మహిళలకు రక్షణ కల్పించాల్సిన బాధ్యత ప్రభుత్వానిదే,,, వంగలపూడి అనిత

మహిళలకు రక్షణ కల్పించాల్సిన బాధ్యత ప్రభుత్వానిదేనని తెలుగు మహిళ అధ్యక్షురాలు వంగలపూడి అనిత పేర్కొన్నారు. రాష్ట్రంలో మహిళలు, చిన్నారులు కామాంధుల కర్కశత్వానికి బలవుతుంటే.. మహిళా మంత్రులు, మహిళా కమిషన్ ఛైర్ పర్సన్ మాన ప్రాణాలకు ఖరీదుకట్టి చేతులు దులుపుకుంటున్నారన్నారు. మహిళల మాన ప్రాణాలు గాల్లో కలుస్తున్నా పట్టించుకోవడంలేదని.. సీఎం ఇంటికి కూతవేటు దూరంలో, డీజీపీ ఆఫీస్ సమీపంలో గంజాయి మత్తులో ఉన్న కిరాతకుడు దళిత అంధ బాలికను దారుణంగా చంపేయడం మొత్తం రాష్ట్రాన్నే కలిచి వేసిందన్నారు. ఇలాంటి దారుణాలపై టీడీపీ మహిళా విభాగం, ఏపీలోని మహిళలు నెత్తీ నోరు కొట్టుకుంటున్నా.. ఎవరిలో చలనం రావడంలేదన్నారు. దిశా చట్టం పేరుతో మహిళల్ని ఉద్ధరిస్తున్నామంటున్నారని.. గంజాయి, బ్లేడ్ బ్యాచ్‌లు తిరుగుతున్నా వారిని ఎందుకు కట్టడిచేయలేకపోతున్నారని ప్రశ్నించారు.

అనూష, తేజస్విని, శ్రీలక్షి, రమ్య వంటి యువతులు ఇప్పటికే దుర్మార్గుల దురాగతాలకు బలయ్యారన్నారు. తాజాగా వారిలానే దళిత బాలిక బలైందన్నారు. తాము ప్రభుత్వంపై, ముఖ్యమంత్రిపై బురదజల్లాలని మాట్లాడటం లేదని.. 2019-20మధ్యన పెద్దఎత్తున ఏపీలో మాదకద్రవ్యాలు స్వాధీనం చేసుకున్నట్లు కేంద్రం పార్లమెంట్ లో చెప్పిందన్నారు. స్మగ్లింగ్ ఇన్ ఇండియా నివేదిక కూడా ఏపీలో మాదక ద్రవ్యాలు, గంజాయి వ్యాప్తి ఎక్కువగా ఉందని చెప్పిందన్నారు. పొరుగు రాష్ట్ర పోలీస్ కమిషనర్ కూడా ఏపీ నుంచే తమ రాష్ట్రంలోకి గంజాయి సరఫరా అవుతోందని చెప్పారని.. 2021-22లో దేశవ్యాప్తంగా 7.50లక్షల కిలోల గంజాయి పట్టుబడితే, ఏపీలో 3లక్షల కిలోలు పట్టుబడిందన్నారు.

టీడీపీ హయాంలో ఈజ్ ఆఫ్ డూయింగ్ బిజినెస్‌లో ఏపీ తొలిస్థానంలో ఉంటే.. జగన్ జమానాలో గంజాయి, మాదకద్రవ్యాల వాడకం, అమ్మకంలో రాష్ట్రం ముందంజలో ఉందని ధ్వజమెత్తారు. ఉద్యోగ, ఉపాధి అవకాశాలు లేక యువత మాదక ద్రవ్యాల బారినపడుతున్నారని.. వారికి న్యాయం చేయండి అంటే పరిశ్రమల శాఖమంత్రి సిగ్గు లేకుండా కోడి, గుడ్డు, పెట్ట అంటూ పనికిమాలిన కబుర్లు చెబుతున్నారని మండిపడ్డారు. మద్యపాన నిషేధం హామీని విస్మరించిన జగన్.. మద్యం అమ్మకాలతో వచ్చే ఆదాయంతో ఢిల్లీలో లిక్కర్ స్కామ్‌కు పాల్పడ్డారని ఆరోపించారు. డీజీపీ ఆఫీసుని తెలుగుమహిళలు ఎక్కడ ముట్టడిస్తారోనన్న భయంతో, తెల్లారేసరికి పోలీసులంతా రోడ్డెక్కారన్నారు. టీడీపీ మహిళా విభాగం నేతల ఇళ్ల ముందు పోలీసులు ఎందుకు క్యూకట్టారని ప్రశ్నించారు. తెలుగుమహిళలకు భయపడి, చుట్టూ పోలీస్ పహారా పెట్టుకున్నందుకు డీజీపీ నిజంగా సిగ్గుపడాలన్నారు.

రాష్ట్రంలో మహిళలపై జరుగుతున్నదారుణాలను అరికట్టాలని కోరుతూ, డీజీపీకి వినతిపత్రం ఇవ్వడానికి గతంలో అనేకసార్లు అనుమతి కోరినా డీజీపీ అపాయింట్ మెంట్ ఇవ్వలేదని ఆరోపించారు. రెండుసార్లు తమ విజ్ఞప్తిని డీజీపీకి మెయిల్ చేసినా స్పందించలేదని విమర్శించారు. రాష్ట్ర ప్రజల్ని రక్షించాల్సిన బాధ్యత లేదా.. బాలికలు, యువతులు కామాంధుల కర్కశత్వానికి బలైనప్పుడు బేరసారాలు ఆడటానికి మాత్రమే వాసిరెడ్డి పద్మ బయటకు వస్తారని ధ్వజమెత్తారు. బాలిక తల్లిదండ్రుల్ని కలిసి ప్రభుత్వం నుంచి రూ.10 లక్షలు వస్తాయి.. జరిగిన దాన్ని మర్చిపోండి అన్నట్టు మాట్లాడారని ఆరోపించారు. దిశా యాప్‌ను ఇతర రాష్ట్ర మహిళలు కూడా తమ ఫోన్లలో డౌన్లోడ్ చేసుకుంటున్నారని ఆరోగ్యశాఖామంత్రి చెప్పడం నిజంగా ఆమెలోని అజ్ఞానానికి సంకేతమన్నారు.