వెడ్డింగ్ ఫొటో షూట్ లో...సామాజిక అంశం

ఈ రోజుల్లో వెడ్డింగ్ ఫొటో షూట్ అంటే బెండ్ రూం విషయాలు నేరుగా బయటి ప్రపంచానికి తెలియజేస్తున్నారు అన్న విమర్శ ఉంది. కానీ కేరళలోని ఓ జంట తమ వెడ్డింగ్ ఫొటో షూట్ లో సామాజిక బాధ్యతను గుర్తుచేశారు. ఇటీవలి కాలంలో పెళ్లి ఫొటోలు, వీడియోలు కొత్త పుంతలు తొక్కుతున్నాయి. ప్రీ వెడ్డింగ్ ఫొటో షూట్లు అయితే ఒక్కోసారి తీవ్రంగా కలకలం రేపుతున్నాయి. ఎక్కడెక్కడికో వెళుతూ.. చిత్రమైన పద్ధతుల్లో షూటింగ్ లు చేస్తూండటం ఆకట్టుకుంటోంది. అయితే కేరళకు చెందిన ఓ యువతి, ఆమె పెళ్లికి ఫొటోలు, వీడియోల కాంట్రాక్టు తీసుకున్న యారో వెడ్డింగ్ కంపెనీ వాళ్లు కలిసి చిత్రమైన ఆలోచన చేశారు. వెడ్డింగ్ ఫొటో షూట్ కార్యక్రమాన్ని సామాజిక సమస్య అంశానికి జత చేశారు.

కేరళలో నిండా గుంతలు, బురదతో నిండిన ఓ రోడ్డులో పెళ్లి కూతురుతో ఫొటో షూట్ చేశారు. ఎరుపు రంగు చీర కట్టుకుని, ఒంటి నిండా నగలు వేసుకుని.. అందంగా తయారైన పెళ్లి కూతురు ఆ బురద, గుంతల మధ్య నుంచి నడుచుకుంటూ వస్తుండగా ఫొటోలు, వీడియోలు తీశారు. ఆ సమయంలో పలు వాహనాలు కూడా ఆ దారిలో ప్రయాణిస్తున్నాయి. గుంతల నుంచి తప్పించుకుంటూ, పడిపోకుండా ఉండేలా మెల్లగా వాహనాలు నడుపుకొంటూ వెళ్లడం కనిపిస్తోంది. తమ ప్రాంతంలో రోడ్లు సరిగా లేని పరిస్థితి, చిన్న వర్షానికే అంతా బురదగా మారుతున్న దుస్థితిని చూపించడం కోసం తాము ఈ పనిచేసినట్టు పెళ్లి కూతురు, వెడ్డింగ్ ఫొటోగ్రాఫర్లు చెబుతున్నారు. ఇన్ స్టాగ్రామ్ లో, యూట్యూబ్ లో దీనికి సంబంధించిన వీడియో వైరల్ గా మారింది. ఇన్ స్టా గ్రామ్ లో ఏకంగా 43 లక్షల వ్యూస్ రాగా.. మూడు లక్షలకు పైగా లైకులు వచ్చాయి. ‘అది రోడ్డులా లేదు.. స్విమ్మింగ్ పూల్స్ తో కూడిన ఏరియాలా ఉంది..’ అని కొందరు కామెంట్ చేస్తుంటే.. ‘నీటి గుంతలు బాగున్నాయి. హాయిగా కొన్ని చేపలు తెచ్చి పెంచుకోవచ్చు..’ అంటున్నారు.