బిల్లులు రాక ఇబ్బందులు పడుతున్నాం..కొత్త రోడ్డు వేయడం కుదరదు

వేసిన రోడ్డకే బిల్లులు రాక ఇబ్బందులు పడుతున్నాం..కొత్త రోడ్డు వేయడం కుదరదు అని నెల్లూరు జిల్లా ఉదయగిరి ఎమ్మెల్యే మేకపాటి చంద్రశేఖర్ రెడ్డి తేల్చి చెప్పారు.  గడప, గడపకు మన ప్రభుత్వం కార్యక్రమంలో భాగంగా కలిగిరి మండలం నాగసముద్రంలో ఆయన పర్యటించారు. స్థానిక మహిళలు గ్రామంలో సీసీ రోడ్లు వేయాలని ఎమ్మెల్యేని కోరగా.. రోడ్లు వేయలేమని.. వేసిన రోడ్లకు బిల్లులు రాక డబ్బులు లేక ఇబ్బందులు పడుతున్నామన్నారు. కొత్త రోడ్లు వేయడం కుదరదని తేల్చి చెప్పారు.. ఎమ్మెల్యే సమాధానంతో స్థానికులు , అధికారులు, నేతలు అవాక్కయ్యారు.

కొంతమంది మీడియా ఉందని అప్రమత్తం చేసినా ఎమ్మెల్యే వెనక్కు తగ్గలేదు. పనులు చేసినోళ్లకు డబ్బులు రాలేదని.. ఎవరు చేస్తారో చెప్పండని వ్యాఖ్యానించారు. వడ్డీలకు అప్పులు తెచ్చి ఎవరు సొమ్ములు పెట్టి రోడ్లు వేయగలరన్నారు. ఆ తర్వాత చీమలవారిపాలెం ఎస్సీ కాలనీలో పర్యటిస్తుండగా.. స్థానికులు కూడా సిమెంటు రోడ్లు నిర్మించాలని కోరారు. ప్రభుత్వం అధికారంలోకి వచ్చి నాలుగేళ్లవుతున్నా ఎక్కడైనా ఒక ఇల్లు కట్టించారా అని ప్రశ్నించారు. మేకపాటి వ్యాఖ్యలు ఆసక్తికరంగా మారాయి.. సోషల్ మీడియాలో వీడియో వైరల్ అవుతోంది.

మరోవైపు ఎమ్మెల్యే మేకపాటి చంద్రశేఖర్ రెడ్డి ఇటీవల తన నియోజకవర్గంలో వైఎస్సార్‌సీపీ పరిశీలకుడు చిచ్చు పెడుతున్నారని ఆగ్రహం వ్యక్తం చేసిన సంగతి తెలిసిందే. తనను ధనుంజయరెడ్డి ఇబ్బంది పెడుతున్నారని.. కొన్ని నిర్ణయాలతో పార్టీకి చెడ్డపేరు వస్తుందన్నారు. ఈ వ్యవహారంపై సీఎంకు ఫిర్యాదు చేశానని.. తన మీద పెత్తనం చేయడానికి కుదరదని.. దేనికైనా రెడీ అన్నారు. మళ్లీ రోడ్లపై చేసిన వ్యాఖ్యలు ఆసక్తికరంగా మారాయి.