ఉరవకొండ అభివృద్ధే లక్ష్యం

ఉరవకొండ మేజర్ పంచాయతీని అభివృద్ధి పథంలో తీసుకెళ్లడమే లక్ష్యంగా ముందుకుపోతున్నామని ఉరవకొండ మాజీ ఎమ్మెల్యే వై. విశ్వేశ్వరరెడ్డి అన్నారు. రూ. 10లక్షల పంచాయతీ నిధులతో ఉరవకొండ పట్టణంలో అధునాతన హైమాక్స్ లైట్లు ఏర్పాటుకు సర్పంచ్ లలితమ్మ, ఉప సర్పంచ్ వన్నప్ప, జడ్పీటీసీ పార్వతమ్మ, వైస్ ఎంపీపీ నరసింహులు, స్థానిక ప్రజాప్రతినిధులతో కలిసి మాజీ ఎమ్మెల్యే విశ్వేశ్వరరెడ్డి గురువారం శంకుస్థాపన చేశారు. ఈ సందర్భంగా ఆయన మాట్లాడుతూ మేజర్ పంచాయతీ సుందరికరణలో భాగంగా వైస్సార్ సర్కిల్, బైపాస్, కనేకల్ క్రాస్ తదితర ప్రాంతాల్లో హై మాక్స్ లైట్లు ఏర్పాటు చేస్తున్నట్లు తెలిపారు. ఇప్పటికే అభివృద్ది పనుల్లో భాగంగా ఐదు కోట్ల రూపాయలతో సీసీ రోడ్ల నిర్మాణ పనులు వేగవంతంగా సాగుతున్నాయని చెప్పారు. త్రాగునీటి సమస్య పరిష్కారానికి ఉదిరిపికొండ నుంచి త్వరలో పైపులైను కూడా ఏర్పాటు చేస్తున్నామన్నారు. అదేవిధంగా జలజీవన్ మిషన్ ద్వారా ఇంటింటికి ఉచిత కుళాయిలను కూడా ఏర్పాటు చేస్తున్నామన్నారు. ప్రభుత్వం ద్వారా మరిన్ని నిధులు మంజూరు చేయించి మేజర్ పంచాయతీని అభివృద్ధి పథంలో తీసుకెళ్తామని ఆయన హామీ ఇచ్చారు. ఈ కార్యక్రమంలో మార్కెట్ కమిటీ చైర్మన్ సుశీలమ్మ, పార్టీ పట్టణ అధ్యక్షుడు ఓబులేష్, కురుబ, ఎంబిసి కార్పొరేషన్ల డైరెక్టర్లు గోవిందు, జోగి వెంకటేష్, జిల్లా వక్ఫ్ బోర్డు సభ్యుడు మీరం బాషా, వార్డు సభ్యులు, ఎంపిటిసిలు, జిల్లా అధికార ప్రతినిధి వీరన్న, ఎస్సి సెల్ నాయకులు బసవరాజు, మాజీ ఎంపీపీ ఏసీ ఎర్రిస్వామి, పంచాయతీ ఈఓ గౌస్, ఇతర నాయకులు, కార్యకర్తలు తదితరులు పాల్గొన్నారు.