ఆ ప్రమాదం...హెల్మెంట్ ప్రాముఖ్యతను తెలియజేసింది

కొన్ని కొన్ని ఘటనలు, ప్రమాదాలు  మనకు తెలియకుండానే గొప్ప సందేశాన్ని ఇస్తుంటాయి. యాక్సిడెంట్స్ నేడు తరచుగా వినిపించే పేరు. ఏటా ఎంతో మంది తమ విలువైన ప్రాణాలను యాక్సిడెంట్ల మూలాన కోల్పోతున్నారు. పోలీసులు యాక్సిడెంట్ల నివారణ కోసం ఎన్ని చర్యలు తీసుకున్నా.. అవి అంతగా ఫలించడం లేదు. హెల్మెట్ ధరించమని పోలీసులు ఎంత చెప్పినా.. కొంతమంది మాత్రం ఆ మాటలను చెవికి ఎక్కించుకోవడం లేదు. అదే హెల్మెట్ ధరించడం వలన ఎప్పుడైనా అనుకోని ప్రమాదాలు జరిగితే వాటి నుంచి.. విలువైన ప్రాణాలకు ఎటువంటి అపాయం కలగకుండా ఉంటుందని పోలీసులు చెబుతున్నారు. ఎప్పటికప్పుడు పోలీసులు బైకర్లను హెల్మెట్ వాడమని అప్రమత్తం చేస్తూనే ఉన్నారు. కానీ కొంతమంది బైకర్లు మాత్రం హెల్మెట్ వాడకం విస్మరిస్తున్నారు. అందుకు తగిన మూల్యం చెల్లించుకుంటున్నారు. ఒకరిని చూసైనా మరొకరు మారడం లేదు. వారు కూడా హెల్మెట్ ధరించకుండా అజాగ్రత్తగా వెళ్తున్నారు. తమ విలువైన ప్రాణాలను రిస్క్‌లో పెడుతున్నారు.

ఢిల్లీ పోలీసులు అధికారిక ట్విటర్ ఖాతాలో పోస్ట్ చేసిన వీడియో ఒకటి వైరల్‌గా మారింది. ఈ వీడియో చూస్తే వెన్నులో వణుకుపుట్టడం ఖాయం. ఈ వీడియోలో ఉన్న బైకర్ హెల్మెట్ పెట్టుకోవడం వల్ల ప్రాణాలతో బయటపడ్డాడు. ఇది క్రేజీ వైరల్‌గా మారింది. ఇది చూసిన అనేక మంది హమ్మయ్యా... అంటూ కామెంట్లు చేస్తున్నారు.

ఓ యువకుడు బైక్ మీద ర్యాష్ డ్రైవింగ్ చేసుకుంటూ వెళ్తున్నాడు. రోడ్డుపై ఓ కారు లైఫ్ట్ టర్న్ తీసుకోబోతూ.. ఆగింది. ఆ యువకుడు.. కారు అలా వస్తుందని ముందుగా ఊహించలేదు. అతి వేగం వల్ల కారు దగ్గరకు రాగానే సడెన్ బ్రేక్ వేశాడు. దాంతో బండి స్కిడ్ అయ్యింది. బండితో సహా రోడ్డుపై పడి దొర్లాడు. బండి.. రోడ్డు పక్కనే ఉన్న స్తంభాన్ని ఢీ కొట్టింది. అతడు హెల్మెట్ ధరించడం వల్ల అతని తలకు ఎలాంటి గాయాలు కాలేదు. అతను ప్రాణాలతో బతికి బయటపడ్డాడు. హమ్మయ్యా.. ఆ వ్యక్తి ప్రాణాలతో బతికి బయటపడ్డాడని అంతా ఊపిరి పీల్చుకునే లోపే మరో ప్రమాదం ముంచుకొచ్చింది. బైక్ ఢీ కొట్టిన పోల్ అతని మీద పడిపోయింది. అంత వెయిట్ ఉన్న పోల్ అతడి తల మీద అమాంతం పడే సరికి అతడు ప్రాణాలొదిలి ఉంటాడని అంతా అనుకున్నారు. కానీ అలా మాత్రం జరగలేదు. అతడి తలకు ఎటువంటి గాయాలు కాలేదు. కారణం అతడు హెల్మెట్ ధరించడం... అతడు కనుక హెల్మెట్ ధరించి ఉండకపోతే బైక్ మీది నుంచి పడినపుడు బతికి బట్టకట్టినా పోల్ తల మీద పడినపుడు అతడు కచ్చితంగా ప్రాణాలు కోల్పోయేవాడు. కానీ హెల్మెట్ ధరించడం వల్లే అతడు ప్రాణాలతో బతికాడు.

ఈ వైరల్ వీడియోని ఢిల్లీ పోలీసులు ట్విటర్‌లో పంచుకున్నారు. “హెల్మెట్ పెట్టుకున్న వారికి ఆ భగవంతుడు కూడా సాయం చేస్తాడు” అని వారు క్యాప్షన్ పెట్టారు. ఈ వీడియోని చూసిన నెటిజన్లు.. హెల్మెట్ ఎంత అవసరమో గుర్తిస్తున్నారు. అందరం హెల్మెట్ పెట్టుకుందామని చెప్పుకుంటున్నారు.