అలేఖ్య రెడ్డి కి చేదోడుగా నిలిచిన చల్లా కుటుంబం

నందమూరి తారకరత్నకు బెంగళూరు నారాయణ హృదయాలయలో వైద్యం కొనసాగుతోంది. నారా, నందమూరి కుటుంబాలు ఆస్పత్రికి వెళ్లాయి.. ఆయన ఆరోగ్య పరిస్థితిని అడిగి తెలుసుకున్నారు. అయితే నారా, నందమూరి కుటుంబీకులతో పాటు బెంగళూరులోని ఆసుపత్రిలో మరో టీడీపీ నేత కూడా ప్రముఖంగా కనిపించారు. ఆయనే చిత్తూరు పుంగనూరు టీడీపీ ఇంఛార్జ్ చల్లా రామచంద్రారెడ్డి . చంద్రబాబు ఆస్పత్రికి వెళ్లిన సమయంలో కూడా వెంట ఉన్నారు.

రామచంద్రారెడ్డికి తారకరత్నతో పార్టీపరమైన అనుబంధమే కాదు.. బంధుత్వం కూడా ఉంది. తారకరత్న సతీమణి అలేఖ్య రెడ్డి కి చల్లా దగ్గరి బంధువు. అలేఖ్య రెడ్డి చల్లా రామచంద్రారెడ్డి పెద్దమ్మ కుమార్తె.. తారకరత్నకు గుండెపోటు వచ్చిన విషయం తెలిసి చల్లా కుటుంబం అండగా నిలిచింది. తారక రత్న భార్యని ఓదార్చుతూ, ధైర్యం చెబుతూ చల్లా భార్య సుప్రియారెడ్డి కూడా బెంగళూరులోని ఆసుపత్రిలోనే ఉన్నారు. రామచంద్రారెడ్డి కూడా ఆస్పత్రిలో కనిపించారు.

మరోవైపు తారకరత్న ఆరోగ్య పరిస్థితి నిలకడగా ఉందంటున్నారు. ఆదివారం జూనియర్ ఎన్టీఆర్, కళ్యాణ్ రామ్‌లు నారాయణ హృదయాలయకు వెళ్లారు. తారకరత్న ఆరోగ్య పరిస్థితిపై వాకబు చేశారు. అన్నకు మెరుగైన వైద్యం అందుతోందని.. ఆయన కూడా పోరాడుతున్నారన్నారు ఎన్టీఆర్. వైద్యంతో పాటు ఆయన ఆత్మబలం, మనోబలంతో పాటు అభిమానుల ఆశీర్వాదం, తాత ఆశీర్వాదం ఉంది అన్నారు. ఆయన త్వరగా కోలుకుని ఇదివరకు లాగే అందరితో ఆనందంగా గడుపుతారని.. డాక్టర్లు తారకరత్న ఆరోగ్యం ఇప్పటికీ నిలకడగానే ఉందని చెబుతున్నారన్నారు. తమ్ముడు త్వరగా కోలుకుని అందరి ముందుకు రావాలనిమనస్ఫూర్తిగా కోరుకుంటున్నాను అన్నారు కళ్యాణ్ రామ్.

తారకరత్న గుండె స్పందన సాధారణంగా ఉన్నా.. మెదడు పనితీరు సాధారణ స్థితిలో లేదన్నారు కర్ణాటక ఆరోగ్యశాఖ మంత్రి కె.సుధాకర్‌. నిమ్హాన్స్‌ న్యూరోసర్జన్‌ ప్రొఫెసర్‌ గిరీష్‌ కులకర్ణి నేతృత్వంలో ఇద్దరు న్యూరో సర్జన్లు తారకరత్న ఆరోగ్యాన్ని పర్యవేక్షిస్తున్నారని తెలిపారు. ఆందోళనకర పరిస్థితి నుంచి కోలుకోకపోయినా.. రెండు రోజులతో పోలిస్తే తారకరత్న ఆరోగ్యం స్థిరంగానే ఉందన్నారు. తారకరత్న ఆరోగ్యంలో మార్పులు కనిపించాయన్నారు నందమూరి బాలకృష్ణ. రెండు సార్లు తారకరత్న శరీరంపై గిచ్చితే.. ఓసారి స్పందించారని.. అలాగే కళ్లలోనూ కదలికలు గమనించారన్నారు.

నందమూరి తారకరత్న గత శుక్రవారం టీడీపీ జాతీయ ప్రధాన కార్యదర్శి నారా లోకేష్ పాదయాత్రలో పాల్గొన్నారు. కొద్దిసేపటికి తీవ్ర అస్వస్థతకు గురై గుండెపోటుతో సొమ్మసిల్లి పడిపోయారు. వెంటనే ఆయన్ను కుప్పంలోని ఆస్పత్రికి తరలించగా.. అక్కడే చికిత్సపొందారు. అయితే డాక్టర్ల సలహా మేరకు మెరుగైన వైద్యం కోసం బెంగళూరు నారాయణ హృదయాలయకు తరలించారు.