ఫిలిప్పీన్స్‌లోని జన్మించిన 8వ బిలియన్ బేబీ

కొందరు తమ పుట్టుకతోనే  రికార్డులను సొంతం చేసుకొంటారు. ఫిలిప్పీన్స్‌లోని టోండోలో జన్మించిన ఓ బేబీ అలాంటి రికార్డు ను సొంతం చేసుకొంది. ఐక్యరాజ్యసమితి వరల్డ్ పాపులేషన్ ప్రాస్పెక్ట్స్ 2022 నివేదిక ప్రకారం.. ప్రపంచ జనాభా మంగళవారం నాటికి 800 కోట్లకు చేరుకోగా.. ఫిలిప్పీన్స్‌లోని టోండోలో 8వ బిలియన్ బేబీ జన్మించడం విశేషం. స్థానిక కాలమానం ప్రకారం మంగళవారం తెల్ల‌వారుజామున 1.29 నిమిషాల‌కు పుట్టిన ఆ పాపకు వినీస్ మ‌బాన్సాగ్ అని పేరు పెట్టారు. టోండోలోని డాక్ట‌ర్ జోస్ ఫాబెల్లా మెమోరియ‌ల్ హాస్పిట‌ల్‌లో ఆ చిన్నారి జ‌న్మించింది. దీంతో ప్ర‌పంచంలో 8వ బిలియ‌న్ వ్య‌క్తి తమ దేశంలో పుట్టిన‌ట్లు ఫిలిప్పీన్స్‌కు చెందిన జ‌నాభా, అభివృద్ధి సంఘం ప్రకటించింది. ఐరాస నివేదిక ప్రకారం వచ్చే ఏడాదికి అంటే 2023లో ప్రపంచంలో అత్యధిక జనాభా కలిగిన దేశంగా చైనాను... భారత్ అధిగమించనుంది.

‘‘నవంబరు 15న డాక్టర్ జోస్ ఫాబెల్లా మెమోరియల్ హాస్పిటల్‌లోని నర్సులు, జనాభా అభివృద్ధి కమిషన్ ప్రతినిధులు బేబీ వినీస్‌కు స్వాగతం పలికారు’’ అని తెలిపింది. ప్రపంచ జనాభా 8 బిలియన్ల మైలురాయికి చేరుకోవడం.. ప్రజారోగ్యం మెరుగుపడిందనే సంకేతాలను సూచిస్తోందని ఐక్యరాజ్యసమితి వ్యాఖ్యానించింది. మరణాల ప్రమాదాన్ని తగ్గించి, ఆయుర్దాయాన్ని పెంచింది.. అయితే ఈ క్షణం మానవాళి సంఖ్యకు మించి చూడాలని, అత్యంత హానికరంగా మారుతున్న భూ గ్రహాన్ని రక్షించడానికి ప్రజలు తమ భాగస్వామ్య బాధ్యతను నెరవేర్చడానికి ఒక స్పష్టమైన పిలుపునిస్తుందని పేర్కొంది.

‘‘8 బిలియన్లు ఆశలు.. 8 బిలియన్ల కలలు.. 8 బిలియన్లు అవకాశాలు.. మన గ్రహం ఇప్పుడు 8 బిలియన్ల ప్రజలకు నివాసం’’ అని ఐక్యరాజ్యసమితి పాపులేషన్ ఫౌండ్ ట్వీట్ చేసింది. ఐరాస అంచనాల ప్రకారం... గత శతాబ్దంతో పోల్చి చూస్తే ప్రపంచ జనాభా పెరుగుదల చాలా వేగంగా ఉంది.. వృద్ధి వేగం క్రమంగా మందగించినప్పటికీ ప్రపంచ జనాభా 2037 నాటికి 9 బిలియన్లు, 2058 నాటికి 10 బిలియన్లకు చేరుతుంది.

అయితే ప్రపంచం జనాభా 600-700 కోట్లకు చేరడానికి 12 ఏళ్లు పట్టగా... 700-800 కోట్లకు చేరడానికి ఇంచుమించు ఇదే వ్యవధి పట్టింది. వైవిధ్యానికి, ఉమ్మడి మానవత్వానికి, మాతా శిశు మరణాల రేటు తగ్గింపు దిశగా ఆరోగ్య సంరక్షణలో విజయానికి ఇది వేడుకగా నిలుస్తున్న సందర్భమని ఐరాస సెక్రటరీ జనరల్ ఆంటోనియో గుటెర్రస్ తెలిపారు.

ఐరాస అంచనా ప్రకారం సగానికిపైగా జనాభా పెరుగుదల కేవలం ఎనిమిది దేశాల్లోనే అంటే భారత్‌, పాకిస్థాన్‌, కాంగో, ఈజిప్టు, ఇథియోపియా, నైజీరియా, ఫిలిప్పీన్స్‌, టాంజానియాలో నమోదవుతుంది. 700 కోట్ల నుంచి 800 కోట్లకి చేరుకోవడంలో సగానికిపైగా (60 కోట్ల మంది) జనాభా ఆసియా దేశాల నుంచే ఉండటం విశేషం. మిగిలిన 40 కోట్ల జనాభా ఆఫ్రికా దేశాల్లో నమోదైంది.