రావయ్య అల్లుడా...ఇవి ఆరగించు... 173 రకాల వంటలతో అల్లుడికి విందు
Andhra Pradesh Telugu | Suryaa Desk | Published : Sun, Jan 15, 2023, 11:05 AM
సంక్రాంతి వచ్చిందంటే ఆంధ్రా ప్రాంతంలో కొత్త అల్లులకు ఉండే డిమాండ్ అంతా ఇంతా కాదు. అతిథి మర్యాదలకు పెట్టింది పేరు గోదావరి జిల్లా. ఇంటికి వెళ్లిన అతిథికి కడుపు నిండా భోజనం పెట్టనిదే పంపించరు. అలాంటిది కొత్త అల్లుడు ఇంటికి వస్తే ఎలా ఉంటుంది. అది కూడా సంక్రాంతికి వస్తే ఆ హడావుడి మామూలుగా ఉండదు. మొదటి పండగకు ఇంటికి వచ్చిన అల్లుడికి ఒకటీ రెండు రకాళ వంటకాలు కాదు వందకుపైనే పిండి వంటలు చేసి వడ్డించటం అక్కడ షరామామూలే. ప్రతీ సారీ అల్లుడికి పెట్టే వంటకాల సంఖ్యలో పోటీ పడుతుంటారు ఈ గోదావరి జిల్లా వాసులు. అయితే.. ఈసారి సంక్రాంతికి వచ్చిన కొత్త అల్లుడికి ఏకంగా 173 రకాల వంటకాలు వడ్డించి.. వార్తల్లో నిలిచారు పశ్చిమగోదావరి జిల్లా భీమవరానికి చెందిన అత్తగారు. 173 రకాల వంటకాలతో అత్త మామలు... కొత్త అల్లుడికి విందు భోజనం వడ్డించారు.
భీమవారానికి చెందిన వ్యాపారవేత్త తటవర్తి బద్రి, సంధ్య దంపతులు.. ఇటీవలే తమ కుమార్తె హారికను పృథ్వీ గుప్తాకు ఇచ్చి వివాహం జరిపించారు. సంక్రాంతి పండుగ సందర్భంగా కొత్త అల్లుడు ఇంటికి రావడంతో... 173 రకాల వెరైటీ వంటకాలతో బాహుబలి భోజనం వడ్డించారు. అత్తగారింట్లో మర్యాదలు చూసి సంతోషంతో అల్లుడికి కడుపు నిండిపోయింది. అయితే.. ఈ వంకతో తప్పించుకునేది లేదు... వాళ్లు చేసిన వంటకాలన్ని రుచి చూడాల్సిందే. అట్లుంటది మరో గోదారోళ్లతోని.
|
|