కోటంరెడ్డి పార్టీని వీడటం బాధాకర అంశం: రామిరెడ్డి ప్రతాప్ రెడ్డి
Andhra Pradesh Telugu | Suryaa Desk | Published : Sun, Feb 05, 2023, 06:22 PM
కోటంరెడ్డి శ్రీధర్ రెడ్డి పార్టీ వీడటం చాలా బాధాకరమైన విషయమని ఎమ్మెల్యే రామిరెడ్డి ప్రతాప్ రెడ్డి పేర్కొన్నారు. కోటంరెడ్డి తోడేళ్లను నమ్మి వెళుతున్నారని వ్యాఖ్యానించారు. ఇక్కడ మంచి స్థానం వదులుకున్న కోటంరెడ్డికి భవిష్యత్తు రాజకీయ జీవితం ఎలా అవుతుందో తెలియదన్నారు. వైసీపీ ఎమ్మెల్యేలు గడపగడపకు మన ప్రభుత్వం కార్యక్రమంలో సరిగా తిరుగుతున్నామా, లేదా అనే విషయంలో వీడియోలు తీస్తుంటారని.. ఆ విషయంలో శ్రీధర్ రెడ్డి ఏమైనా పొరపాటు చేసి ఉండవచ్చన్నారు. దానికి ముఖ్యమంత్రి వైఎస్ జగన్మోహన్ రెడ్డి మందలించి ఉండొచ్చని పేర్కొన్నారు. దానికే ఇలాంటి నిర్ణయం తీసుకుంటారా అని ప్రశ్నించారు.
కోటంరెడ్డి, తాము ఎన్నో సంవత్సరాలుగా కలిసి మెలిసి ఉన్నామని ఎమ్మెల్యే రామిరెడ్డి పేర్కొన్నారు. అలాంటి వ్యక్తి చంద్రబాబు లాంటి తోడేళ్లతో పోకుండా ఉండాల్సిందని అభిప్రాయపడ్డారు. కోటంరెడ్డి గతంలో ప్రాణం ఉన్నంత వరకు సీఎం జగన్ వెంటే నిలబడతానని అన్నారని గుర్తు చేశారు. జగన్మోహన్ రెడ్డికి దూరమైతే తన ప్రాణం పోయినట్లే అని శ్రీధర్ రెడ్డి అన్నారని.. ఇప్పుడు ఆ మాట ఏమైందని ప్రశ్నించారు.
|
|