కప్పపై ఆ తండ్రి కోపమే..పిల్లలకు శాపంగా మారింది.

కప్పలపై ఓ తండ్రి కోపం వారి కుమార్తె ప్రాణం తీసింది. కప్ప కూర తిని బాలిక మృతి చెందింది. మరో చిన్నారి ఆస్పత్రిలో ప్రాణాలతో పోరాడుతోంది. కప్పపై తండ్రికి వచ్చిన కోపం పిల్లల పాలిట శాపంగా మారింది. ఈ విషాద ఘటన ఒడిశాలోని కియోంజర్ జిల్లాలో గిరిజన గ్రామంలో చోటు చేసుకుంది. కియోంజర్ జిల్లాలోని జోడా బ్లాక్ ప్రాంతంలోని గురుడా గ్రామంలో మునా ముండా (40) తన భార్య, పిల్లలతో కలిసి నివాసం ఉంటున్నాడు. అతడి ఇంట్లోకి తరచూ కప్పలు వస్తుండటం అసహనానికి గురిచేసింది. శుక్రవారం (ఫిబ్రవరి 10) సాయంత్రం ఇలాగే ఇంట్లోకి వచ్చిన కప్పను పట్టుకొని కొట్టి చంపాడు. ఆ తర్వాత దాన్ని కూర వండాడు. రాత్రి భోజనంతో కలిపి తినమని పిల్లలకు చెప్పాడు. అభం శుభం తెలియని పిల్లలు తండ్రి మాట ప్రకారం.. కప్ప కూర తిని తీవ్ర అస్వస్థతకు గురయ్యారు.

కప్ప మాంసం తినడటంతో విష ప్రభావానికి గురై మునా పెద్ద కుమార్తె సుమిత్రా ముండా (6) వాంతులు చేసుకొని అస్వస్థతకు గురైంది. కాసేపటికే నాలుగేళ్ల ఆమె సోదరి ముని కూడా అస్వస్థతకు గురైంది. పిల్లలిద్దరినీ శుక్రవారం అర్ధరాత్రి కియోంజర్ జిల్లా ఆసుపత్రిలో చేర్పించారు. అక్కడ చికిత్స పొందుతూ సుమిత్రా ప్రాణాలు విడిచింది. ఆస్పత్రిలో చికిత్స పొందుతున్న ఆమె చెల్లెలి పరిస్థితి విషమంగా ఉంది.

ఆ పిల్లల తండ్రి మునా మాత్రం కప్ప విష ప్రభావం నుంచి తప్పించుకున్నాడు. ఈ ఘటన గురించి తెలుసుకున్న పోలీసులు గురుడా గ్రామం చేరుకున్నారు. పోలీసులు అరెస్టు చేస్తారనే భయంతో మునా ముండా పారిపోయాడు. స్థానికులు, ప్రత్యక్ష సాక్షులను విచారించి పోలీసులు వివరాలు సేకరించారు. మునా ఇంట్లోకి ఒక కప్ప వచ్చిందని, అది అతడికి కోపం తెప్పించిందని గ్రామస్థులు చెప్పారు. దాన్ని చంపి, కుటుంబం రాత్రి భోజనానికి వండిందని తెలిపారు. అర్ధరాత్రి తర్వాత పిల్లలు వాంతులు చేసుకొని అపస్మారక స్థితికి చేరుకున్నారని చెప్పారు. అనుమానాస్పద మృతిగా కేసు నమోదు చేసుకొని పోలీసులు దర్యాప్తు చేస్తున్నారు. సుమిత్ర మృతదేహానికి పోస్టుమార్టం నిర్వహించి, బంధువులకు అప్పగించారు.

వేటాడే జంతువుల నుంచి తమను తాము రక్షించుకోవడానికి కొన్ని రకాల కప్పలు పరోటిడ్ గ్రంథిలో విష పదార్థాన్ని నిల్వ చేసుకుంటాయని, వాటిని తింటే విషం ప్రభావం చూపుతుందని బుర్లాలోని వీఎస్‌ఎస్ ఇన్‌స్టిట్యూట్ ఆఫ్ మెడికల్ సైన్సెస్ అండ్ రీసెర్చ్‌లో కమ్యూనిటీ మెడిసిన్ అసిస్టెంట్ ప్రొఫెసర్ సంజీబ్ మిశ్రా తెలిపారు. కొన్ని జాతులకు చెందిన కప్పలు చర్మం భాగంలోనూ విషాన్ని కలిగి ఉంటాయని ఆయన వివరించారు.