వ్యవసాయం దండగన్న వ్యక్తి రైతుల గురించి మాట్లాడటం సిగ్గుచేటు: మంత్రి కాకాణి గోవర్ధన్‌రెడ్డి
Andhra Pradesh Telugu | Suryaa Desk | Published : Sat, Dec 24, 2022, 11:44 PM
వ్యవసాయం దండగన్న చంద్రబాబు.. ఇప్పుడు రైతుల గురించి సిగ్గులేకుండా మాట్లాడుతున్నారని మంత్రి కాకాణి గోవర్ధన్‌రెడ్డి మండిపడ్డారు. అసలు, ఉచిత విద్యుత్ సాధ్యమే కాదన్న వ్యక్తి చంద్రబాబు అన్నారు. రైతులను కాల్చి చంపిన ఘనచరిత్ర బాబుదని మంత్రి ధ్వజమెత్తారు.
తెలుగు దేశం పార్టీ అధినేత చంద్రబాబునాయుడు మానసిక పరిస్థితి సరిగాలేదని.. మైకేల్‌ జాక్సన్‌ తరహాలో ప్రచారాల్లో పాల్గొంటూ ఏవేవో మాట్లాడుతున్నారని ఆయన ఎద్దేవా చేశారు.
పదవి కోసం చంద్రబాబు ఎంతకైనా దిగజారుతారని మంత్రి కాకాణి అన్నారు. ప్రధాని నరేంద్ర మోదీని అవసరమైన్నపుడు పొగిడి, అవసరం తీరగానే విమర్శలు చేశారని దుయ్యబట్టారు. చివరికి కాంగ్రెస్ పార్టీ మాజీ జాతీయ అధ్యక్షుడు రాహుల్ గాంధీని, సీపీఎం, సీపీఐలను కూడా కలుస్తారని దుయ్యబట్టారు.
ఎవరితో అవసరమైతే వారితో జత కట్టడం, అవసరం తీరగానే వారిని వదిలేయడం చంద్రబాబుకు అలవాటేనని మంత్రి కాకాణి విమర్శించారు. 14 సంవత్సరాలు ముఖ్యమంత్రిగా చేశానని చెప్పుకునే చంద్రబాబునాయుడు.. కుప్పం నియోజకవర్గానికి రెవెన్యూ డివిజన్ కూడా తెచ్చుకోలేక పోయాడని దుయ్యబట్టారు. దీన్ని కూడా సీఎం జగన్మోహన్ రెడ్డే ఇచ్చారన్నారు. చంద్రబాబునాయుడు తన కుమారుడు లోకేష్‌ను అమెరికాలో ఎవరి ఖర్చుతో చదివించారో చెప్పాలని డిమాండ్ చేశారు. సొంత కొడుకు ప్రయోజకుడు కాకపోవడంతో దత్త పుత్రుడు పవన్ కళ్యాణ్‌పై ఆధార పడుతున్నారని ఎద్దేవా చేశారు. విశాఖపట్నంలో రాజధానిని వ్యతిరేకించే చంద్రబాబు.. ఉత్తరాంధ్ర విలన్ అని దుయ్యబట్టారు.
|
|