నాటి ఘటన పట్ల మేము చాలా చింతిస్తున్నాం: నళిని

నాటి ఘటన పట్ల మేము చాలా చింతిస్తున్నామని నాటి రాజీవ్ గాంధీ హత్య ఘటను గుర్తుచేసుకొంటూ ఈ కేసులు ముద్దాయిగా జైలు జీవితం గడిపి ఇటీవల బయటకు వచ్చిన నళిన పేర్కొన్నారు. ఇదిలావుంటే మాజీ ప్రధాని రాజీవ్‌ గాంధీ హత్య కేసు లో నళిని శ్రీహరన్‌ సహా మొత్తం ఆరుగురు దోషులను విడుదల చేయాలని సుప్రీం కోర్టు వెలువరించిన విషయం తెలిసిందే. దీంతో నళిని, ఆమె భర్త శ్రీహరన్‌ అలియాస్‌ మురుగన్, సంథన్‌, రాబర్ట్ పాయస్, జయకుమార్‌లు శనివారం సాయంత్రం అధికారికంగా విడుదలయ్యారు. మరో వ్యక్తి ఆర్పీ రవిచంద్రన్ కూడా త్వరలో విడుదల కానున్నారు. ఇప్పటికే నళిని పెరోల్‌పై ఉన్నారు. దీంతో ఆమె తప్పనిసరి హాజరు కోసం శనివారం స్థానిక పోలీస్‌ స్టేషన్‌కు వెళ్లి అక్కడ నుంచి వెల్లూరులోని మహిళా ప్రత్యేక జైలుకు చేరుకున్నారు. లాంఛనాలన్నీ పూర్తయిన తర్వాత అక్కడినుంచి విడుదలయ్యారు.

తర్వాత వెల్లూరు సెంట్రల్‌ జైలుకు వెళ్లి విడుదలైన తన భర్త శ్రీహరన్, సంథన్‌లను కలుసుకున్నారు. ఈ సందర్భంగా నళిని మాట్లాడుతూ.. ఇది తనకు కొత్త జీవితమని తెలిపారు. అలాగే, గాంధీ కుటుంబంతో పాటు ఘటనలో ప్రాణాలు కోల్పోయిన వారికి కూడా నళిని క్షమాపణలు చెప్పారు. ‘‘నాటి ఘటన పట్ల మేము చాలా చింతిస్తున్నాం.. మేము దాని గురించి ఆలోచిస్తూ చాలా సంవత్సరాలు గడిపాం.. మమ్మల్ని క్షమించండి’’ అని నళిని శ్రీహరన్ వేడుకున్నారు. హత్యకు గురైన వారి కుటుంబాలకు మీరు ఏం చెప్పాలనుకుంటున్నారని ప్రశ్నించగా ఆమె పై విధంగా స్పందించారు.

‘‘వారు తమ ప్రియమైన వారిని కోల్పోయారు.. ఎప్పుడైనా ఆ విషాదం నుంచి బయటపడతారని నేను ఆశిస్తున్నాను’’ అని అన్నారు. రాజీవ్ గాంధీ కుటుంబాన్ని కలుస్తారా? అని అడిగితే.. ‘‘వారు నన్ను కలుస్తారని నేను అనుకోను.. ఆ సమయం గడిచిపోయిందని నేను అనుకుంటున్నాను’’ అని బదులిచ్చారు. ‘‘నా భర్త, కుమార్తెతో నాకిది కొత్త జీవితం.. అయితే, నేను ప్రజా జీవితంలోకి వెళ్లడం లేదు.. 30ఏళ్లకు పైగా మద్దతు ఇచ్చిన తమిళులతోపాటు కేంద్ర, రాష్ట్ర ప్రభుత్వాలకు ధన్యవాదాలు. నా కుమార్తెతోనూ మాట్లాడాను’ అని ఆమె చెప్పారు. నళిని చెన్నైలోనే ఉంటారా? లేదా లండన్‌లో ఉంటున్న కుమార్తె వద్దకు వెళ్తారా? అనేదానిపై ఆమె త్వరలోనే నిర్ణయం తీసుకుంటారని వారి తరఫు లాయర్ చెప్పారు. ఆమె భర్త భవితవ్యంపై రాష్ట్ర ప్రభుత్వమే నిర్ణయం తీసుకుంటుందన్నారు.