స్విమ్స్‌కు రూ.22 కోట్లతో పరికరాలు... ఒప్పందం చేసుకున్న ఐవోసీఎల్

స్విమ్స్‌లో వైద్య పరికరాల కొనుగోలు కోసం ఇండియన్ ఆయిల్ కార్పొరేషన్ లిమిటెడ్ రూ.22 కోట్లు విరాళంగా అందించేందుకు ముందుకొచ్చింది. టీటీడీ పరిపాలన భవనంలోని ఈవో ఛాంబర్‌లో కలిసి టీటీడీ ఈవో ధర్మారెడ్డి సమక్షంలో ఐఓసీఎల్ ,స్విమ్స్ అధికారులు ఎంవోయూ కుదుర్చుకున్నారు. స్విమ్స్‌లో రోగులకు వైద్య సహాయం అందించడానికి కార్పొరేట్ సామాజిక బాధ్యతగా ఈ నిధులను అందించడం సంతోషంగా ఉందని ఇండియన్ ఆయిల్ కార్పొరేషన్ లిమిటెడ్ మార్కెటింగ్ ప్రతినిధులు అన్నారు. టీటీడీ తిరుమలలో భక్తులకు, సిమ్స్, బర్డ్, చిన్న పిల్లల ఆసుపత్రుల్లో రోగులకు అందిస్తున్న సేవలను ఈవో ధర్మారెడ్డి వివరించారు.

మరోవైపు తిరుపతికి చెందిన ఆల్ ఇండియా ఆర్యవైశ్య వాసవి నిత్య అన్నదాన ట్రస్టుకు చెందిన ఉమామహేశ్వరి దంపతులు 10 లక్షలు విరాళం అందించారు. ఈ మేర‌కు విరాళం డీడీని శుక్రవారం ఉదయం తిరుమలలోని అన్నమయ్య భవనంలో ఈవో ధర్మారెడ్డికి అంద‌జేశారు. అలాగే డయుల్ యువర్ ఈవో కార్యక్రమం కూడా శుక్రవారం జరిగింది. భక్తులు తమ సమస్యల్ని ఈవో దృష్టికి తీసుకెళ్లారు.

జనవరి 28న తిరుమలలో నిర్వహించిన రథసప్తమి ఉత్సవానికి భక్తులు విశేషంగా తరలివచ్చారన్నారు ఈవో. నాలుగు మాడ వీధుల్లోని గ్యాలరీలన్నీ పూర్తిగా నిండిపోయాయని తెలిపారు. లక్షలాది మంది భక్తులకు అన్నప్రసాదాలు, టి, కాఫీ, పాలు, అల్పాహారాలు అందించామన్నారు. అలాగే తిరుమలలో నిర్మించిన నూతన పరకామణి భవనంలో ఫిబ్రవరి 5న కానుకల లెక్కింపు ప్రారంభంకానుందని చెప్పారు. తిరుమలలో స్వామివారి హుండీ కానుకలు లెక్కించడానికి బెంగళూరుకు చెందిన దాత మురళీకృష్ణ అందించిన రూ.23 కోట్ల విరాళంతో అధునాతన సౌకర్యాలతో కూడిన నూతన పరకామణి భవనం నిర్మించామన్నారు.

తిరుమల శ్రీవారి ఆలయ ఆనందనిలయం బంగారు తాపడం పనులను ఆరు నెలల పాటు వాయిదా వేస్తున్నామని.. త్వరలో మరో తేదీ నిర్ణయించి తెలియజేస్తామన్నారు. భక్తులకు మరింత మెరుగైన డిజిటల్‌ సేవలు అందించేందుకు ప్రయోగాత్మకంగా టిటిదేవస్థానమ్స్‌ పేరుతో మొబైల్‌ యాప్‌ను ఇటీవల ప్రారంభించామని గుర్తు చేశారు. తిరుమల శ్రీవారి దర్శనం, సేవలు, వసతి, అంగప్రదక్షిణ, సర్వదర్శనం, శ్రీవారి సేవ బుక్‌ చేసుకోవడంతోపాటు విరాళాలు కూడా అందించవచ్చన్నారు. పుష్‌ నోటిఫికేషన్ల ద్వారా తిరుమల శ్రీవారి ఆలయంలో జరిగే ఉత్సవాల వివరాలు ముందుగా తెలుసుకోవచ్చు. ఎస్వీబీసీ ప్రసారాలను లైవ్‌ స్ట్రీమింగ్‌ ద్వారా వీక్షించవచ్చని తెలిపారు.

జనవరి నెలకు సంబంధించి శ్రీవారిని 20.78 లక్షల మంది భక్తులు దర్శించుకున్నారని తెలిపారు. హుండీ కానుకలు రూ.123.07 కోట్లు రాగా.. 1.07 కోట్లు శ్రీవారి లడ్డూలు విక్రయించామన్నారు. అన్నప్రసాదం 37.38 లక్షల మంది స్వీకరిస్తే.. తలనీలాలు సమర్పించిన భక్తుల సంఖ్య 7.51 లక్షలుగా ఉంది.