వచ్చే ఎన్నికల్లో గెలుపే లక్ష్యంగా టీడీపీ సమీక్షలు

వచ్చే ఎన్నికల్లో గెలుపే లక్ష్యంగా టీడీపీ నాయకత్వం రాష్ట్రంలోని అన్ని నియోజకవర్గాలలో పార్టీ పరిస్థితిపై సమీక్షలు జరుపుతోంది. టీడీపీ అధినేత చంద్రబాబు నియోజకవర్గాల వారీగా ఈ సమీక్షలు నిర్వహిస్తున్న సంగతి తెలిసిందే. ఇప్పటి వరకు 111 నిజయోజకవర్గాల ఇంఛార్జ్‌లతో సమావేశం అయ్యారు. నియోజకవర్గాల్లో పార్టీ కార్యక్రమాలు, బాదుడే బాదుడు, సభ్యత్వ నమోదుతో పాటూ ఓటర్ వెరిఫికేషన్‌పై రివ్యూలు చేస్తున్నారు. స్థానిక ఇంఛార్జ్‌ల పనితీరుపై ఆరా తీస్తున్నారు.. సమర్థవంతంగా పనిచేస్తున్నవారిని అభినందిస్తున్న చంద్రబాబు.. కొంతమంది మాత్రం పనితీరు మార్చుకోవాలని తేల్చు చెబుతున్నారు. లేని పక్షంలో తాను ప్రత్యామ్నాయాలు చూసుకోవాల్సి వస్తుందని తేల్చి చెబుతున్నారు.

ఈ క్రమంలో గురువారం నాలుగు నియోజకవర్గాలపై సమీక్ష చేశారు చంద్రబాబు. కర్నూలు ఇంఛార్జ్ టీజీ భరత్, ఇచ్చాపురం ఇంఛార్జ్ బెందాళం అశోక్ సమీక్షలకు హాజరయ్యారు. అలాగే కుప్పం నియోజకవర్గ నేతలతో చంద్రబాబు సమావేశం అయ్యారు. అయితే సమీక్షల్లో మంగళగిరి నియోజకవర్గం కూడా ఉండటం విశేషం. మంగళగిరి నియోజకవర్గంపై ఇంఛార్జ్‌ హోదాలో నారా లోకేష్‌ తో కూడా చంద్రబాబు సమీక్ష జరిపారు. పార్టీ కార్యక్రమాలు, కమిటీల నియామకం, స్థానిక నేతల పనితీరు వంటి అంశాలపై తన వద్ద ఉన్న నివేదికల ఆధారంగా ఈ సమీక్ష కొనసాగింది.

ఈ ఫోటో సోషల్ మీడియాలో వైరల్ అవుతోంది. తెలుగు తమ్ముళ్లు చంద్రబాబును పొగడ్తలతో ముంచెత్తుతున్నారు. పార్టీ విషయంలో చంద్రబాబు కమిట్మెంట్ ఇదేనంటూ ‘ఇది మన పార్టీ సిద్దాంతం.. కన్న కొడుకైనా ఒకటే రూల్.. మంగళగిరి నియోజకవర్గ సమీక్ష సందర్భంగా వన్ టై వన్ మీటింగ్ లో నారా లోకేష్’అంటున్నారు. కొడుకైనా సరే ఒకే రూల్ అంటున్నారు.

తెలుగు దేశం పార్టీ ఆవిర్భావం తరువాత 1983,1985 ఎన్నికల్లో మంగళగిరిలో టీడీపీ గెలిచిందని.. 1989 నుంచి 2009 వరకు జరిగిన 5 ఎన్నికల్లో పొత్తుల్లో భాగంగా మిత్రపక్షాలకు టిక్కెట్లు ఇవ్వాల్సి వచ్చిందని చంద్రబాబు గుర్తు చేశారు. పొత్తుల్లో రెండు దశాబ్దాల పాటు మంగళగిరి సీటు వేరు పార్టీలకు ఇచ్చుకుంటూ వచ్చిన కారణంగా నియోజకవర్గంలో అప్పట్లో పార్టీ బలోపేతం కాలేదని చెప్పారు చంద్రబాబు. 2019 ఎన్నికల తరువాత పార్టీ యాక్టివిటీ పెంచడం, కార్యకర్తల సంక్షేమం చూడడం, ఇతర కార్యక్రమాల కారణంగా మంచి మార్పు కనిపిస్తుందని చంద్రబాబు అన్నారు. అయితే దీన్ని మరింత ముందుకు తీసుకువెళ్లాలని, తిరుగు లేని విజయంతో మంగళగిరిలో కొత్త చరిత్ర రాయాలని ఇంఛార్జ్ లోకేష్‌కు పార్టీ అధినేత సూచించారు.

తాను ఓడిపోయినా, టీడీపీ ప్రతిపక్షంలో ఉన్నా తరచూ నియోజకవర్గంలో పర్యటిస్తూ ప్రజలకు దగ్గరయ్యానన్నారు లోకేష్. పార్టీ తరఫున సాయంతో పాటు, తాను సొంతంగా 12కి పైగా సంక్షేమ కార్యక్రమాలు అందిస్తున్నట్లు వివరించారు. ప్రభుత్వం పట్ల ప్రజల్లో తీవ్ర వ్యతిరేకత ఉందని.. ప్రజల్ని చైతన్యం చేయడంతో పాటు వారికి అండగా నిలుస్తున్నామన్నారు. గెలుపు గ్యారంటీ అని అలసత్వం వహించకుండా.. సమిష్టిగా పనిచేసి ఎప్పుడు ఎన్నికలు వచ్చినా తిరుగులేని విజయం సాధించేలా ఉండాలని చంద్రబాబు సూచించారు.