విదేశాల్లో వ్యాపార సామ్రాజ్యాన్ని విస్తరింపజేస్తున్న ఆదానీ

మన దేశంలోనే కాదు ఇపుడు ప్రపంచ వ్యాప్తంగా కూడా పరిచయం అక్కర్లేని పేరు గౌతమ్ అదానీ. ఆసియాలోనే అత్యంత ధనవంతుడు. ప్రపంచవ్యాప్తంగా చూసిన బ్లూమ్‌బెర్గ్ బిలియనీర్స్ జాబితాలో టాప్-5లో ఉన్నారు. ఆయన సంపద ఏకంగా 120 బిలియన్ డాలర్లకుపైనే ఉంది. మరి గౌతమ్ అదానీ ఇటీవలి కాలంలో మరింత దూకుడు పెంచారు. విస్తృతంగా పెట్టుబడులు పెడుతున్నారు. తన గ్రూప్ విలువను లక్ష కోట్ల డాలర్లకు చేర్చే విధంగా దూసుకెళ్తున్నారు. భారత కరెన్సీలో ఇది అక్షరాలా రూ.82 లక్షల కోట్లకుపైనే. అందుకోసమే ఏకంగా వేల కోట్ల కొద్దీ పెట్టుబడులు పెంచుకుంటూ పోతున్నారు. ఈ క్రమంలోనే తన వ్యాపార సామ్రాజ్యాన్ని విస్తరిస్తూ.. ఎదురులేకుండా వెళ్తున్నారు అదానీ.

ఇదే క్రమంలో ఇటీవలి కాలంలో ప్రముఖ పారిశ్రామిక వేత్తలు విదేశాల్లోనూ తమ వ్యాపారాలను విస్తరించేందుకు ప్లాన్స్ చేస్తున్నారు. అందులో రిలయన్స్ ఇండస్ట్రీస్ అధినేత ముకేశ్ అంబానీ ఎప్పటినుంచో కాస్త ముందున్నారు. ఇప్పటికే లండన్, దుబాయ్‌ల్లో నివాసాలను ఏర్పాటు చేసుకున్నారు. ఇటీవల సింగపూర్‌లోనూ ఫ్యామిలీ ఆఫీస్‌ను తెరిచినట్లు వార్తలొచ్చాయి. అయితే ఇప్పుడు ఇదే బాటలో గౌతమ్ అదానీ కూడా పయనిస్తున్నట్లు తెలిసింది.

గౌతమ్ అదానీ.. దుబాయ్ లేదా న్యూయార్క్‌లో ఫ్యామిలీ ఆఫీస్‌ను తెరిచే యోచనలున్నట్లు విశ్వసనీయ వర్గాల ద్వారా తెలిసింది. బ్లూమ్‌బెర్గ్ ఈ విషయాన్ని వెల్లడించింది. విదేశాల్లో వ్యక్తిగత పెట్టుబడులకు ఇది కేంద్రంగా ఉంటుందని అదానీ ఫ్యామిలీ భావిస్తున్నట్లు వివరించింది. అందుకోసం ప్రత్యేకంగా ఫ్యామిలీ ఆఫీస్ మేనేజర్లను కూడా నియమించుకునే యోచనలో అదానీ గ్రూప్ ఉన్నట్లు తెలిసింది. ఈ వ్యవహారానికి సంబంధం ఉన్న వ్యక్తులు ఈ విషయాన్ని చెప్పినట్లు బ్లూమ్‌బెర్గ్ వివరించింది. బ్లూమ్‌బెర్గ్ బిలియనీర్స్ ఇండెక్స్ ప్రకారం గౌతమ్ అదానీ నికర సంపద 135 బిలియన్ డాలర్లకు పైనే ఉంది. భారత కరెన్సీలో ఇది రూ.11 లక్షల కోట్లకుపైనే కావడం విశేషం. ప్రపంచంలోని కుబేరుల్లో టాప్-3లో ఉన్నారు.

అందుకే ఇప్పుడు అదానీ విదేశాల్లో తన వ్యాపారాలను విస్తరించేందుకు మార్గం సుగమం అవుతుందని.. ఈ ఫ్యామిలీ ఆఫీస్ ప్రణాళికతో తెలుస్తోంది. వ్యాపార కొనుగోళ్లను భారత్‌లోనే కాకుండా విదేశాలకు కూడా విస్తరించొచ్చు. ఇటీవల గౌతమ్ అదానీ.. లూయిస్ విట్టన్ ఛైర్మన్, సీఈఓను అధిగమించి బ్లూమ్‌బెర్గ్ బిలియనీర్స్ ఇండెక్స్‌లో టాప్-3లో చేరిన మొదటి ఆసియా వ్యక్తిగా ఘనత సాధించారు. చైనా కుబేరుడు జాక్ మా, భారత రెండో అత్యంత ధనవంతుడు ముకేశ్ అంబానీ కూడా ఎప్పుడూ టాప్-3లోకి ప్రవేశించలేదు. అదానీ.. ఈ సెప్టెంబర్‌లో ఒక దశలో అమెజాన్ బాస్ జెఫ్ బెజోస్‌ను కూడా దాటి.. టాప్-2కు కూడా చేరారు. తర్వాత మళ్లీ కొద్దిరోజులకే మూడోస్థానానికి పడిపోయారు. ఈ ఏడాది జూన్‌లో అదానీ 60వ పుట్టినరోజు సందర్భంగా.. సామాజిక ప్రయోజనాల కోసం రూ.60 వేల కోట్లను విరాళంగా ఇస్తున్నట్లు ప్రకటించింది అదానీ కుటుంబం.