ప్రియుడి మాటల్లో పడి...తండ్రినే చంపబోయిన బాలిక

ప్రేమ మత్తులో పడి ఓ బాలిక కన్నతండ్రినే చంపే ప్రయత్నం చేసింది. ఇటీవల చోటుచేసుకుంటున్న కొన్ని ఘటనలను చూస్తుంటే నేటి తరం ఏ వైపు వెళ్తుందో అర్థం కావట్లేదు. పట్టుమని 18 ఏళ్లు నిండకుండానే, ప్రేమలో పడి.. ప్రియుడికి సర్వం అప్పగించి, అది తప్పు నాన్నా అని చెప్పినందుకు కన్నతండ్రి మీదే కత్తి దూసింది ఇంటర్ చదువుతున్న ఓ బాలిక. అర్ధరాత్రి నిద్రిస్తున్న సమయంలో చాకుతో పొడిచి చంపేందుకు ప్రయత్నించింది. విశాఖపట్నం నగరంలో వెలుగులోకి వచ్చిన ఈ ఘటన సభ్య సమాజాన్ని తల దించుకునేలా చేస్తోంది. పోలీసుల కథనం ప్రకారం.. విశాఖ నగరంలో అక్కయ్యపాలెం శంకరమఠం ప్రాంతంలో నివాసం ఉండే ఓ వ్యక్తికి కొడుకు, కూతురు ఉన్నారు. 17 ఏళ్ల ఆ కుమార్తె నగరంలోని ఓ కార్పొరేట్ కాలేజీలో ఇంటర్‌ చదువుతోంది. ఆమెకు విశాఖలోనే ఓ కాలేజీ ఐటీఐ చదువుతున్న మైనర్ బాలుడి (17)తో ఏడాది కిందట పరిచయం ఏర్పడింది. ఆ పరిచయం కాస్త ప్రేమగా మారింది.

ఇద్దరూ పెళ్లి చేసుకోవాలని నిర్ణయించుకోవడంతో ఆ బాలిక తన ప్రియుడు చెప్పినట్లు చేస్తోంది. అతడి మాటలు నమ్మి తన ఇంట్లో నుంచి రహస్యంగా రూ. 2 లక్షల నగదు, 8 తులాల బంగారు ఆభరణాలను తీసుకొచ్చి ఆ బాలుడికి ఇచ్చింది. కుమార్తె ప్రవర్తనపై అనుమానం వచ్చిన తండ్రి ఆమె కదలికలపై నిఘా పెట్టడంతో అసలు విషయం బయటపడింది. బాలికను నిలదీయడంతో తండ్రికే ఎదురు చెబుతోంది. కొన్ని నెలలుగా ఇంట్లో గొడవలు జరుగుతున్నాయి.

ఇదిలా ఉండగానే.. తన దగ్గర డబ్బు లేదని, ఏదో ఒకటి చేయాలని ప్రియుడు బాలికను కోరాడు. శుక్రవారం (జనవరి 20) అర్ధరాత్రి బాలిక తండ్రి ఇంట్లో నిద్రిస్తుండగా.. వంట గదిలో కూరగాయలు తరిగే చాకు తీసుకొని తండ్రి మెడపై పొడిచి చంపబోయింది. అలికిడి కావడంతో తండ్రి మేల్కొని పక్కకు జరిగాడు. దీంతో చాకు వీపులో దిగింది. బంధువులు ఆయణ్ని ఆస్పత్రిలో చేర్పించి చికిత్స అందిస్తున్నారు.

బాలిక కుటుంబసభ్యుల ఫిర్యాదుతో పోలీసులు ఆమెను అదుపులోకి తీసుకుని విచారించారు. దాడి ఘటనపై కేసు నమోదు చేశామని పోలీసులు తెలిపారు. బాలికను జువైనల్‌ హోంకు తరలించనునట్లు వెల్లడించారు. అయితే, బాలుడి ప్రోద్బలంతోనే ఆమె ఇదంతా చేసిందని బంధువులు ఆరోపిస్తున్నారు. సదరు బాలుడికి మరొక అమ్మాయితో ప్రేమ వ్యవహారం నడుస్తోందని, వాళ్లిద్దరూ కలిసి ప్రణాళిక ప్రకారం.. తమ అమ్మాయి వద్ద డబ్బు కాజేశారని పోలీసులకు చెప్పారు. తనను మోసం చేసి నగదు కాజేశారని బాలిక సైతం పోలీసులకు ఫిర్యాదు చేసింది.