కవిత పై ప్రశ్నల వర్షం కురిపించిన సీబీఐ

ఢిల్లీ లిక్కర్ స్కాంలో టీఆర్ఎస్ ఎమ్మెల్సీ కవితను విచారించిన సీబీఐ ప్రశ్నల వర్షం కురిపించినట్లు తెలుస్తోంది. ఇదిలావుంటే ఆదివారంనాడు చేపట్టిన సీబీఐ విచారణ ముగిసింది. ముందే చెప్పిన విధంగా ఉదయం పదకొండు గంటలకే వచ్చిన అధికారులు.. సుదీర్ఘంగా విచారణ చేశారు. సుమారు ఏడున్నర గంటల పాటు కవితపై అధికారులు ప్రశ్నల వర్షం కురిపించారు. పదకొండు గంటలకు వచ్చిన అధికారులు విచారణ మొదలు పెట్టగా.. ఆరున్నర వరకు ఈ విచారణ సాగింది. కవిత ఇంట్లో ప్రత్యేక గదిలో.. ఆమె అడ్వకేట్ ఆధ్వర్యంలోనే విచారణ సాగింది. అయితే.. ఈ కేసుకు సంబంధించిన పలు కీలక అంశాలను కవిత నుంచి తెలుసుకున్నారు. ఈ కేసులో అధికారులకు ఉన్న సందేహాలను సంధించిన అధికారులు.. ఆమె ఇచ్చిన సమాధానాలను రికార్డు చేసుకున్నారు. అయితే... లిక్కర్‌ కేసు నిందితులు ఇచ్చిన స్టేట్‌మెంట్ ఆధారంగానే సీబీఐ అధికారులు విచారించింది. అమిత్‌ అరోరా ఇచ్చిన స్టేట్‌మెంట్ ఆధారంగా అధికారులు కవితను ప్రశ్నించినట్లు తెలుస్తోంది. సిసోడియా, అరోరా, అభిషేక్‌ విషయంలో అధికారులకు ఉన్న సందేహాలను నివృత్తి చేసుకునే నేపథ్యంలో ఎక్కువగా సీబీఐ ప్రశ్నించినట్లు తెలిసింది. మరోవైపు.. 170 సెల్‌ఫోన్లు ధ్వంసం చేశారనే ఆరోపణలపై సీబీఐ స్పష్టత తీసుకున్నట్టు సమాచారం.

అయితే.. అధికారులు జరిపిన ఈ సుదీర్ఘ విచారణతో సీబీఐ అధికారులు సంతృప్తి చెందారా.. లేదా అన్నది తెలియాల్సింది. అయితే.. సీబీఐ అధికారులు సీఆర్‌పీసీ 160 కింద నోటీసులు ఇవ్వటంతో.. ఇది కేవలం కల్వకుంట్ల కవిత ద్వారా వివరణ తీసుకునే ప్రక్రియ నేపథ్యంలో.. అధికారులు మరోసారి విచారణ చేసే అవకాశం లేకపోలేదు. ఈరోజు జరిగిన విచారణలో అధికారుల సందేహాలన్ని కవిత నివృత్తి చేసినట్టు అధికారులు భావిస్తే.. ఇంకో సారి విచారణ ఉండకపోవచ్చు అనేది మరో వాదన. అయితే.. విచారణ ప్రక్రియ ఎలా సాగిందనేది అటు అధికారులు గానీ.. ఇటు కవిత గానీ.. స్పష్టత ఇవ్వాల్సి ఉంది.

అయితే.. సీఆర్పీసీ నిబంధనల ప్రకారం.. సుర్యాస్తమయం వరకు పూర్తి చేయాల్సిన విచారణను అధికారులు కొంత ఆలస్యం చేశారు. అంటే.. ఐదు.. ఐదున్నర వరకు పూర్తి కావాల్సి ఉన్నా.. ఓ గంట పాటు ఎక్కువగా విచారింటంతో ఆరున్నర వరకు విచారణ కొనసాగింది. అయితే.. విచారణ నేపథ్యంలో ఎవ్వరినీ ఇంట్లోకి అనుమతించకుండా కట్టుదిట్టమైన బందోబస్తు ఏర్పాటు చేయటంతో.. మరింత ప్రాధాన్యత సంతరించుకుంది. మరోవైపు.. ఈ విచారణపై కూడా సీబీఐ అధికారులు కూడా ఎలాంటి వివరణ ఇవ్వకపోవటం గమనార్హం. విచారణ ఈరోజుతో పూర్తయిందా.. లేక మరోసారి విచారించే అవకాశం ఉందా అన్నదానిపై ఎలాంటి ప్రకటన చేయకపోవటంతో.. ఈ ఘటనపై మరింత ఉత్కంఠ నెలకొంది.