టీడీపీలోకి వచ్చాకే నేను..వై.ఎస్.శత్రువులయ్యాం: చంద్రబాబు

తాను టీడీపీలోకి వెళ్లాకే తాను, వైఎస్సార్ రాజకీయంగా శత్రువులయ్యాం అని టీడీపీ అధినేత నారా చంద్రబాబు నాయుడు వెల్లడించారు. ఈ శత్రుత్వం రాజకీయాలకే పరిమితమని ఆయన వెల్లడించారు.  దివంగత ముఖ్యమంత్రి రాజశేఖర్ రెడ్డితో ఉన్న స్నేహం, ఆ తర్వాత కాంగ్రెస్ పార్టీలో కలిసి పనిచేసిన రోజుల్ని చంద్రబాబు గుర్తు చేసుకున్నారు. నందమూరి బాలయ్య అన్‌ఋస్టాపబుల్-2 షోలో ఆసక్తికర విషయాలను చెప్పుకొచ్చారు. తన జీవితంలో ఫ్రెండ్స్ మారుతూ వచ్చారని.. చిన్నప్పుడు స్కూల్లో మంచి ఫ్రెండ్ ఉండేవాళ్లని.. ఆ తర్వాత యూనివర్శిటీలో చాలామంది స్నేహితులు ఉన్నారన్నారు. చాలామంది ఇప్పటికీ తనతో టచ్‌లో ఉంటారని.. ముఖ్యంగా వైఎస్ రాజశేఖర్ రెడ్డి, తాను బాగా కలిసి తిరిగేవాళ్లమని పాత రోజుల్ని గుర్తు చేసుకున్నారు.

1978, 1983 ఎమ్మెల్యేలుగా, మంత్రులుగా చాలా బాగా తిరిగామని.. ఢిల్లీ వెళ్లడం, అక్కడ ఫైట్ చేసేవాళ్లమని చంద్రబాబు చెప్పారు. 1983లో తాను టీడీపీలోకి వెళ్లాక.. ఇద్దరం శత్రువులం అయ్యాం.. అది కూడా రాజకీయంగా మాత్రమే అన్నారు. ఆ రోజు ఎమ్మెల్యేలుగా, మంత్రులు ఉండి ముఖ్యమంత్రులను దించేశామని.. కొంతమందిని లాబీయింగ్ చేసి ముఖ్యమంత్రిని చేయగలిగామని.. ఆ రోజు ఉండే రాజకీయ పరిస్థితులతో అలా చేయాల్సి వచ్చిందన్నారు. ఒక్కోసారి స్నేహం చాలా బాగా ఉపయోగపడుతోందని.. ఒక్కోసారి కొన్ని కొన్ని పరిస్థితుల వల్ల విభేదిస్తుంటామని.. రాజకీయ విభేదం తప్ప వ్యక్తిగతంగా ఎప్పుడూ వెళ్లలేదన్నారు.

తనకు ఎవరైనా చెప్పింది చేయకపోయినా, బద్దకంగా ఉంటే కోపం వస్తుందన్నారు టీడీపీ బాస్. ఏదైనా చెబితే చేయకుండా వాయిదా వేస్తే ఊరుకునేది లేదన్నారు. జీవితంలో టర్నింగ్ పాయింట్స్ వస్తుంటాయి.. తన జీవితంలో సెటిల్ అవ్వాలంటే రెండు మూడు ఆప్షన్లు వచ్చాయన్నారు. ఒకటి ఆ రోజుల్లో పరిస్థితుల్ని బట్టి ఆల్ ఇండియా సర్వీసెస్‌కు వెళ్లాలని.. తాను ఎడ్యుకేషన్‌లో అంత శ్రమ చేయలేను అందుకే అటు వైపు వెళ్లలేదన్నారు. రెండోది యూనివర్శిటీ వీసీ పిలిచి ఉద్యోగం ఇస్తా చేరమని అడిగారని.. వర్శిటీలో జాబ్ అంటే అన్నికంటే మంచిది.. కానీ తాను రాజకీయాల్లోకి రావాలని వద్దని రిజెక్ట్ చేశానన్నారు.

తాను ఎమ్మెల్యేగా పోటీ చేయాలనుకుంటున్నట్లు వీసీతో చెబితే ఆయన ఆశ్చర్యపోయినట్లు చంద్రబాబు వివరించారు. అసలు టికెట్ వస్తుందా, గెలుస్తావని నమ్మకం ఉందా అని అడిగారని.. తాను నమ్మకంతో గెలుస్తానని చెప్పానని గుర్తు చేసుకున్నారు. అక్కడి నుంచి సీటొచ్చిందని.. నాన్న దగ్గరకి వెళ్లాను డబ్బులు అడిగినట్లు చెప్పారు. మనకు రాజకీయాలు, ఎమ్మెల్యే ఎందుకని తండ్రి వద్దన్నారని.. ఎందుకు రిస్క్ వద్దని వారించారన్నారు. తాను మాత్రం పోటీ చేయాల్సిందే.. ఎమ్మెల్యేగా పోటీ చేస్తానని గట్టిగా చెప్పానన్నారు. ఆ రోజుల్లోనే తన తండ్రి రూ.లక్ష తెచ్చి ఇచ్చారని.. అదే సమయంలో విద్యార్థులు ప్రతి గ్రామానికి వెళ్లి కష్టపడి తనను గెలిపించారని, అది తన జీవితాన్ని మార్చిన సంఘటనగా చెప్పుకొచ్చారు.