ఎస్సీ సబ్‌ప్లాన్‌ అంటే లోకేష్‌కు తెలుసా: మేరుగు నాగార్జున

అసలు ఎస్సీ సబ్‌ప్లాన్‌ అంటే లోకేష్‌కు తెలుసా అని రాష్ట్ర సాంఘిక సంక్షేమ శాఖ మంత్రి మేరుగు నాగార్జున  ప్రశ్నించారు. తెలుగు దేశం పార్టీ జాతీయ ప్రధాన కార్యదర్శి నారా లోకేష్‌కు దళితుల గురించి మాట్లాడే అర్హత లేదని ఆయన దుయ్యబట్టారు. పాదయాత్రలో జనం లేక లోకేష్ నోటికొచ్చినట్లు మాట్లాడుతున్నాడని ధ్వజమెత్తారు. దళితులకు సంబంధించిన నిధులను పక్కదారి పట్టించి.. వారిని మోసం చేసిన ఘనత తెలుగు దేశం పార్టీ అధినేత చంద్రబాబునాయుడుదేనని మండిపడ్డారు.

చంద్రబాబునాయుడు ముఖ్యమంత్రిగా ఉన్నప్పుడు ఎస్సీ సబ్‌ప్లాన్‌ను నాశనం చేశారని.. దివంగత వైఎస్‌ రాజశేఖరరెడ్డి సీఎంగా ఉన్నప్పుడు సబ్‌ప్లాన్‌ను అమలు చేశారని మంత్రి మేరుగు నాగార్జున గుర్తు చేశారు. దళితుల అభ్యున్నతికి వైసీపీ ప్రభుత్వం కృషి చేస్తోందన్నారు. రాష్ట్రంలోని దళితులందరికీ ఎస్సీ కాంపోనెంట్ ప్లాన్ కింద నిధులు ఖర్చు చేస్తున్నామని తెలిపారు. ఒక్క రూపాయి అవినీతి లేకుండా సంక్షేమ పథకాలు అందిస్తున్నామని పేర్కొన్నారు.

దళితులపై దాడి చేస్తే లోకేష్‌పైన ఏంటి.. ఆయన తండ్రి చంద్రబాబుపై కూడా కేసులు పెడతామని మంత్రి మేరుగు నాగార్జున వ్యాఖ్యానించారు. ఎస్సీ సబ్ ప్లాన్ నిధులను పొలంబడి, రైతు క్షేత్రాలు, నేప్ కీన్లు, పెళ్లి కనుక, ఎన్టీఆర్ సుజల స్రవంతికి ఖర్చు పెట్టామని చంద్రబాబు చూపించారన్నారు. తమ ప్రభుత్వంలో ఎస్సీలు, ఎస్టీలు, పేదలకు ఇంగ్లిష్ మీడియం విద్య, ఇళ్ల పట్టాలు రాకుండా అడ్డుకుంది చంద్రబాబు, లోకేష్ కాదా అని నిలదీశారు. చంద్రబాబు హయాంలో దళితుల మీద జరిగిన దాడులపై చర్చించడానికి తాను సిద్ధమని లోకేష్‌కు మంత్రి మేరుగు నాగార్జున సవాల్‌ విసిరారు.