ఆ ప్రమాదాలు జరగకుండా ప్రత్యేక చర్యలు.. టీటీడీ ఈవో ధర్మారెడ్డి

తిరుమలలో ప్రత్యేక ఉత్సవాల సందర్బంగా ఎలాంటి ప్రాణ నష్టం జరగకుండా అన్ని రకాల చర్యలు తీసుకోనున్నట్లు టీటీడీ ఈవో ధర్మారెడ్డి తెలిపారు.  తిరుమ‌ల‌లో విపత్తుల నివారణకు ఒక ప్రత్యేక కార్యచరణ ప్రణాళిక రూపొందించాల‌ని నేషనల్ డిజాస్టర్ మేనేజ్‌మెంట్ అథారిటీ అధికారుల‌ను టీటీడీ ఈవో ధర్మారెడ్డి కోరారు. తిరుమల అన్నమయ్య భవనంలో తిరుపతి జిల్లా, టీటీడీకి సంబంధించిన విపత్తుల నివారణ అనే అంశంపై సమీక్ష సమావేశం జ‌రిగింది. ఈ స‌మావేశంలో ఢిల్లీకి చెందిన ఎన్‌డిఎంఏ జాయింట్ సెక్రెటరీ శ్రీ కునాల్ సత్య‌ర్థి వర్చువల్ విధానంలో పాల్గొన్నారు.

పవిత్ర పుణ్యక్షేత్ర‌మైన తిరుమ‌ల‌కు ప్రతి రోజు 80 వేల మంది, ప్ర‌త్యేక‌ పర్వదినాల్లో లక్షల‌మంది భ‌క్తులు వస్తుంటార‌ని తెలిపారు. యాత్రికుల రద్దీని క్రమబద్ధీకరించడానికి ప‌టిష్ట‌మైన భద్రతా వ్యవస్థను కలిగి ఉన్నామ‌న్నారు. కానీ తొక్కిస‌లాట‌, రోడ్డు ప్ర‌మాదాలు జ‌రిగిన‌ప్పుడు అధిక నష్టాన్ని నివారించడానికి, ప్రకృతి నుంచి ఎదురయ్యే సవాళ్లను సాధ్యమైనంత వరకు ఎదుర్కోవడానికి ప్ర‌ణాళిక‌లు రూపొందించాల‌న్నారు. తిరుమలలో 7,500 వసతి గదులు, అనేక వాణిజ్య సముదాయాలు ఉన్నాయని ఎలక్ట్రిక్ షార్ట్ సర్క్యూట్‌ జరిగినప్పుడు తీసుకోవాల్సిన ముందస్తు జాగ్రత్తలను రూపొందించాలన్నారు.

శ్రీ‌వారి ల‌డ్డూ ప్ర‌సాదాలు, అన్న‌ప్ర‌సాదాల త‌యారీకి గ్యాస్ వినియోగించే చోట ప్ర‌మాదాలను అరికట్టేందుకు చేప‌ట్ట‌వ‌ల‌సిన చ‌ర్య‌లు తెల‌పాల‌న్నారు ఈవో. అక‌స్మాత్తుగా సంభ‌వించే భారీ వ‌ర్షాలు, పిడుగుల వ‌ల‌న కొండ చ‌రియ‌లు విరిగిప‌డ‌టం ద్వారా వాహ‌నాల రాక‌పోక‌ల‌కు ఇబ్బందులు క‌లుగుతుంద‌న్నారు. వేస‌వి కాలంలో శేషాచ‌ల అడ‌వుల‌లో సంభ‌వించే అగ్ని ప్ర‌మాదాలు, వ‌డ‌గాలుల గురించి ఆయ‌న‌ వివ‌రించారు. ఇందుకు సంబంధించిన ఇబ్బందుల‌ను అధిగ‌మించ‌డానికి ఎన్‌డిఎంఏ ఆధ్వ‌ర్యంలో ఎస్ఓపి (స్టాండ‌ర్డ్ అప్‌రేటింగ్ సిస్ట‌మ్‌) ను ఏర్పాటు చేయాల‌ని ఈవో కోరారు. ఇందుకు స్పందించిన ఎస్‌డిఎంఏ జాయింట్ సెక్రెటరీ టీటీడీకి సంబంధించిన అంశ‌ల‌పై నేషనల్ డిజాస్టర్ మేనేజ్‌మెంట్‌ రంగంలో నిపుణులైన వారితో ఒక క‌మిటీ ఏర్పాటు చేసి తిరుమలకు పంపుతామన్నారు. దీనిపై ఒక వర్క్ షాప్ ఏర్పాటు చేసేందుకు చర్యలు తీసుకుంటామని, సిబ్బందికి శిక్షణ ఇస్తామని తెలిపారు.