వైసీపీ పతనాన్ని కళ్లార చూస్తాం: నాగబాబు

వైసీపీ పతనాన్ని త్వరలోనే మనమంతా కళ్లారా చూస్తామని  జనసేన నేత  నాగబాబు వ్యాఖ్యానించారు. ప్రస్తుత రోజుల్లో రాజకీయాల్లోకి తక్కువ మంది యువత మాత్రమే వస్తున్నారని పేర్కొన్నారు. రాజకీయాల్లోకి యువత రాకపోతే దుర్మార్గులు వస్తారని ఆయన హెచ్చరించారు.

ఆంధ్రప్రదేశ్‌లో ముఖ్యమంత్రి వైఎస్ జగన్మోహన్ రెడ్డి, అధికార వైఎస్సార్ కాంగ్రెస్ పార్టీ నాయకులు నియంతల్లా వ్యవహరిస్తున్నారని ఆయన ఆరోపించారు. ప్రతిపక్షాలు, ప్రజలను చితక్కొట్టడమే తమ నైజం అన్నట్లుగా అధికార పార్టీ నేతల వ్యవహారశైలి ఉందని దుయ్యబట్టారు. జనసేన పార్టీ ఆధ్వర్యంలో శ్రీకాకుళం జిల్లా లావేరు మండలం తాళ్లవలస వద్ద నిర్వహించిన ‘యువశక్తి’ కార్యక్రమంలో నాగబాబు పాల్గొన్నారు.

ఈ సందర్భంగా నాగబాబు మాట్లాడుతూ.. తాను పార్టీ అభివృద్ధికి మాత్రమే పని చేస్తానని చెప్పారు. జనసేన ఏ ఒక్క కులానికో సంబంధించిన పార్టీ కాదని తేల్చిచెప్పారు. జనసేన అన్ని కులాలకు కాపుకాస్తుందని చెప్పారు. దుర్మార్గులు ప్రభుత్వాన్ని ఏర్పాటు చేస్తే పిల్లల భవిష్యత్‌ను దోచుకుని తింటారన్నారు.

ముఖ్యమంత్రి జగన్మోహన్ రెడ్డి తనకు అడ్డొచ్చిన వారిని తప్పించాలని చూస్తున్నారని నాగబాబు అన్నారు. సీఎం జగన్ విద్యావంతుడు కాదని, ఆయనకు ఏ మాత్రం చరిత్ర తెలియదన్నారు. సీఎం జగన్ ఎవరేం చెప్పినా వినరని.. ఆయనకు చెప్పే ధైర్యం కూడా ఎవరికీ లేదన్నారు. అందుకే జనసేనాని పవన్ కళ్యాణ్ వారాహి యాత్రను అడ్డుకోవడానికి జీవో నంబర్ 1 తీసుకొచ్చారన్నారు. ఇక, ఉద్యోగులు, ఉపాధ్యాయులపై నిఘా పెట్టి వేధిస్తున్నారని పేర్కొన్నారు.

మరోవైపు ఈ సభకు ఉత్తరాంధ్రతో పాటు రాష్ట్రంలోని వివిధ ప్రాంతాల నుంచి జనసైనికులు, పవన్‌ కళ్యాణ్ అభిమానులు పెద్దఎత్తున తరలి వచ్చారు. దీంతో సభా ప్రాంగణమంతా కోలాహలంగా మారింది. యువత ఇప్పుడు ప్రధానంగా ఎదుర్కొంటున్న సమస్యలపై ఈ సభలో చర్చిస్తున్నారు.