అప్పుడే పుట్టిన బిడ్డను మూడో అంతస్తు నుంచి విసిరేసింది

అనైతిక కార్యకలాపాలతో పెళ్లి కాకుండానే గర్భం దాల్చిన 20 ఏళ్ల ఓ యువతి, అప్పుడే పుట్టిన బిడ్డను మూడో అంతస్తు నుంచి విసిరేసింది. తాను నివాసం ఉంటున్న అపార్ట్‌మెంట్‌లో మూడో అంతస్తులోని ప్లాట్‌లో వాష్‌రూమ్ విండో నుంచి శిశువును రోడ్డుపైకి విసిరేయడంతో.. ఆ మగబిడ్డ తీవ్ర గాయాల పాలై ప్రాణం విడిచాడు. ఈ హృదయ విదాకర ఘటన దేశ రాజధాని ఢిల్లీలోని న్యూ అశోక్ నగర్‌లో సోమవారం (జనవరి 9) చోటు చేసుకుంది. పోలీసులు, స్థానికులు తెలిపిన వివరాల ప్రకారం.. న్యూ అశోక్‌ నగర్‌కు చెందిన కొంత మంది మహిళలు సోమవారం ఉదయం చలికి తాలలేక ఓ అపార్ట్‌మెంట్‌ సమీపంలో చలిమంట వేసుకొని సాంత్వన పొందుతున్నారు. ఇంతలో పైనుంచి ఏదో వస్తువు కిందపడిపోయినట్లు వారికి శబ్దం వినిపించింది. అక్కడికి వెళ్లి చూడగా.. అప్పుడే పుట్టిన ఓ పసికందు రక్తమోడుతూ కనిపించాడు.

శిశువును వెంటనే నోయిడాలోని మెట్రో ఆస్పత్రికి తరలించారు. అక్కడ నుంచి ఎల్‌బీఎస్ ఆసుపత్రికి తరలించగా.. శిశువు అప్పటికే మృతి చెందినట్లు వైద్యులు ధ్రువీకరించారు. ఘనటపై కేసు నమోదు చేసుకున్న పోలీసులు.. ఆ అపార్ట్‌మెంట్‌లో నివాసం ఉంటున్న వారందరినీ విచారించారు. అపార్ట్‌మెంట్‌లోని ఓ ఫ్లాట్‌లో రక్తపు మరకలను గుర్తించి.. అందులో నివాసం ఉంటున్న 20 ఏళ్ల యువతిని విచారించగా.. తొలుత ఖండించినప్పటికీ, ఆ తర్వాత తనే బిడ్డకు జన్మనిచ్చినట్లు అంగీకరించింది.

వివాహం కాకుండానే బిడ్డను ప్రసవించానని, ఆ విషయం ఇతరులకు తెలిస్తే సమాజాన్ని ఎదుర్కోలేననే భయంతో అలా చేశానని యువతి చెప్పింది. నోయిడాలోని ఓ ప్రైవేట్ కంపెనీలో పనిచేస్తున్న సదరు యువతి.. పెళ్లి కాకుండానే గర్భం దాల్చి, ప్రసవించింది. నిందితురాలిపై ఐపీసీ సెక్షన్లు 302 (హత్య), 201 (సాక్ష్యాలు మాయం చేయడం) కింద కేసు నమోదు చేసి విచారిస్తున్నట్లు పోలీసులు తెలిపారు.