ఇరాన్‌ను భారీ భూకంపం...ఏడుగురి మరణం
international | Suryaa Desk | Published : Sun, Jan 29, 2023, 06:57 PM
ఇరాన్ లో ఘోరం చోటుచేసుకొంది. ఆదేశాన్ని భారీ భూకంపం కుదిపేసింది. టర్కీ సరిహద్దుల్లోని ఉత్తర ఇరాన్‌లో శనివారం రాత్రి భారీ భూకంపం సంభవించింది. అజర్‌ బైజాన్‌ ప్రావిన్సుల్లోని ఖోయ్ నగరంలో సంభవించిన ఈ భూకంపం తీవ్ర రిక్టర్ స్కేల్‌పై 5.9గా నమోదయ్యింది. భూకంపం ధాటికి అనేక భవనాలు పేక మేడల్లో కుప్పకూలిపోయాయి. శిథిలాల కింద చిక్కుకుని ఏడుగురు ప్రాణాలు కోల్పోగా... వందలాది మంది గాయపడ్డారు. శిథిలాలు మీద పడి కొందరు మరణించగా.. తప్పించుకునే ప్రయత్నంలో భవనాలపై నుంచి దూకి వందలాది మంది గాయపడ్డట్లు అధికారులు వెల్లడించారు.
భూకంప ప్రభావిత ప్రాంతాల్లో పోలీసులు, విపత్తు నిర్వహణ సిబ్బంది సహాయక చర్యలు కొనసాగుతున్నాయి. శిథిలాల కింద చిక్కుకున్నవారిని వెలికితీసే ప్రయత్నాలు చేస్తున్నారు. గాయపడిన ప్రజలను రక్షించి ఆస్పత్రులకు తరలించారు. ఆసుప‌త్రుల‌కు సమాచారం అందించి, ముంద‌స్తుగా అన్ని ఏర్పాట్లు చేసుకోవాల‌ని అప్రమత్తం చేశామని ఇరాన్ అత్యవ‌స‌ర సేవ‌ల విభాగ అధికారులు పేర్కొన్నారు.
భూకంప ప్రభావిత ప్రాంతాల్లో మంచు విపరీతంగా కురుస్తుండడంతో సహాయక చర్యలకు ఆటంకం కలుగుతోంది. చాలా చోట్ల విద్యుత్ సరఫరా నిలిచిపోయినట్లు సమాచారం. భూకంప ప్రాంతాల్లో బాధితుల ఆర్తనాదాలు కలచివేస్తున్నాయి. గడ్డకట్టే ఉష్ణోగ్రతలు, విద్యుత్ కోతల నేపథ్యంలో ప్రజలు ఇబ్బందులను ఎదుర్కొంటున్నారు. ఇటీవల ఏళ్లలో అనేక విధ్వంసకర భూకంపాలు ఇరాన్‌‌పై విరుచుకుపడ్డాయి. గతేడాది అక్టోబరులోనూ 5.4 తీవ్రతతో భూకంపం సంభవించి, పది మంది ప్రాణాలు కోల్పోయారు
|
|