మనస్సును కదిలించేస్తున్న ఆ ఫోటో

సోషల్ మీడియాలో వైరల్ అవుతున్న ఓ ఫోటో ఎందరి మనస్సునో కదిలించేస్తోంది. ఒక్క ఫోటో... ఎన్నో విషయాలను చెబుతుందన్నిది ఎవరూ కదనలేని వాస్తవం. పైకి కనిపించే దానినే కాదు.. మనస్సులో ఉండే ఎన్నో అంశాలను కళ్ల ముందుకు తెస్తుంది. కొన్ని ఫోటోలు మాట్లాడతాయి. మాట్లాడేలా చేస్తాయి. చాలామందిని కదిలిస్తాయి. కదిలి వచ్చేలా చేస్తాయి. అంత శక్తి ఒక్క ఫోటోలకే ఉంటుంది. తాజాగా ఓ ఫోటో కూడా చాలామంది మనస్సులను గెలుచుకుంది. చూసినవాళ్లంతా ఫిదా అయిపోతున్నారు.

ఇంతకీ ఆ ఫోటోలో ఏముందనుకుంటున్నారా..?.. ఒక మనిషిలో నిలువెత్తు మానవత్వానికి నిదర్శనంగా ఆ ఫోటో నిలిచింది. అందుకే చూసిన వెంటనే ఆ ఫోటోతో ప్రేమలో పడిపోతున్నారు. ఉండడానికి ఇల్లు వాకిలి లేని ఓ వ్యక్తి ఫుట్‌పాత్‌పై నిద్రపోతున్న దృశ్యం అందులో ఉంది. అంతేనా అని అనుకోకండి.. అతను ఒక చిన్న పరుపుపై నిద్రించగా.. అతనితో పాటు పరుపు మీద ఏడు వీధి కుక్కలు కూడా ఉన్నాయి. వాటికి ఎండ తగలకూడదని పక్కనే ఓ తెరిచిన గొడుగును కూడా పెట్టాడు.

తనకే ఉండడానికి ఆశ్రయం లేని వ్యక్తి.. ఉన్నదాంట్లో నోరు లేని జీవాలకు కూడా చోటు ఇవ్వడం.. నెటిజన్లను విపరీతంగా ఆకర్షించింది. ఇతరులకు సాయం చేయాలనే మనస్సు ఉండాలే కానీ.. మన దగ్గర ఏముంది.. ఏం లేదు అనే ప్రశ్న ఎప్పటికి ఎదురవ్వదు. ఇదే విషయం ఆ ఫోటో కళ్లకు కట్టినట్టు తెలియజేసింది. అందుకే చాలామంది ఆ ఫోటోను లైక్ చేస్తున్నారు. ఈ ఫోటోని ఇండియన్ ఫారెస్ట్ సర్వీస్ అధికారి సుశాంత నందా ట్విట్టర్‌లో షేర్ చేశారు. "ఈ పెద్ద ప్రపంచానికి అనుగుణంగా మన హృదయం తగినంత పెద్దదిగా ఉండాలి." అని క్యాప్షన్ కూడా పెట్టారు.

ఈ ఫోటో చాలామంది హృదయాలను కదిలించింది. కుక్కలకు చోటు ఇచ్చిన ఆ వ్యక్తి మెచ్చుకోకుండా ఉండలేకపోయారు. ఒకరైతే ఆ వ్యక్తికి "24 క్యారెట్ల బంగారు హృదయం" ఉందని కామెంట్ పెట్టారు. మరొకరు భూమిపై దేవుడని కామెంట్ పెట్టారు. ఈ పోస్ట్‌కి సోషల్ మీడియాలో 900 కంటే ఎక్కువ లైక్‌లు వచ్చాయి.