కోస్తా ప్రాంతాలు, పరిసర జిల్లాల్లో వర్షాలు

రేపు ఆంధ్రప్రదేశ‌ రాష్ట్రానికి వర్ష సూచన వచ్చిసింది. కోస్తా ప్రాంతాలు, పరిసర జిల్లాల్లో సోమవారం వర్షాలు కురుస్తాయని వాతావరణ శాఖ అధికారులు వెల్లడించారు. ఆంధ్రప్రదేశ్, యానాంల్లో దిగువ ట్రోపోస్పిరిక్ స్థాయిల్లో తూర్పు /ఆగ్నేయ గాలులు వీస్తున్నాయి. ఆగ్నేయ బంగాళాఖాతాన్ని ఆనుకుని ఉన్న హిందూ మహాసముద్రం తూర్పు భూమధ్యరేఖ ప్రాంతం మీదుగా అల్పపీడనం కొనసాగుతోంది. దాని అనుబంధ ఉపరితల ఆవర్తనం మధ్య ట్రోపోస్పిరిక్ స్థాయిల వరకు విస్తరించి ఉంటుంది. ఇది పశ్చిమ, వాయువ్య దిశగా కదిలి, నైరుతి బంగాళాఖాతం మీదుగా జనవరి 30 నాటికి అల్పపీడనంగా మరింత బలపడి ఫిబ్రవరి 1 నాటికి శ్రీలంక తీరానికి చేరుకునే అవకాశం ఉందని తెలిపారు.

ఉత్తర కోస్తాంధ్ర, యానాంలో ఆది, సోమ, మంగళవారాల్లో పొడి వాతావరణం ఉండే అవకాశం ఉంది. దక్షిణ కోస్తాంధ్రలో ఆదివారం ఒకట్రెండు చోట్ల తేలికపాటి వర్షాలు కురిసే అవకాశం ఉంది. ఒకటి లేదా రెండు చోట్ల పొగమంచు సంభవించే అవకాశం ఉంది. అలాగే, సోమ, మంగళవారాల్లో ఒకట్రెండు చోట్ల తేలికపాటి వర్షాలు కురిసే ఛాన్స్ ఉంది. రాయలసీమలో ఆదివారం పొడి వాతావరణం ఉండే అవకాశం ఉంది. ఒకట్రెండు చోట్ల కనిష్ట ఉష్ణోగ్రతలు, సగటు ఉష్ణోగ్రతల కంటే 2 డిగ్రీల నుంచి 4 డిగ్రీల వరకు తక్కువగా నమోదయ్యే అవకాశం ఉంది. సోమవారం ఒకట్రెండు చోట్ల తేలికపాటి వర్షాలు కురిసే అవకాశం ఉంది. ఒకట్రెండు చోట్ల కనిష్ట ఉష్ణోగ్రతలు, సగటు ఉష్ణోగ్రతల కంటే 2 డిగ్రీల నుంచి 3 డిగ్రీల సెంటీగ్రేడ్ వరకు తక్కువగా, నమోదయ్యే అవకాశం ఉంది. మంగళవారం ఒకట్రెండు చోట్ల తేలికపాటి వర్షాలు కురిసే అవకాశం ఉంది.