నారా లోకేష్ కు రైతు గిఫ్ట్ అదుర్స్

టీడీపీ జాతీయ ప్రధాన కార్యదర్శి నారా లోకేష్‌కు ఓ అమరావతి యువ రైతు సర్‌ప్రైజ్ గిఫ్ట్ ఇచ్చాడు. లోకేష్ ఫొటో రూపంలో వరిపంట పండించాడు. ఎకార పొలం కౌలుకు తీసుకున్న యువ రైతు.. అందులో 70 సెంట్లలో లోకేష్ ఫొటో రూపంలో వరిపంట పండించాడు. ఈ నెల 23న లోకేష్ పుట్టినరోజు సందర్భంగా.. ఇందులో పండించిన వరి ధాన్యాన్ని లోకేష్‌కు గిఫ్ట్‌గా అందించనున్నట్లు చెబుతున్నాడు.

అమరావతి ప్రాంతంలోని తుళ్లూరు మండలం ఉద్దండరాయనిపాలెంకు చెందిన పులి చిన్నాకు లోకేష్‌ అంటే చాలా అభిమానం. లోకేష్ పట్ల తనకు ఉన్న అభిమానాన్ని వినూత్నంగా చాటాలనుకున్నాడు. అందుకోసం కొత్త ఐడియాను ఆలోచించి ఇలా తన అభిమాన నాయకుడిపై ఉన్న ప్రేమను చాటుకున్నాడు. చిన్నా అమరావతి ఉద్యమంలో కూడా పాల్గొని రైతుల పక్షాన నిలిచాడు. లోకేష్ పట్ల తనకు ఉన్న అభిమానాన్ని ఇలా పంట రూపంలో చాటుకున్నానని చిన్నా చెబుతున్నాడు. త్వరలో కుప్పం నుంచి ప్రారంభించనున్న లోకేష్ యువగళం పాదయాత్ర విజయవంతం కావాలని పచ్చని పంట ద్వారా శుభాకాంక్షలు చెబుతున్నట్లు తెలిపాడు.

సోమవారం నారా లోకేష్ తన బర్త్ డేను జరుపుకోనున్నారు. ఈ సందర్భంగా అభిమానులు లోకేష్ బర్త్ డేను గ్రాండ్‌గా సెలబ్రేట్ చేసేందుకు ఏర్పాట్లు చేస్తున్నారు. టీడీపీ నేతలు, కార్యకర్తలు లోకేష్ బర్త్ డేను ఘనంగా జరపనున్నారు. అన్ని నియోజకవర్గాల్లో కేక్ లు కట్ చేసి లోకేష్ జన్మదిన వేడుకలు నిర్వహించనున్నారు. ఈ సందర్భంగా పలు సేవా కార్యక్రమాలు కూడా నిర్వహించనున్నారు. రాష్ట్రవ్యాప్తంగా బ్లడ్ డొనేషన్ క్యాంపులు ఏర్పాటు చేయనున్నారు.

ఈ నెల 27 నుంచి లోకేష్ పాదయాత్రకు శ్రీకారం చుట్టనున్నారు. టీడీపీ అధినేత చంద్రబాబు సొంత నియోజకవర్గమైన కుప్పం నుంచి లోకేష్ పాదయాత్ర ప్రారంభం కానుంది. రోజుకు 10 కిలోమీటర్ల చొప్పున లోకేష్ నడవనున్నారు. శ్రీకాకుళం జిల్లా ఇచ్చాపురం వరకు లోకేష్ పాదయాత్ర చేయనున్నారు. సుమారు 4 వేల కిలోమీటర్లు లోకేష్ పాదయాత్ర చేయనుండగా.. ఇందుకు 400 రోజుల సమయం పడుతుందని టీడీపీ శ్రేణులు అంచనా వేశారు. లోకేష్ పాదయాత్రకు అనుమతి ఇవ్వాల్సిందిగా ఇప్పటికే డీజీపీని కలిసి టీడీపీ లేఖ అందించింది. కానీ ఇప్పటివరకు ఇంకా లోకేష్ పాదయాత్రకు అనుమతి రాలేదు. దీంతో అనుమతి ఇవ్వాల్సిందిగా మరోసారి పోలీస్ అధికారులకు టీడీపీ గుర్తు చేసింది. అనుమతి రాకపోయినా పాదయాత్ర షెడ్యూల్ ప్రకారం ప్రారంభం అవుతుందని టీడీపీ నేతలు చెబుతున్నారు.