భూకంపాన్ని అవి ముందే గుర్తించాయా... ఓ వీడియో వైరల్

టర్కీ భూ కంపాన్ని అక్కడి పక్షులు గుర్తించాయన్న ఓ వీడియో ఇపుడు సోషల్ మీడియాలో వైరల్ అవుతోంది. ఇదిలావుంటే గత సోమవారం ఉదయం సంభవించిన భారీ భూకంపం దెబ్బకు టర్కీ, సిరియా విలవిల్లాడుతున్నాయి. వరుసగా వచ్చిన ప్రకంపనలు నష్టాన్ని మరింత పెంచేశాయి. ఇప్పటి వరకూ దాదాపు 5 వేల మంది మరణించినట్లు గుర్తించగా.. లక్షలాది భవనాలు కూలిపోవడంతో.. వేలాది మంది ఇంకా శిథిలాల కిందే ఉండొచ్చని అనుమానిస్తున్నారు. దీంతో మరణాల సంఖ్య మరింత పెరిగే అవకాశం ఉంది. భూకంపం తర్వాత బయటకొచ్చిన దృశ్యాలు గుండెల్ని పిండేస్తున్నాయి.

ఇదిలావుంటే భూకంపానికి ముందు టర్కీలోని పక్షులు వింతగా ప్రవర్తించాయంటూ.. సోషల్ మీడియాలో ఓ వీడియో వైరల్‌గా మారింది. దీంతో పక్షులు, జంతువులకు భూకంపాలతోపాటు ఇతర ప్రకృతి విపత్తులను ముందే పసిగట్టగలిగే శక్తి ఉందని నెటిజన్లు చెబుతున్నారు. అందుకే ఆ పక్షులు ఇలా వింతగా ప్రవర్తించాయనే అభిప్రాయాన్ని వ్యక్తం చేశారు.

సోషల్ మీడియాలో వైరల్ అయిన ఈ వీడియోకు టర్కీ భూంకంపానికి సంబంధం లేదని ఫ్యాక్ట్ చెక్ (Fact Check) వెబ్‌‌సైట్ ఫ్యాక్ట్‌లీ పేర్కొంది. స్క్రీన్ షాట్లను రివర్స్ ఇమేజ్ సెర్చ్ ద్వారా పరిశీలించగా.. అది 2017 నాటి డైలీ మెయిల్ కథనానికి సంబంధించినదని తెలిపింది. హూస్టన్ నగరంలో పక్షులు ఎగురుతున్న వీడియో ఇదని డైలీ మెయిల్ తెలిపింది. పూర్తిగా తెల్లారక ముందే పక్షులు ఇలా అరుస్తుండటంతో ఓ డ్రైవర్ దాన్ని వీడియో తీశాడని తెలిపింది.

హూస్టన్, టెక్సాస్ అనే జియో ట్యాగింగ్‌తో 2017 జనవరిలో ఓ వ్యక్తి ఇన్‌స్టాగ్రామ్‌లో ఈ వీడియోను పోస్టు చేశారని.. కాలిఫోర్నియాకు చెందిన జుకిన్ మీడియా సంస్థ ఈ వీడియోకు లైసెన్స్ కలిగి ఉందని ఆ పోస్టు డిస్క్రిప్షన్లో ఉందని తెలిపింది. గతంలో ఇదే వీడియోను రష్యా-ఉక్రెయిన్ ఘర్షణలకు లింక్ చేస్తూ ప్రచారం చేశారు. అప్పట్లో అసోసియేటెడ్ ప్రెస్ సైతం ఈ వీడియో హూస్టన్‌కు సంబంధించిందని స్పష్టం చేసినట్లు ఫ్యాక్ట్‌లీ వెల్లడించింది. కాబట్టి ఈ పాత వీడియోకు టర్కీ భూకంపానికి సంబంధం లేదని తెలిపింది. గతంలోనూ అనేక వీడియోలు, ఫొటోలు ఇలాగే సోషల్ మీడియాలో వైరల్ అయ్యాయి. తర్వాత ఫ్యాక్ట్ చెక్‌లో అసలు నిజాలు వెలుగులోకి వచ్చాయి.