వచ్చే ఎన్నికల్లో మహిళలకు అధిక ప్రాధాన్యత: బాలినేని శ్రీనివాసరెడ్డి

వచ్చే ఎన్నికల్లో ముఖ్యమంత్రి వైఎస్ జగన్మోహన్ రెడ్డి మహిళలకు అధిక ప్రాధాన్యత కల్పించే అవకాశం ఉందని వైఎస్సార్ కాంగ్రెస్ పార్టీ సీనియర్ ఎమ్మెల్యే, మాజీ మంత్రి బాలినేని శ్రీనివాసరెడ్డి వెల్లడించారు. వచ్చే ఎన్నికల్లో తనకు టికెట్‌ ఇవ్వకపోవచ్చని అని ఆయన సంచలన వ్యాఖ్యలు చేశారు. ప్రకాశం జిల్లా సింగరాయకొండ మార్కెట్ యార్డు ఛైర్మన్‌ ప్రమాణ స్వీకారోత్సవ కార్యక్రమంలో సోమవారం బాలినేని పాల్గొన్నారు. ఈ సందర్భంగా ఎమ్మెల్యే బాలినేని శ్రీనివాసరెడ్డి మాట్లాడుతూ.. 

వచ్చే ఎన్నికల్లో తనకు ఎమ్మెల్యే టికెట్‌ రాకపోవచ్చని.. తన భార్య సచీదేవికి టికెట్‌ ఇస్తారేమో అని ఎమ్మెల్యే బాలినేని అనుమానం వ్యక్తం చేశారు. ‘నీకు సీటు లేదు.. నీ భార్యకు ఇస్తాను’ అని సీఎం జగన్‌ అంటే తానైనా చేసేదేమీ లేదని వ్యాఖ్యానించారు. ఈసారి మహిళలే పోటీ చేయాల్సి ఉంటుందని సీఎం జగన్ తేల్చి చెబితే తానైనా పోటీ నుంచి వైదొలగాల్సిందేనని వెల్లడించారు.

నియోజకవర్గ స్థాయి నేతలు విభేదాలు పక్కనపెట్టి పార్టీ గెలుపు కోసం కలిసికట్టుగా పని చేయాలని ఎమ్మెల్యే బాలినేని పిలుపునిచ్చారు. ప్రకాశం జిల్లాలోని కొండేపి వైసీపీ సమన్వయకర్త వరికూటి అశోక్ బాబు.. పార్టీ కార్యకర్తలు, నాయకులను పట్టించుకోవడం లేదనే ఆరోపణలు వస్తున్నాయని తెలిపారు. ఈ వేదిక మీద నుంచి చెబుతున్నా.. పార్టీ గెలుపు కోసం అందరితో నడవాలని సూచించారు. 2019లో కొండేపి నియోజకవర్గంలో వైసీపీ ఓటమిని చవిచూసిందని.. ఈ సారి మాత్రం ఎట్టిపరిస్థితుల్లో గెలిచి తీరాలని స్పష్టం చేశారు. కొండేపిలో ఎట్టిపరిస్థితుల్లోనూ వైసీపీ జెండా ఎగురవేయాలని బాలినేని శ్రీనివాసరెడ్డి పిలుపునిచ్చారు.