స్పీడ్ అందుకొంటున్న ఎక్స్ ప్రెస్ హైవే పనులు

ఏపీ మీదుగా ఎక్స్‌ప్రెస్ హైవే పనులు స్పీడ్ అందుకున్నాయి. భారత్‌మాల పరియోజన పథకం కింద చెన్నై–బెంగళూరు ఎక్స్‌ప్రెస్‌ హైవే.. చెన్నై సమీపంలోని శ్రీపెరంబూదూర్‌ నుంచి బెంగళూరు సరిహద్దు లోని హొసకోట వరకు 283.5 కిలోమీటర్ల మేరకు 6 ట్రాక్‌ ఎక్స్‌ప్రెస్‌ హైవే నిర్మాణం అవుతోంది. మొత్తం రూ.16,730 కోట్లతో 2021 నుంచి మూడు ఫేజుల్లో పనులు కొనసాగుతున్నాయి.

చెన్నై–బెంగళూరు ఎక్స్‌ప్రెస్‌హైవే (ఎన్‌హెచ్‌ఏఐ ఎన్‌ఈ 7) దక్షిణాదిలో మొట్టమొటది. చెన్నై నుంచి బెంగళూరు వరకు రోడ్డు దూరం 283.5 కిలోమీటర్లు నిర్మాణం అవుతోంది. ఇది ఏపీలో 91 కి.మీ, కర్ణాటకలో 77 కి.మీ, తమిళనాడులో 93 కిలోమీటర్లు ఉంటుంది. ఇప్పటి వరకు బెంగళూరు–చెన్నై ప్రయాణ సమయం 6 గంటలు కాగా.. ఎక్స్‌ప్రెస్‌ హైవే పూర్తయితే 2 గంటల 15 నిమిషాలు సమయం మాత్రమే పడుతుంది. ఈ హైవేలో సాధారణ వేగం గంటకు 120 కిమీ..ఇక ఫ్లైఓవర్‌లు 17 ఉంటాయి.

మొదటి ఫేజ్‌లో కర్ణాటక పరిధిలోని 71 కిలోమీటర్లలో ఇప్పటికే 37.56 శాతం పనులు పూర్తయ్యాయి. మిగిలిన రెండు, మూడు ఫేజ్‌‌లలో ఏపీలోని చిత్తూరు జిల్లాతో పాటు తమిళనాడు రాష్ట్రంలో 112 కిలోమీటర్లలో పదిశాతం మట్టిరోడ్డు పనులు, అలైన్‌మెంట్‌ ల్యాండ్‌ లెవలింగ్‌ పనులు నడుస్తున్నాయి. ఈ పనులు త్వరితగతిన జరిగేలా మూడు ఫేజ్‌లలో పది ప్యాకేజీలుగా విభజించారు. కర్ణాటకలో మూడు, ఏపీలో మూడు, తమిళనాడులో నాలుగు ప్యాకేజీలు ఉన్నాయి.

కర్ణాటక సరిహద్దు నుంచిచిత్తూరు జిల్లా పలమనేరు నియోజకవర్గంలోని వీకోట, బైరెడ్డిపల్లె, పలమనేరు మండలాల మీదుగా 60 కిలోమీటర్ల మేర రోడ్డు పనులు కొనసాగుతున్నాయి. మరోవైపు పలమనేరు నియోజకవర్గంలో చెన్నై–బెంగళూరు 6 ట్రాక్‌ ఎక్స్‌ప్రెస్‌ హైవే పనులు వేగంగా సాగుతున్నాయి. అలైన్‌మెంట్‌ మేరకు మట్టి రోడ్డు పనులు జరుగుతున్నాయి.రెండో ఫేజ్‌లో పలమనేరు నియోజకవర్గంలోనూ పదిశాతం పనులు జరిగాయి. హైవే పనులు 2024 మార్చికల్లా పూర్తిచేసి ప్రారంభించనున్నట్లు తెలుస్తోంది.