుటుంబం. ఆయనకు పెద్ద మొత్తంలో ఆస్తులు ఉన్నాయి.

2009 లోక్ సభ ఎన్నికల్లో రాజమండ్రి నుంచి ప్రజారాజ్యం పార్టీ అభ్యర్థిగా పోటీ చేసిన కృష్ణంరాజు.. ఎన్నికల అఫిడవిట్లో తన ఆస్తులు, అప్పుల వివరాలను పేర్కొన్నారు. మై నేత.ఇన్ఫో ప్రకారం చూస్తే 2009 నాటికి ఆయన కుటుంబ ఆస్తుల విలువ రూ.8.62 కోట్లు ఉండగా.. రూ.2.14 కోట్లకుపైగా అప్పులున్నాయి.

2009 నాటికి కృష్ణంరాజు వద్ద రూ.5.28 లక్షల విలువైన బ్యాంకు డిపాజిట్లు ఉన్నాయని ఉన్నాయి. ఆయన పేరిట దాదాపు రూ.20 లక్షల విలువైన బాండ్లు ఉండగా.. ఆయన భార్య, ముగ్గురు పిల్లల పేరిట ఉన్న బాండ్లు కూడా కలిపితే వాటి విలువ రూ.62 లక్షలు దాటింది. తన పేరిట 8 లక్షల విలువైన ఇన్నోవా కారు, రూ.5.80 లక్షల విలువైన స్విఫ్ట్ కారు ఉందని.. తన భార్య పేరిట వెర్నా, హ్యుందాయ్ ఐ10 కార్లు ఉన్నాయని కృష్ణంరాజు పేర్కొన్నారు.

బంగారం విషయానికి వస్తే.. కృష్ణంరాజు వద్ద 754 గ్రాముల బంగారం, ఆయన భార్య వద్ద 1690 గ్రాముల బంగారం, తన ముగ్గురు పిల్లల వద్ద వరసగా 547.24 గ్రాములు, 549.58 గ్రాములు, 569.24 గ్రాముల చొప్పు బంగారం ఉంది. 2009 నాటికి ఈ బంగారం విలువ రూ.43 లక్షలు. మొత్తం బంగారం 4 కిలోల పైమాటే కాగా.. ప్రస్తుత మార్కెట్ ప్రకారం ఈ బంగారం విలువ రూ.1.8 కోట్లకు పైమాటే. 2009 నాటికి కృష్ణంరాజు కుటుంబం వద్దనున్న మొత్తం చరాస్తుల విలువ రూ.1.39 కోట్లు అని మై నేత.ఇన్ఫో వెల్లడించింది.

ఇక స్థిరాస్తుల విషయానికి వస్తే.. మొగల్తూరులో కృష్ణంరాజు పేరిట 9.50 ఎకరాలు, 1.2 ఎకరాల చొప్పున వ్యవసాయ భూమి ఉంది. అక్కడికి సమీపంలోని రామన్నపాలెంలో 5 సెంట్ల వ్యవసాయేతర భూమి, అల్లాపూర్‌లో 860 చదరపు గజాల స్థలం ఉందని పేర్కొన్నారు. 2009 నాటికి ప్రభుత్వ లెక్కల ప్రకారం ఈ భూముల విలువ రూ.45 లక్షలు. కృష్ణంరాజు పేరిట మొగల్తూరులోని గాంధీ విగ్రహం సెంటర్లో ఓ షాపింగ్ కాంప్లెక్స్, 6 సెంట్ల స్థలం, మొగల్తూరులో 12 సెంట్ల స్థలంలో 1994 చదరపు అడుగుల విస్తీర్ణంలో ఓ ఇల్లు ఉన్నాయి. అప్పటి ప్రభుత్వ రికార్డుల ప్రకారం వీటి విలువ దాదాపు రూ.42 లక్షలు. 2009 నాటికి కృష్ణంరాజు పేరిట రూ.1.08 కోట్ల విలువైన స్థిరాస్తులున్నాయి.

కృష్ణంరాజు సతీమణి పేరిట పశ్చిమ గోదావరి జిల్లా ఉంగుటూరు మండలం చేబ్రోలులో 1.81 ఎకరాలు, 1.61, 0.34, 0.56 ఎకరాల విస్తీర్ణంలో వ్యవసాయ భూమి ఉంది. రామన్నపాలెంలో 1.5 ఎకరాలు, 0.30 ఎకరాలు, 0.30 ఎకరాల చొప్పున పొలం ఉంది. కోటవురట్ల సమీపంలో 6.46 ఎకరాలు, 4.07 ఎకరాల విస్తీర్ణంలో మామిడి తోట, విజయవాడ సమీపంలోని గన్నవరంలో 0.70 సెంట్ల భూమి ఉన్నాయి. హైదరాబాద్‌లోని కూకట్‌పల్లి అల్లాపూర్‌లో 823 గజాలు, 500 గజాల స్థలాలు, విశాఖ సమీపంలోని భీమునిపట్నంలో 1111.11 గజాల స్థలం ఉంది. జూబ్లీహిల్స్‌లో 491.5 చదరపు గజాల విస్తీర్ణంలో నిర్మించిన ఇల్లు, చెన్నైలోని సైదాపేటలో 3830 చదరపు అడుగుల విస్తీర్ణంలో కమర్షియల్ ప్రాపర్టీ ఉన్నాయి. వీటన్నింటి విలువ రూ.6.12 కోట్లు. ఆమె పేరిట రూ.2.14 కోట్లకుపైగా అప్పులు కూడా ఉన్నాయి. కృష్ణంరాజు ఇద్దరు కూతుళ్ల పేరు మీద శంషాబాద్ సమీపంలో 200 గజాలు చొప్పున స్థలం ఉంది. ఇవన్నీ కలిపితే కృష్ణంరాజు కుటుంబ ఆస్తులు రూ.7.23 కోట్లు కాగా.. అప్పులు రూ.2.14 కోట్లుగా ఉన్నాయి. ప్రస్తుత మార్కెట్ ధరల ప్రకారం వీటి విలువ ఎక్కువగా ఉండే అవకాశం ఉంది. కృష్ణంరాజు కుటుంబానికి రూ.300 కోట్లకుపైగా విలువైన ఆస్తులున్నాయని ప్రచారం జరుగుతోంది.