పార్టీ నేతల పనితీరుపై జగన్ సమీక్ష,,,సమావేశానికి హాజరుకాని మాజీమంత్రి సుచరిత

ఎన్నికలపై వైసీపీ నజర్ పెట్టింది. రాష్ట్ర వ్యాప్తంగా ఎమ్మెల్యేలు, నియోజకవర్గ సమన్వయకర్తల పనితీరును.. వైఎస్ఆర్ కాంగ్రెస్ పార్టీ అధినేత వైఎస్ జగన్ మోహన్ రెడ్డి సమీక్షించారు. సోమవారం తాడేపల్లి క్యాంపు ఆఫీస్‌లో సమీక్ష నిర్వహించి దిశానిర్దేశం చేశారు. వెనుకబడిన వారిని రెడ్‌మార్క్‌లో పెట్టారు. ఉమ్మడి గుంటూరు జిల్లాకు చెందిన ముగ్గురు మంత్రులు గడప గడపకు మన ప్రభుత్వం కార్యక్రమంలో ముందంజలో ఉన్నారు. తాడికొండ, పర్చూరు నియోజకవర్గాలకు ఇటీవలే వైసీపీ సమన్వయకర్తలను నియమించినందున.. వారు కూడా వెనుకబడిన వారి జాబితాలో ఉన్నారు.

ఇటు రాజధాని ప్రాంతానికి చెందిన ఎమ్మెల్యే కూడా వెనుకబడినట్లు నివేదికలో పొందుపరిచారు. నెలలో సగటున 16 రోజులుపాటు గడప గడపకు మన ప్రభుత్వం కార్యక్రమంలో పాల్గొనాలని వై.ఎస్.జగన్మోహన్ రెడ్డి ఆదేశించారు అందుకు అనుగుణంగా పనితీరును సమీక్షించారు. ఇదే సమయంలో.. ప్రత్తిపాడు ఎమ్మెల్యే మేకతోటి సుచరిత హాజరు కాలేదా? అని జగన్ ఆరా తీసినట్లు తెలిసింది. ఆరోగ్య సమస్యలతో సమావేశానికి హాజరు కాలేదని అక్కడున్న నేతలు చెప్పినట్టు సమాచారం. గతంలో జరిగిన సమీక్ష సమావేశాలకు కూడా సుచరిత హాజరుకాకపోవడం చర్చనీయాంశంగా మారింది.

అయితే.. ఇటీవల ముఖ్యమంత్రి జగన్‌ను మేకతోటి సుచరిత కలిశారు. ఈ సందర్భంగా కీలక వ్యాఖ్యలు చేశారు. తాను పార్టీ మారుతున్నానని తప్పుడు ప్రచారం చేస్తున్నారని ఆగ్రహం వ్యక్తం చేశారు. చంద్రబాబుపైనా విమర్శలు గుప్పించారు. చంద్రబాబు దళిత ద్రోహి అంటూ ఫైర్ అయ్యారు. తాను రాజకీయాల్లో ఉన్నంత వరకు జగన్‌తోనే నడుస్తానని స్పష్టం చేశారు. పార్టీ మారే ఉద్దేశం తనకు లేదని తేల్చి చెప్పారు. మళ్లీ ఆ తర్వాత సుచరిత ఎక్కువ బయట కనిపించలేదు. సుచరిత ఈ వ్యాఖ్యలు చేసి కూడా నెల రోజులు కావడం లేదు. నెల వ్యవధిలోనే సుచరిత మళ్లీ సమావేశానికి దూరంగా ఉండటంతో రకరకాల ప్రచారం జరుగుతోంది.

అటు ఈ సమీక్ష సమావేశానికి తాడికొండ ఎమ్మెల్యే ఉండవల్లి శ్రీదేవి హాజరయ్యారు. కానీ.. జగన్ సమన్వయకర్త సురేష్‌ పేరును ప్రస్తావించారని తెలిసింది. అయితే.. తాడికొండ వైసీపీలో ఆధిపత్య పోరు మరింతగా ముదిరిందని కొన్నాళ్లుగా ప్రచారం జరుగుతోంది. దీంతో ఉండవల్లి శ్రీదేవి పేరును ప్రస్తావించకపోవడం హాట్ టాపిక్‌గా మారింది. గతంలో డొక్కా మాణిక్య వర ప్రసాద్ వర్సెస్ ఉండవల్లి శ్రీదేవి వార్ నడిచింది. దీనిపై పార్టీ పెద్దలు జోక్యం చేసుకునే వరకు వెళ్లింది. ఈ నేపథ్యంలో.. ఆమె అసంతృప్తిగా ఉన్నారనే ప్రచారం జరిగింది.