తన ఉద్యోగులను తీవ్ర నిరాశలోకి నెట్టిన ఇన్ఫోసిస్

తన సంస్థ ఉద్యోగులను ఇన్ఫోసిస్ నిరాశలోకి నెట్టింది. ఇన్ఫోసిస్ లో ఉద్యోగం అంటే అన్ని సౌకర్యాలతో కూడిన విలాసవంతమైన జీవితం అని ఎవరైనా అంటారు. కానీ ఆ సంస్థ తాజాగా నిర్ణయం ఉద్యోగులను తీవ్ర నిరాశలోకి నెట్టింది.  జులై- సెప్టెంబర్ త్రైమాసికానికి సంబంధించి.. ఉద్యోగులకు 65 శాతం వేరియబుల్ పే మాత్రమే చెల్లించనున్నట్లు దిగ్గజ ఐటీ కంపెనీ ఇన్ఫోసిస్ స్పష్టం చేసింది. నవంబర్ పేరోల్ సైకిల్.. అంటే నవంబర్‌ జీతాలతో పాటే వేరియబుల్ పే చెల్లించనున్నట్లు వెల్లడించింది. ఈ మేరకు ఇన్ఫోసిస్ ఉద్యోగులకు ఇంటర్నల్ మెయిల్‌లో తెలిపింది. అయితే.. ఊహించిన దాని కంటే తక్కువ వేరియబుల్ పే అంచనాల నడుమ.. ఉద్యోగులు నిరాశలో కూరుకుపోయారు. 2022-23 ఆర్థిక సంవత్సరానికి సంబంధించి.. యావరేజ్ పే ఔట్.. 65 శాతంగానే ఉన్నట్లు ఈ ఐటీ కంపెనీ పేర్కొంది. ఈ క్వార్టర్‌లో ఎక్కువగా పనిచేసినవారికి, వ్యక్తిగత పెర్ఫామెన్స్ ఆధారంగా చెల్లింపులు ఉంటాయని వివరించింది.

''2022-23 ఆర్థిక సంవత్సరం రెండో త్రైమాసికంలో ఆర్గనైజేషన్ లెవెల్‌లో యావరేజ్ పేఔట్ 65 శాతంగా ఉంది. వ్యక్తిగత పెర్ఫామెన్స్, ఆ క్వార్టర్‌లో కంపెనీకి వారు అందించిన సేవలు వంటివాటిని పరిగణనలోకి తీసుకొని.. ఎంత మేర వేరియబుల్ పే చెల్లించాలని కంపెనీ నిర్ణయిస్తుంది.'' అని ఇన్ఫోసిస్ బుధవారం ఉద్యోగులకు పంపిన మెయిల్‌లో తెలిపింది. యునైటెడ్ స్టేట్స్ ఆఫ్ అమెరికా, కెనడాల్లో ఉద్యోగులకు కూడా నవంబర్ పేరోల్‌లో చెల్లిస్తామని వివరించింది. ఉద్యోగులకు ఒక్కొక్కరికి వ్యక్తిగతంగా ఎంత మేర వేరియబుల్ పే ఉంటుందో అనేది నవంబర్ 17న డిజిటల్ కమ్యూనికేషన్ ద్వారా ఉద్యోగులకు తెలియజేయనుంది. అయితే.. దీనిపై ఇన్ఫోసిస్ ఇప్పటివరకు అధికారిక ప్రకటన చేయలేదు.

జులై- సెప్టెంబర్ త్రైమాసికం వేరియబుల్ పే శాతం.. ఏప్రిల్- జూన్ క్వార్టర్‌లో ఇచ్చినదాని కంటే తక్కువే కావడం గమనార్హం. అప్పుడు ఇన్ఫోసిస్ ఉద్యోగులకు సగటున 70 శాతం వేరియబుల్ పే అందింది. ఆపరేటింగ్ మార్జిన్లలో ఒత్తిడే వేరియబుల్ పే తగ్గించడానికి కారణమని అప్పట్లో ఇన్ఫోసిస్ ప్రకటించింది. భారత అతిపెద్ద ఐటీ కంపెనీ.. టాటా కన్సల్టెన్సీ సర్వీసెస్ (TCS) మాత్రం ఇటీవల ముగిసిన క్వార్టర్‌లో 70 శాతం మందికిపైగా ఉద్యోగులకు 100 శాతం వేరియబుల్ పే చెల్లించింది. మిగతా వారికి వారి యూనిట్ పెర్ఫామెన్స్ ఆధారంగా చెల్లింపులు జరిపింది. మరో ఐటీ కంపెనీ విప్రో కూడా ఇదే విధంగా 100 శాతం వేరియబుల్ పే ఇచ్చింది. కానీ ఇన్ఫోసిస్ ఉద్యోగులకు తక్కువ వేరియబుల్ పే అందుతున్న నేపథ్యంలో వారంతా బాధలో కూరుకుపోయారు. మరోవైపు బిజినెస్ ప్రాసెస్ మేనేజ్‌మెంట్(BPM) ఉద్యోగులకు ఇన్ఫోసిస్ సగటున 60 శాతం వేరియబుల్ పే నే చెల్లించింది. ఇన్ఫోసిస్‌కు ప్రపంచవ్యాప్తంగా 50 వేల మందికిపైగా BPM సిబ్బంది ఉన్నారు. చాలా మంది భారత్ వెలుపలే ఉన్నారు. ఇటీవల ఐటీ రంగం తీవ్ర సంక్షోభం ముంగిట నిలుస్తోంది. అధిక ద్రవ్యోల్బణం నేపథ్యంలో ఇబ్బందులు ఎదురవుతున్నాయి. దీంతో ఉద్యోగులను తగ్గించుకోవడమే కాక.. కొత్తగా నియామకాలను నిలిపివేస్తూ.. ఖర్చులను తగ్గించుకుంటున్నాయి.