ఫేషియల్ అటెండెన్స్‌‌లో ఎన్‌రోల్ కు ఉద్యోగుల అనాసక్తి...మరోసారి గుర్తుచేసిన ప్రభుత్వం
Andhra Pradesh Telugu | Suryaa Desk | Published : Mon, Feb 06, 2023, 05:55 PM
ఫేషియల్ అటెండెన్స్‌‌లో ఎన్‌రోల్ కు ఉద్యోగుల్లో అనాసక్తి కనిపిస్తున్నట్లు తెలుస్తోంది. ఈ నేపథ్యంలో ఫేషియల్ అటెండెన్స్‌‌‌కు సంబంధించి వివిధ శాఖల హెడ్ ఆఫ్ ది డిపార్ట్‌మెంట్ (హెచ్‌వోడీ)లు, జిల్లా అధికారులకు ఏపీ ప్రభుత్వం రిమైండర్ మెమో జారీ చేసింది. ఈ మేరకు సోమవారం ఏపీ ప్రభుత్వ ప్రిన్సిపల్ సెక్రటరీ రేవు ముత్యాలరాజు మాట్లాడుతూ.. ఫేషియల్ అటెండెన్స్‌ను ఏపీఎఫ్‌ఆర్‌ఎస్ యాప్‌‌ను ఉపయోగించి ప్రతి ఒక్కరూ ఆఫీసుల్లో నమోదు చేయాలని ఇప్పటికే ఆదేశాలు ఇచ్చామన్నారు. అయితే నేటికీ చాలా మంది ఫేషియల్ అటెండెన్స్‌‌లో ఎన్‌రోల్ కానట్లు సమాచారం వచ్చిందని చెప్పారు.
ఈ ఏడాది జనవరి 16వ తేదీలోగా ఈ ప్రక్రియ పూర్తి చేయాలని 100 శాతం ఎన్‌రోల్‌మెంట్ ఉండాలని చెప్పినా పట్టించుకోవడం లేదని మెమోలో ముత్యాలరాజు అభ్యంతరం తెలిపారు. ఇకపై 100 శాతం ఎన్‌రోల్‌మెంట్ ఎపీఎఫ్‌ఆర్‌ఎస్ యాప్‌లో నమోదు చేయాలని ఆదేశించారు. ఇందు కోసం స్పెషల్ డ్రైవ్‌లు నిర్వహించాలని సూచించారు.
ఇకపై ఏపీఎఫ్‌ఆర్‌ఎస్ యాప్ ద్వారానే ముఖ ఆధారిత అటెండెన్స్‌ను నమోదు చేయాలని ముత్యాలరాజు స్పష్టం చేశారు. వివిధ ఆఫీసుల్లో పరిపాలనా అధిపతులు, నోడల్ అఫీసర్‌లు ఈ అటెండెన్స్‌ అమలు అయ్యేలా చర్యలు తీసుకోవాలని కోరారు. లేని పక్షంలో వారిని బాధ్యులను చేయాల్సి ఉంటుందని ముత్యాలరాజు మెమో జారీ చేశారు.
|
|