ఏపీ నుంచి ఎలాంటి ప్రకటన రాలేదు...కేంద్రం స్పష్టీకరణ

విశాఖపట్నం మెట్రో ప్రాజెక్టు నిర్మాణం కోసం ఆంధ్రప్రదేశ్‌ ప్రభుత్వం నుంచి ఎలాంటి ప్రతిపాదనలు రాలేదని కేంద్ర ప్రభుత్వం కీలక ప్రకటన చేసింది. ఈ మేరకు లోక్‌సభలో వైఎస్సార్ కాంగ్రెస్‌ పార్టీ ఎంపీలు ఎంవీవీ సత్యనారాయణ, డాక్టర్ బి.వెంకట సత్యవతి అడిగిన ప్రశ్నలకు కేంద్ర పట్టణాభివృద్ధి శాఖ సహాయమంత్రి కౌశల్ కిశోర్‌ సమాధానం ఇచ్చారు.  2018లో 42.55 కిలో మీటర్ల పొడవుతో రూ. 8,300 కోట్ల వ్యయ అంచనాలతో “లైట్ మెట్రో రైల్ ప్రాజెక్టు” కోసం మాత్రమే ఏపీ ప్రభుత్వం నుంచి ప్రతిపాదనలు వచ్చాయన్నారు. అయితే, 75.3 కిలో మీటర్ల పొడవుతో రూ. 15,993 కోట్ల వ్యయ అంచనాలతో విశాఖ మెట్రో ప్రాజెక్టుపై ఎలాంటి ప్రతిపాదనలు రాలేదన్నారు.

పబ్లిక్ ప్రైవేట్ పార్ట్‌నర్‌షి (పీపీపీ) విధానంలో ‘కొరియన్ ఎగ్జిమ్ బ్యాంక్’ ఆర్థిక సహాయానికి కేంద్రం ప్రయత్నించిందని.. అయితే, ఈ ప్రాజెక్టును సదరు బ్యాంక్ పరిశీలించిన తర్వాత ఆర్థిక సహాయానికి నిరాకరించిందని కేంద్ర మంత్రి వెల్లడించారు.. పట్టణ రవాణా పూర్తిగా రాష్ట్ర ప్రభుత్వం పరిధిలోని అంశంగా తేల్చేశారు. ఇక, మెట్రో రైల్ ప్రాజెక్టులు, సమగ్ర రవాణా ప్రణాళికలు, ప్రత్యామ్నాయ విశ్లేషణ నివేదికలు, డీపీఆర్‌ల రూపకల్పన పూర్తిగా రాష్ట్రాల పరిధిలో ఉంటుందన్నారు కేంద్ర మంత్రి కౌశల్ తెలిపారు. రాష్ట్ర ప్రభుత్వాల ప్రతిపాదనలను, సాధ్యాసాధ్యాలను అధ్యయనం చేసి వనరుల లభ్యతను బట్టి వీలైనంత మేరకు ఆర్థిక సహాయం అందించేందుకు కేంద్రం పరిశీలిస్తుందన్నారు. విశాఖపట్నంతో పాటు ఏపీలోని మరో 9 (ఏలూరు, కాకినాడ, నెల్లూరు, ఒంగోలు, రాజమండ్రి, అనంతపురం, చిత్తూరు, కడప, కర్నూలు) నగరాలకు ‘కాంప్రహెన్సివ్ మొబిలిటీ ప్లాన్’ రూపకల్పనకు కేంద్రం నిధులిచ్చిందని తెలిపారు. అలాగే, విజయవాడ మెట్రో రైల్ కోసం ‘నాన్-మోటరైజ్డ్ ట్రాన్స్‌పోర్ట్ ఇంటిగ్రేషన్ ప్లాన్’, ‘ఇంటిగ్రేడెట్ పబ్లిక్ ట్రాన్స్‌పోర్ట్ ప్లాన్’ రూపకల్పనకు 2018-19లో కేంద్రం రూ. 78.44 లక్షలు ఇచ్చిందని కేంద్ర మంత్రి కౌశల్ కిషోర్‌ గుర్తు చేశారు.