ఆ ఛార్జ్‌షీట్ లో విస్తుపోయే నిజాలు

ఢిల్లీ హత్య కేసు ఛార్జ్ షీట్ లో చదివేకొద్ది ఆశ్చర్యానికి గురిచేసే అంశాలు వెలుగులోకి వస్తున్నాయి. ఈ క్రమంలో దేశవ్యాప్తంగా సంచలనం సృష్టించిన శ్రద్ధా వాకర్ హత్య కేసులో మరో భయంకర విషయం వెలుగులోకి వచ్చింది. ఆమె ఎముకలను మిక్సీలో వేసి నిందితుడు అఫ్తాబ్ పూనావాలా పొడిచేసినట్టు పోలీసులు ఛార్జ్‌షీట్‌లో పేర్కొన్నారు. హత్య జరిగిన మూడు నెలల తర్వాత ఆమె తలను అటవీ ప్రాంతంలో పడేసినట్టు తెలిపారు. శ్రద్ధా వాకర్ హత్య కేసులో మొత్తం 6,600 పేజీల ఛార్జ్‌షీట్‌ను దాఖలు చేసిన పోలీసులు.. బాధితురాలి మొబైల్ ఫోన్‌ను ముంబయి సముద్ర తీరంలో పడేసినట్టు వివరించారు.

మూడేళ్లుగా సహజీవనంలో ఉన్న శ్రద్ధా వాకర్, అఫ్తాబ్ పూనావాలా.. ఆమె హత్య జరగడానికి కొద్ది రోజుల ముందే ముంబయి నుంచి ఢిల్లీ వెళ్లారు. అక్కడకు వెళ్లిన కొంతకాలం తర్వాత మే 18 న శ్రద్ధా వాకర్‌ను అఫ్తాబ్ హత్య చేశాడు. ఇరువురి మధ్య స్పర్ధలు రావడం, ఇంటి ఖర్చులపై వాగ్వాదం జరిగింది. ఇరువురి మధ్య ప్రేమ తగ్గడంతో ఎక్కడ తనను శ్రద్ధా వదిలిపెట్టి వెళ్లిపోతుందోనని భావించాడు. దీంతో ఆమెను గొంతు కోసి చంపి.. మృతదేహాన్ని 35 ముక్కలుగా చేసి, ఫ్రిజ్‌లో ఉంచాడు. తర్వాతి ఒక్కొక్కటిగా పారవేసినట్లు పోలీసుల విచారణలో వెల్లడించాడు.

అతడు చెప్పి వివరాలు ఆధారంగా ఇప్పటి వరకూ 20 వరకూ శరీర భాగాలను పోలీసులు స్వాధీనం చేసుకున్నారు. పాలిగ్రాఫీ, నార్కో-ఎనాలిసిస్ పరీక్షల్లో తానే హత్య చేసినట్టు అఫ్తాబ్ అంగీకరించాడు. అంతేకాదు, తనను వదిలేసి వెళ్లిపోతానని శ్రద్ధా బెదిరించడంతోనే ఆవేశంలో చంపేసినట్టు తెలిపాడు. కాగా, నిందితుడు అఫ్తాబ్ పూనావాలాపై నేరపూరిత కుట్ర అభియోగం మోపలేదని పోలీసులు ప్రాథమిక ఛార్జ్‌షీట్‌లో పేర్కొన్నారు. ఇద్దరి మధ్య ప్రేమ తగ్గిపోయి.. అతడ్ని వదిలించుకోవాలని శ్రద్ధా భావించడంతో చంపినట్టు పోలీసు వర్గాలు తెలిపాయి.

హతురాలు శ్రద్ధా, అఫ్తాబ్‌లకు డేటింగ్ యాప్‌లో పరిచయం ఏర్పడిన రోజు మే 17 కాగా... గతేడాది అదే రోజు ఇరువురి మధ్య గొడవ జరిగింది. కానీ, దీనికి ముందు రోజు రాత్రి డేటింగ్ యాప్‌లో పరిచయమైన మరో స్నేహితుడిని శ్రద్ధా కలవడమే హత్యకు కారణమని పోలీసులు వివరించారు. మరోవైపు, పోలీసులు దాఖలు చేసిన చార్జిషీట్‌ను సాకేత్ కోర్టు మంగళవారం నాడు విచారణకు స్వీకరించింది. ఛార్జిషీటు ప్రతిని నిందితుడికి అందజేశారు. డాక్యుమెంట్ల పరిశీలన కోసం తదుపరి విచారణను ఫిబ్రవరి 21కి మెట్రోపాలిటన్ మెజిస్ట్రేట్ అవిరల్ శుక్లా వాయిదా వేశారు. కోర్టు హాలులోకి ప్రత్యక్షంగా అఫ్తాబ్‌ను పోలీసులు హాజరుపరచి, రహస్యంగా విచారణ జరిపారు. మీడియాను లోపలకు అనుమతించ లేదు. ఈ సమయంలో కట్టుదిట్టమైన భద్రత ఏర్పాటుచేశారు.