ఫుడ్ డెలవరీ చేయని పాపానికి... రూ.8,362 చెల్లించుకోవాల్సి వచ్చిన జొమాటో

జొమాటో తాను ప్రదర్శించిన ఉదాసీన వైఖరి కారణంగా ఓ వ్యక్తికి అతడు చెల్లించిన దానికంటే అదనంగా ఎదురుచెల్లించాల్సి వచ్చింది. ఓ లా స్టూడెంట్ జొమాటోకు చుక్కలు చూపించాడు. తను ఆర్డర్ చేసిన ఫుడ్ డెలివరీ చేయలేదని.. న్యాయ పోరాటమే చేశాడు. దాంతో జొమాటో జరిమానా చెల్లించుకోవాల్సిన పరిస్థితి వచ్చింది. తను ఆర్డర్ పెట్టిన ఫుడ్ డెలివరీ చేయలేదని ఒక లా స్టూడెంట్ జొమాటోపై కోర్టునాశ్రయించాడు. దీనిపై కోర్టులో విచారణ జరిగింది. కోర్టు అతడికి నష్ట పరిహారం చెల్లించాలని తీర్పునిచ్చింది.

ఢిల్లీ యూనివర్సిటీలో ఫ్యాకల్టీ ఆఫ్ లాలో అరుణ్ జి.కృష్ణన్ కేరళ, తిరువనంతపురంలో జొమాటోలో ఫుడ్ ఆర్డర్ పెట్టుకున్నాడు. దానికోసం ముందుగానే రూ.362 చెల్లించాడు. కానీ అతడికి ఫుడ్ డెలివరీ చేయలేదు. అతను చెల్లించిన డబ్బులు కూడా రిఫండ్ చేయలేదు. దీనిపై అతడు జొమాటోకు ఫిర్యాదు చేశాడు. కానీ అటు నుంచి ఎటువంటి స్పందన రాలేదు. దాంతో అరుణ్ జొమాటోపై సమరం మొదలుపెట్టాడు. వినియోగదారుల కోర్టును ఆశ్రయించాడు. జరిగిన విషయం తెలుసుకున్న కోర్టు అరుణ్‌కు అనుకూలంగా తీర్పునిచ్చింది.

ఈ కేసు విచారణ సమయంలో అరుణ్ వాదనపై జొమాటో అభ్యంతరం వ్యక్తం చేసింది. ఫుడ్ డెలివరీ చేసే విషయంలో తమ పొరపాటు ఏమీ లేదని చెప్పుకొచ్చింది. డెలివరీ అడ్రస్ సరిగ్గా లేదని, ఫుడ్ అందించేందుకు అతడిని సంప్రదిస్తే అందుబాటులోకి రాలేదని జొమాటో కోర్టుకు తెలియజేసింది. అయితే, ఈ వాదనను కోర్టు తిరస్కరించింది. అరుణ్‌ చెల్లించిన రూ.362తోపాటు నష్ట పరిహారం కింద ఐదు వేల రూపాయలు, కోర్టు ఖర్చుల కింద రూ.3,000 కలిపి మొత్తం రూ.8,362లు జొమాటో చెల్లించాలని ఆదేశించింది.

ఆ మొత్తాన్ని 45 రోజుల్లోగా చెల్లించాలని సూచించింది. లేదంటే 12 శాతం వడ్డీతో చెల్లించాల్సి ఉంటుందని తెలియజేసింది. అయితే అరుణ్ కూడా తనకు నష్ట పరిహారం కింద రూ.1.5 లక్షలు, కోర్టు ఖర్చుల కింద పది వేల రూపాయలు చెల్లించేలా ఆదేశించాలని తన పిటిషన్‌లో కోరాడు. కానీ దానికి కోర్టు నిరాకరించింది. రూ.8.632లు మాత్రమే చెల్లించాలని సూచించింది.