మహిళా వర్సెస్ టీడీపీ ఎమ్మెల్యే...వీడియో వైరల్

రాజధాని అమరావతి అంశం రోజు రోజుకు వివాదాస్పదంగా మారుతోంది. ఈ క్రమంలో చోటు చేసుకొన్న ఓ పరిణామం సోషల్ మీడియాలో వైరల్ గా మారింది. నిమ్మల రామానాయుడు వీడియో ఒకటి సోషల్ మీడియాలో వైరల్ అవుతోంది. ఆయన ఓ మహిళ మొబైల్ లాగేశారు. బస్సులో ప్రయాణిస్తున్న ఆమె చేతిలో ఉన్న ఫోన్ తీసుకున్నారు. ఆ మహిళ ఎమ్మెల్యేపై తిరగబడ్డారు.. ఆయన చొక్కా పట్టుకుని వెనక్కు లాగారు. తన మొబైల్ తీసుకోవడంపై ఆగ్రహం వ్యక్తం చేశారు. అమరావతి రైతుల యాత్ర పేరున మహిళలు ప్రశ్నించారని.. మహిళలతో వాగ్వివాదానికి దిగి.. వారిలో వీడియో తీస్తున్న మహిళ ఫోన్ లాక్కుని దౌర్జన్యానికి దిగారని చెబుతున్నారు. ఈ వీడియో సోషల్ మీడియాలో చక్కర్లు కొడుతోంది.

మరోవైపు అమరావతి నుంచి అరసవెల్లికి మహా పాదయాత్ర చేపట్టిన రైతులకు అక్కడక్కడా నిరసన సెగలు తగులుతున్నాయి. ఉత్తరాంధ్రపై చేస్తున్న దండయాత్రంటూ అధికార వైసీపీ నేతలు ఇప్పటికే అక్కడక్కడా పోస్టర్లు, ఫెక్సీలు పెడుతున్నారు. రైతుల పాదయాత్రను తప్పుబడుతున్నారు. ఇదే సమయంలో ఉత్తరాంధ్ర ప్రజల వైపు నుంచి కూడా నిరసనలు తగిలే సూచనలు కనిపిస్తున్నాయి. పశ్చిమగోదావరి జిల్లా పాలకొల్లులోనూ అమరావతి రైతులకు నిరసనలు ఎదురయ్యాయి. పాదయాత్రను తప్పుబడుతూ వైసీపీ కార్యాలయం వద్ద ఆ పార్టీ నేతలు నల్లబెలూన్లు ఎగురవేశారు. గోబ్యాక్ అంటూ ప్లకార్డులు ప్రదర్శించారు. ఒక రాజధాని వద్దు మూడు రాజధానులు ముద్దు అంటూ నినాదాలు చేశారు.

ఆచంట నియోజకవర్గంలోనూ పాదయాత్రకు నిరసనలు ఎదురయ్యాయి. పోడూరు మండలం కవిటం గ్రామం మీదుగా పాదయాత్ర సాగుతున్న సమయంలో అక్కడి స్థానికుల్లో కొందరు యాత్రను తప్పుబట్టారు. పాదయాత్ర సందర్భంగా ట్రాఫిక్ జామ్ ఏర్పడింది. దీంతో వాహనాలు నిలిచిపోయాయి. ఇదే సమయంలో అక్కడే ఆర్టీసీ బస్సులో ఉన్న ప్రయాణికుడు.. అమరావతి రైతులకు ప్రశ్నలు సంధించాడు. గతంలో అన్యాయం జరిగిందనీ.. మళ్లీ తమకు అన్యాయం చేయవద్దంటూ అమరావతి రైతులను కోరాడు. సీఎం జగన్ మూడు రాజధానుల నిర్ణయం సరైందని అనటంతో.. ప్రయాణికుడు, అమరావతి రైతుల మధ్య కొద్దిసేపు వాగ్వాదం నడిచింది.