నియోజకవర్గాన్ని ఒక యూనిట్‌గా తీసుకుని..నాణ్యతతో కూడిన రోడ్డు వేయండి

నియోజకవర్గాన్ని ఒక యూనిట్‌గా తీసుకుని.. అందులో ప్రధానమైన రోడ్లన్నింటినీ కూడా పూర్తిచేయాలని అధికార్లను ముఖ్యమంత్రి వైఎస్ జగన్ మోహన్ రెడ్డి ఆదేశించారు. రాష్ట్రంలోని రోడ్లను పూర్తిగా బాగు చేయాలని ఆయన సూచించారు. కొత్తగా వేస్తున్న రోడ్లను నాణ్యతతో వేయాలని స్పష్టం చేశారు. రోడ్డు నిర్మాణం పూర్తయిన తర్వాత.. రెండేళ్లకే రిపేర్లకు వచ్చే అవకాశం ఉండకూడదని.. రోడ్డు వేశాక కనీసం ఏడేళ్లపాటు పాడవ్వకుండా ఉండేలా చూసుకోవాలని సూచించారు. దీనివల్ల క్రమం తప్పకుండా రోడ్లు మెయింటెనెన్స్‌ అవుతాయని.. నిర్వహణకూడా సజావుగా, నాణ్యతతో సాగుతుందని అధికారులకు వివరించారు. దీనిపై అధికారులు దృష్టిపెట్టాలని సూచించారు.

ఉభయ గోదావరి జిల్లాలతో పాటు కృష్ణా, గుంటూరు వంటి జిల్లాల్లో నేల స్వభావం రీత్యా రోడ్లు త్వరగా పాడైపోతున్నాయని.. భారీ వాహనాలు తిరిగే సరికి కుంగిపోతున్నాయని అధికారులు సీఎం దృష్టికి తీసుకొచ్చారు. ఇలాంటి చోట్ల పుల్ డెప్త్ రిక్లమేషన్‌ (ఎఫ్‌డీఆర్‌) టెక్నాలజీని వాడాలని అధికారులు ప్రతిపాదించారు. దీనికి గ్రీన్‌ సిగ్నల్‌ ఇచ్చిన సీఎం.. ఖర్చు ఎక్కువైనా నాణ్యత బాగుంటుందని అభిప్రాయపడ్డారు.

'మొదటి దశలో వేయి కిలోమీటర్ల మేర ఎఫ్‌డీఆర్‌ టెక్నాలజీతో చేపట్టాలి. వచ్చే జూన్, జులైకల్లా ఈ పద్ధతిలో నిర్దేశించుకున్న మేరకు రోడ్లు వేయాలి. అసంపూర్తిగా ఉన్న బ్రిడ్జిలను పూర్తిచేయాలి. కడప, బెంగళూరు రైల్వేను లైనుపై దృష్టిపెట్టాలి. విశాఖ నుంచి భోగాపురానికి వెళ్లే రోడ్డు నిర్మాణంపైనా దృష్టిపెట్టాలి. రోడ్లు బాగు చేసిన తర్వాత నాడు–నేడు ద్వారా ప్రజల ముందు పెట్టాలి. ఇంత ఖర్చుచేసి రోడ్లు బాగుచేస్తున్నా నెగిటివ్‌ ప్రచారం చేస్తున్నారు. అన్ని ప్రభుత్వ శాఖలో నాడు–నేడు శీర్షిక కింద మనం చేపట్టిన అభివృద్ధి కార్యక్రమాలను ప్రజల ముందు ఉంచాలి'. అని సీఎం జగన్ సూచించారు.

'దురుద్దేశంతో కొన్ని మీడియా సంస్థలు నెగెటివ్‌ ప్రచారం చేస్తున్నాయి. ఇన్ని అభివృద్ధి కార్యక్రమాలు జరుగుతున్నా విష ప్రచారం చేస్తున్నాయి. వారి కడుపుమంటకు మందులేదు. అందుకే మనం చేస్తున్న అభివృద్ధి పనులను ఎప్పటికప్పుడు ప్రజల ముందు ఉంచాలి. స్థానిక ప్రజా ప్రతినిధులు, పౌరులు ఎవరైనా ఫిర్యాదు చేసే అవకాశం ఇవ్వాలి. ప్రత్యేక యాప్‌ ద్వారా దీనికి సంబంధించిన ఫొటోలను అప్‌లోడ్‌ చేసే అవకాశం ఉంటుంది. దీనిపై కమాండ్‌ కంట్రోల్‌ రూం కూడా ఏర్పాటు చేయాలి. ఫిర్యాదులను పరిగణలోకి తీసుకుని వెంటనే చర్యలు చేపట్టాలి' అని జగన్ స్పష్టం చేశారు.

పట్టణాలు, నగరాల్లో రోడ్ల మరమ్మతులు నాణ్యతతో జరగాలి. పట్టణాలు, నగరాల్లో ఎక్కడైనా ఫలానా చోట రోడ్డు రిపేరు చేయాలని పౌరుడు ఫిర్యాదు చేసిన 60 రోజుల్లో.. దాన్ని బాగు చేయాలి. ఈ లక్ష్యాన్ని తప్పనిసరిగా పాటించాలి. యాప్‌ పనితీరు, అందులో వస్తున్న ఫిర్యాదుల పరిష్కారంపై నిరంతరం సమీక్ష, పర్యవేక్షణ ఉండాలి. నాణ్యత మీద ప్రత్యేక దృష్టిపెట్టినప్పుడు అవే సమస్యలు ప్రతిసారి రావు. ఇకపైన కూడా రోడ్ల నిర్వహణలో గణనీయమైన మార్పులు రావాలి. రోడ్డు మరమ్మతులలో దీర్ఘకాలం నిలిచే సాంకేతిక పరిజ్ఞానాన్ని వినియోగించుకోవాలి' అని ముఖ్యమంత్రి జగన్ ఆదేశించారు.