గుజరాత్ స్టార్ క్యాంపెయినర్ జాబితాలో రాహుల్ గాంధీకి చోటు

గుజరాత్ ఎన్నికల నేపథ్యంలో అక్కడి స్టార్ క్యాంపెయినర్ జాబితాలో రాహుల్ గాంధీకి కాంగ్రెస్ అధిష్టానం చోటు కల్పించింది.  ఇదిలావుంటే గుజరాత్‌ అసెంబ్లీ ఎన్నికల ప్రచారంలో భాగంగా కాంగ్రెస్‌ పార్టీ తన స్టార్‌ క్యాంపెయినర్ల జాబితాను విడుదల చేసింది. ఈ జాబితాలో పార్టీ అగ్రనేత రాహుల్ గాంధీ కూడా ఉన్నారు. గడిచిన 70 రోజులుగా దేశవ్యాప్తంగా రాహుల్ ‘భారత్ జోడో యాత్ర’ నిర్వహిస్తున్నారు. అసెంబ్లీ ఎన్నికలు జరుగుతున్న గుజరాత్, హిమాచల్ ప్రదేశ్ (పోలింగ్ పూర్తైంది)లో మాత్రం ఈ యాత్ర షెడ్యూల్ చేయలేదు. ఈ నేపథ్యంలో రాహుల్ గాంధీ పేరును స్టార్ క్యాంపెయినర్ల జాబితాలో ప్రకటించడం విశేషం. భారత్ జోడో యాత్రకు బ్రేక్ ఇచ్చింది.

గుజరాత్ ఎన్నికల కోసం మొత్తం 40 మందితో కాంగ్రెస్ పార్టీ స్టార్ క్యాంపెయినర్ జాబితా మంగళవారం విడుదల చేసింది. ఈ జాబితాలో పార్టీ అధ్యక్షుడు మల్లికార్జున ఖర్గే, ఆ పార్టీ అగ్రనేత సోనియా గాంధీ, ఏఐసీసీ జనరల్ సెక్రటరీ ప్రియాంక గాంధీ వాద్రా ఉన్నారు. వీరితో పాటు రాజస్థాన్‌ సీఎం అశోక్‌ గెహ్లాట్, , ఛత్తీస్‌గఢ్‌ ముఖ్యమంత్రి భూపేశ్‌ బఘేల్‌, మాజీ ముఖ్యమంత్రులు దిగ్విజయ్‌ సింగ్‌, కమల్‌నాథ్, భూపీందర్‌ హుడా ఉన్నారు. సచిన్‌ పైలట్‌, అశోక్‌ చవాన్‌ పేర్లు కూడా ఈ జాబితాలో ఉన్నాయి.

గుజరాత్‌లో డిసెంబర్‌ 1, 5 తేదీల్లో రెండు విడతల్లో అసెంబ్లీ ఎన్నికలు జరుగనున్నాయి. ప్రధాని నరేంద్ర మోదీ, హోం మంత్రి అమిత్‌ షా సొంత రాష్ట్రమైన గుజరాత్‌లో బీజేపీ.. రెండు దశాబ్దాలకు పైగా అధికారంలో కొనసాగుతోంది. ఈసారి ఆ పార్టీని ఎలాగైనా గద్దె దింపాలని కాంగ్రెస్‌ పార్టీ తీవ్రంగా ప్రయత్నిస్తోంది. దీంతో పాటు ఇటీవల పంజాబ్‌లో ప్రభంజనం సృష్టించిన ఆమ్ ఆద్మీ పార్టీ కూడా గుజరాత్ ఎన్నికల బరిలో దిగడంతో పోరు ఆసక్తికరంగా మారింది.