భారతీయులపై మనస్సు పారేసుకొంటున్న విదేశీ యువతులు
Andhra Pradesh Telugu | Suryaa Desk | Published : Fri, Dec 09, 2022, 09:46 PM
ఇటీవల మన భారతీయులపై ప్రత్యేకించి తెలుగువారిపై విదేశీ వనితలు మనస్సు పారేసుకొంటున్నారు. ప్రేమకు కుల, మతాలు, ప్రాంతాలు అడ్డుకాదంటారు. తెలుగు రాష్ట్రాల నుంచి విదేశాలకు వెళుతున్న యువత.. అక్కడివారిని ప్రేమించి.. పెద్దల్ని ఒప్పించి పెళ్లిళ్లు చేసుకుంటున్నారు. తాజాగా విశాఖ యువకుడు సింగపూర్ అమ్మాయిని ప్రేమ పెళ్లి చేసుకున్నారు. సింగపూర్‌లో వారి పరిచయం ప్రేమగా మారగా.. విశాఖ నగరంలోని మధురవాడలోని ఎంవీవీ సిటీలో పెద్దల సమక్షంలో వివాహ బంధంతో ఒక్కటయ్యారు.
నగరంలోని శాలిపేటకు చెందిన శ్రీనివాస్‌ విశాఖ బుల్లయ్య కళాశాలలో డిగ్రీ చదివారు.. అనంతరం పుణెలో ఎంబీఏ పూర్తి చేశారు. ఆ తర్వాత ఉద్యోగరీత్యా ఏడేళ్ల క్రితం సింగపూర్ వెళ్లి అక్కడ హెచ్‌పీ కంపెనీలో సాఫ్ట్‌వేర్‌ ఇంజినీర్‌గా పనిచేస్తున్నారు. ఈ క్రమంలో సింగపూర్‌లోనే శాప్‌లో పనిచేస్తున్న ఫిలిప్పీన్స్‌కు చెందిన జమేలాహ్‌తో 4 ఏళ్ల క్రితం పరిచయం కాగా.. ఇద్దరు ప్రేమించుకున్నారు.. పెళ్లి చేసుకోవాలని భావించారు.
ఇద్దరు మనసులో మాటను పెద్దలకు చెప్పారు.. వారు కూడా గ్రీన్ సిగ్నల్ ఇచ్చారు. అంతేకాదు విశాఖలో హిందూ సంప్రదాయ పద్ధతిలో పెళ్లి చేసుకోవాలని భావించారు. ఇవ్వడంతో మధురవాడలో గురువారం హిందూ సంప్రదాయ పద్ధతిలో వివాహం ఘనంగా జరిగింది. వీరిద్దరికీ కెనడాలోని ఓ సాఫ్ట్‌వేర్‌ కంపెనీలో ఉద్యోగం వచ్చింది.. దీంతో వీరు త్వరలోనే కెనడా వెళ్లనున్నారు.
|
|