భద్రత కుదించడంపై తీవ్ర అసంతృప్తి,,,గన్‌మెన్లందరినీ వెనక్కి ఇచ్చేసిన ఎమ్మెల్యే కోటంరెడ్డి

నెల్లూరు జిాల్లాలో రాజకీయ వేడి రాజుకొంది. నెల్లూరు రూరల్ వైసీపీ ఎమ్మెల్యే కోటంరెడ్డి శ్రీధర్ రెడ్డి సంచలన నిర్ణయం తీసుకున్నారు. తన గన్‌మెన్లందరినీ ప్రభుత్వానికి సరెండర్ చేశారు. తనకు గన్‌మెన్లను కుదిస్తూ శనివారం ప్రభుత్వం తీసుకున్న నిర్ణయంపై స్పందించేందుకు ఆదివారం కోటంరెడ్డి మీడియా సమావేశం ఏర్పాటు చేశారు. ఈ సందర్భంగా తన గన్‌మెన్లు అందరినీ ప్రభుత్వానికి వెనక్కి ఇచ్చేస్తున్నట్లు స్పష్టం చేశారు.

ఈ సందర్భంగా మీడియా సమావేశంలోనే ఇద్దరు గన్‌మెన్లు కంటతడి పెట్టుకోగా.. వారిని ఓదార్చుతూ కోటంరెడ్డి కూడా భావోద్వేగానికి గురయ్యారు. 'ప్రభుత్వానికి రిటర్న్ గిఫ్ట్ ఇస్తున్నాను. నాకు గన్‌మెన్లు అవసరం లేదు. నాకు బెదిరింపు కాల్స్ వస్తున్నాయి. ఈ సమయంలో అదనపు భద్రత కల్పించకపోగా.. భద్రతను కుదించారు. నాకు కార్యకర్తలే రక్ష. మానసికంగా ఇబ్బంది పెట్టారనే గన్‌మెన్లను తొలగించారు. మీకే గిఫ్ట్ ఇస్తున్నా.. మిగిలిన ఇద్దరు కూడా నాకు వద్దు' అని కోటంరెడ్డి పేర్కొన్నారు.

'నాకు వైసీపీ ప్రభుత్వం 2+2 గన్‌మెన్లను ఇచ్చింది. నిన్న ఇద్దరు గన్‌మెన్లను వాపసు తీసుకోవాలని ఆదేశించారు. ఎవరి ఆదేశాలతో ఈ పని చేశారో తెలియదు. రాష్ట్ర ప్రభుత్వ పెద్దలు చెప్పనిదే ఈ పని చేయరు. అనేకచోట్ల నుంచి నాకు బెదిరింపు కాల్స్ వస్తున్నాయని చెప్పా. ఇలాంటి సమయంలో ఇంకా నాకు అదనంగా రక్షణ కల్పించాల్సిన బాధ్యత ప్రభుత్వంపై ఉంటుంది. అలా కాకుండా ఉన్నవాళ్లలో ఇద్దరిని తొలగిస్తారా? ఇద్దరు గన్‌మెన్లను తొలగిస్తే మానసికంగా భయపడతానా? మిగలిన ఇద్దరు గన్‌మెన్లనుక గిఫ్ట్‌గా మీకే ఇస్తున్నా.. తీసుకోండి..' అని కోటంరెడ్డి శ్రీధర్ రెడ్డి ప్రభుత్వంపై విమర్శలు కురిపించారు.

'ఎక్కడికైనా ఒంటరిగా వెళ్తా.. ఏం భయపడను. ప్రజల గొంతుకగా నా మాటలను వినిపిస్తూనే ఉంటా. మరింత కసితో, పట్టుదలతో ముందుకెళ్తా. నా గన్‌మెన్లు నాకు వ్యక్తిగతంగా ఇష్టమైన వ్యక్తులు. ఈ ఇద్దరు గన్‌మెన్లను కూడా అప్పగిస్తున్నా.. తగ్గేదేలే. 175 గెలుస్తామన్నప్పుడు ఒక్క ఎమ్మెల్యే వ్యతిరేకిస్తే భయమా? ఒక్క ఎమ్మెల్యేను లక్ష్యంగా చేసుకుని బెదిరిపు కాల్స్ చేస్తారా? నా సహచరులను కూడా ఇబ్బంది పెడతారా?' అని ఆయన ప్రశ్నించారు.