ఎంపీ మాగుంట శ్రీనివాసులురెడ్డి సోదరుడి కన్నుమూత

ఒంగోలు వైఎస్సార్‌సీపీ ఎంపీ మాగుంట శ్రీనివాసులురెడ్డి సోదరుడు సుధాకర్‌రెడ్డి అనారోగ్యంతో చెన్నైలో కన్నుమూశారు. సుధాకరరెడ్డి గత కొంతకాలంగా అనారోగ్యంతో బాధపడుతున్నారు. మళ్లీ ఆయన తీవ్ర అస్వస్థతకు గురికావటంతో అపోలో ఆసుపత్రికి తరలించారు.. అక్కడ చికిత్స పొందుతూ తుదిశ్వాస విడిచారు. ఆయనకు భార్య స్నేహలత, కుమారుడు కిరణ్‌రెడ్డి, కుమార్తె దీప్తి ఉన్నారు. సుధాకర్‌రెడ్డి శ్రీనివాసులు రెడ్డి చిన్న సోదరుడు.. మరో సోదరుడు మాజీ ఎంపీ సుబ్బరామిరెడ్డి.

తనకు, తన మరో సోదరుడు దివంగత సుబ్బరామిరెడ్డికి సుధాకరరెడ్డి తోడు నీడగా ఉండే వారని ఎంపీ మాగుంట ఎమోషనల్ అయ్యారు. తనకు నిత్యం తోడు నీడగా ఉన్న సుధాకరరెడ్డి ఇక లేరన్న సమాచారం జీర్ణించుకోలేకపోతున్నాను అన్నారు. అన్నయ్య సుబ్బరామిరెడ్డి దివంగతులైన తర్వాత కుటుంబానికి పెద్ద దిక్కుగా నిలిచారని.. మంచితనానికి సోదరుడు సుధాకర్‌ నిదర్శనమన్నారు. ఆయన మరణం తమ కుటుంబానికి తీరని లోటని ఆవేదన వ్యక్తం చేశారు. ఆయన అంత్యక్రియలు చెన్నైలో శనివారం జరగనున్నాయి.సుధాకర్ రెడ్డి మరణంపై వైఎస్సార్‌సీపీ నేతలు సంతాపాన్ని తెలియజేశారు.

1949 సెప్టెంబరు 9న జన్మించిన సుధాకరరెడ్డి సినీ నిర్మాతగా, మాగుంట వ్యాపార, రాజకీయ, ప్రజా సేవా కార్యకలాపాల్లో కీలక పాత్ర పోషించారు. సుధాకర్‌రెడ్డి కుటుంబ వ్యవహారాల్లో, వ్యాపార, రాజకీయ, ప్రజాసేవా కార్యక్రమాల్లోనూ ఎంతో కీలకంగా వ్యవహరించేవారు. సుబ్బరామిరెడ్డి మృతి తర్వాత ఆ కుటుంబానికి పెద్ద దిక్కుగా వ్యవహరించారు. సుధాకర్ రెడ్డి ప్రోత్సాహంతోనే 1991లో సుబ్బరామిరెడ్డి రాజకీయ ప్రవేశం చేశారు. సోదరుడి మరణం తర్వాత సుధాకర్‌రెడ్డి వివిధ సినిమాలకు నిర్మాతగా, డిస్ట్రిబ్యూటర్‌గా వ్యవహరించారు. చెన్నైలో పలు సినిమాహాళ్లు నిర్వహిస్తున్నారు.