మెడికల్ కాలేజీలో ఈడీ సోదాలు....కీలక డాక్యూమెంట్లు స్వాధీనం

తెలుగు రాష్ట్రాల్లో పలు కేసుల విషయంలో ఈడీ తన దాడలను మమ్మురం చేసింది.  తాజాగా గుంటూరు జిల్లా మంగళగిరిలోని ఎన్నారై ఆస్పత్రి, దానికి అనుబంధంగా ఉన్న మెడికల్‌ కాలేజీలో ఎన్‌ఫోర్స్‌మెంట్‌ డైరెక్టరేట్‌ (ఈడీ) సోదాలు ముగిశాయి. దాదాపు 27 గంటల పాటు సోదాలు, విచారణ సాగింది. ఈడీ రైడ్స్‌లో పెద్ద ఎత్తున కీలక డాక్యుమెంట్ల స్వాధీనం చేసుకున్నారు. మూడు బ్యాగుల్లో ఈ డాక్యుమెంట్లను అధికారులు తీసుకెళ్లినట్లు తెలుస్తోంది. ఎన్నారై ఆస్పత్రిలో జరిపిన సోదాల్లో ఈడీ కీలక ఆధారాలను రాబట్టింది. నిబంధనలకు విరుద్ధంగా జరిగిన ఆర్థిక లావాదేవీల వివరాలను డాక్యుమెంట్లతో సహా స్వాధీనం చేసుకున్నారు.

విచారణలో భాగంగా ఎన్నారై మెడికల్ కాలేజీ నుంచి సుమారు రూ. 25 కోట్ల మేర నిధులు పక్కదారి పట్టినట్టు ఈడీ గుర్తించింది. ఎంబీబీఎస్, పీజీ సీట్ల ఫీజుల నుంచి నిధులను కొందరు డైరెక్టర్లు దారి మళ్లించినట్లు ఈడీకి ఆధారాలు లభ్యమైనట్లు తెలుస్తోంది. ఇక, భవన నిర్మాణాల పేరుతో రూ. 4 కోట్ల మేర నిధులు మళ్లించారని తేల్చారు..

పలువురు ఎన్నారైలు పన్ను రాయితీల కోసం విదేశాల్లో ఇచ్చిన విరాళాలను ఇక్కడ కొందరు డైరెక్టర్లు డ్రా చేసుకున్నట్లు ఈడీ సోదాల్లో గుర్తించారు. రికార్డుల్లోకి కోవిడ్ పేషంట్ల వివరాలు పోందుపర్చకుండా నిధులను మళ్లించారన్న అంశంపై ఈడీ పక్కా ఆధారాలు చిక్కాయి. 1500కు పైగా రోగుల నుంచి రూ. 30 కోట్లకు పైగా నగదు పక్కదారి పట్టినట్టు తేల్చారు. ఈడీ సోదాల్లో కొందరు డైరెక్టర్ల తెర వెనుక బినామీ బాగోతాలు కూడా వెలుగుచూశాయి.

ఓ డైరెక్టరుకు బినామిలుగా ఎస్సీ, ఎస్టీలు ఉన్నారట. ఆ డైరెక్టర్ దళితుల పేర్లతో అప్పులు తీసుకున్నట్లు సమాచారం. సుమారు రూ. 40 కోట్ల మేర అప్పులు తిరిగి చెల్లించలేదని ఈడీ సోదాల్లో తేలినట్లు సమాచారం. ఎన్నారై నిధులతో అక్కినేని ఉమెన్స్‌ హాస్పిటల్‌ వైద్య పరికరాలు కొనుగోలు చేసినట్లు అనుమానిస్తున్నారు. ఇక, స్వాధీనం చేసుకున్న కీలక డాక్యుమెంట్లను పరిశీలిస్తే.. మరిన్ని విషయాలు బయటకు వస్తాయని ఈడీ అధికారులు చెబుతున్నారు.

మరోవైపు అక్కినేని ఉమెన్స్‌ ఆస్పత్రిలో ఈడీ సోదాలు చేపట్టింది. విదేశీ నిధులను సొంత ఖాతాలకు మళ్లించారన్న ఆరోపణల నేపథ్యంలో 40 మంది ఈడీ అధికారులు ఆ వ్యవహారంపై ఆరా తీస్తున్నారు. ఎన్నారై కోటాలో మెడికల్ సీట్ల ద్వారా రూ. కోట్లు సేకరించారని గుర్తించిన ఈడీ.. పలువురు ఎన్నారైలు, ఆస్పత్రి సిబ్బందిని అదుపులోకి తీసుకుంది.