వేగన్ ఆర్, సెలేరియా, ఇగ్నిస్ లలో సాంకేతిక సమస్య..వాహనాలు వెనక్కి
business | Suryaa Desk | Published : Sun, Oct 30, 2022, 12:55 PM
వేగన్ ఆర్, సెలేరియా, ఇగ్నిస్ వాహనాలను దాని తయారి సంస్థ వెనక్కి తీసుకొంటోంది. ప్రముఖ కార్ల తయారీ సంస్థ మారుతి సుజుకీ పేరొందిన మోడళ్లు వేగన్ ఆర్, సెలేరియా, ఇగ్నిస్ లో వెనుక చక్రాల బ్రేకింగ్ లో సమస్యలను గుర్తించినట్టు ప్రకటించింది. దీంతో ఈ ఏడాది ఆగస్ట్ 3 నుంచి సెప్టెంబర్ 1 మధ్య తయారు చేసిన ఈ మోడళ్లకు సంబంధించి 9,925 యూనిట్లను వెనక్కి పిలిపిస్తున్నట్టు ప్రకటన విడుదల చేసింది.
వెనుక బ్రేక్ ల పిన్ లో సాంకేతిక సమస్యలను గుర్తించినట్టు మారుతీ సుజుకీ తెలిపింది. కస్టమర్ల భద్రతను దృష్టిలో పెట్టుకుని వీటిని రీకాల్ చేస్తున్నట్టు పేర్కొంది. దెబ్బతిన్న లేదా లోపాలున్న విడిభాగాలను ఎటువంటి చార్జీ లేకుండా మార్చి తిరిగి కస్టమర్లకు వాహనాలను అందించనున్నట్టు వెల్లడించింది. ఆటోమొబైల్ తయారీ సంస్థలు వాహనాల్లో లోపాలను గుర్తించినప్పుడు ఇలా రీకాల్ చేయడం సాధారణంగా జరిగేదే.
|
|