అది పెద్ద జోక్.. నెడుమారన్ వ్యాఖ్యలపై శ్రీలంక ప్రభుత్వం

ఎల్‌టీటీఈ చీఫ్‌ ప్రభాకరన్‌ బతికే ఉన్నారని, ఆయన త్వరలోనే బయటకు వస్తారని తమిళ జాతీయోద్యమ నేత, కాంగ్రెస్ పార్టీ మాజీ ఎంపీ పాళ నెడుమారన్‌ సంచలన వ్యాఖ్యలపై శ్రీలంక ప్రభుత్వం స్పందిస్తూ ఇదో పెద్ద జోక్ అని చెప్పింది. తమిళ ఈలం ప్రజల కోసం ఎల్‌టీటీఈ చీఫ్‌ ప్రభాకరన్‌ త్వరలోనే తన ప్రణాళికలను వెల్లడిస్తారని పాళ నెడుమారన్‌ వ్యాఖ్యానించారు. అయితే, తమ సైన్యం దాడిలో ప్రభాకరన్ హతమైనట్టు 2009లో శ్రీలంక ప్రకటించింది. తాజాగా దీనిపై శ్రీలంక ప్రభుత్వం స్పందిస్తూ.. ఇది పెద్ద జోక్ అని నెడుమారన్ వ్యాఖ్యలను ఖండించింది.

శ్రీలంక రక్షణ మంత్రిత్వ శాఖ అధికార ప్రతినిధి నళిన్ హేరాత్ మాట్లాడుతూ.. ‘‘2009 మే 19న శ్రీలంక సైన్యం చేతిలో ప్రభాకరన్ చనిపోయినట్టు ధ్రువీకరించారు.. ఆయన డీఎన్ఏ నమూనాలు కూడా సరిపోలాయి’’ అని పేర్కొన్నారు. శ్రీలంకలోని తమిళుల కోసం ప్రత్యేక దేశాన్ని ఏర్పాటు చేయాలనే ఉద్దేశంతో వేలుపిళ్లై ప్రభాకరన్‌ లిబరేషన్‌ టైగర్స్‌ ఆఫ్‌ తమిళ్ ఈలం (ఎల్‌టీటీఈ) అనే సంస్థను ఏర్పాటుచేశాడు. దీని ద్వారా 1985 నుంచి శ్రీలంక సైన్యంతో పోరాటం సాగించారు. దాదాపు మూడు దశాబ్దాల పాటు జరిగిన ప్రజా యుద్ధం 2009లో ప్రభాకరన్ మరణంతో ముగిసింది.

ఈ పోరాటంలో భాగంగా ఈ సంస్థ శ్రీలంకలో పోలీసులు, మిలిటరీ దళాలపై అనేక దాడులు చేసింది. భారత మాజీ ప్రధాని రాజీవ్‌ గాంధీ హత్యలోనూ వీరి హస్తం ఉంది. పెద్దపులిగా పిలిచే ప్రభాకరన్.. శ్రీలంక సైన్యాలను ముప్పతిప్పలు పెట్టారు. 26 ఏళ్లపాటు జరిగిన యుద్ధంలో లక్ష మంది ప్రాణాలు కోల్పోగా.. శ్రీలంక పౌరులు ముఖ్యంగా మైనార్టీలైన మిలియన్ల మంది తమిళులు శరణార్ధులుగా మారారు.

జాఫ్నా దీవిలోని వెల్వెట్టిథురైలో 1954 నవంబర్‌ 26న ప్రభాకరన్‌ జన్మించాడు.. తండ్రి ఓ ప్రభుత్వాధికారి కాగా.. నలుగురు సంతానంలో అందరికన్నా చిన్నవాడు. విద్య, ఉపాధిలో అక్కడ తమిళుల పట్ల శ్రీలంక ప్రభుత్వం చూపే వివక్షకు కలత చెందిన ప్రభాకరన్‌.. చదువును వదిలిపెట్టి రాజకీయాలకు మొగ్గుచూపాడు. మార్షల్‌ ఆర్ట్స్‌‌లో శిక్షణ తీసుకుని.. నెపోలియన్‌, అలెగ్జాండర్‌లంటే ఎంతో ఇష్టమని.. చేగువేరా, సుభాష్‌ చంద్రబోస్‌, భగత్‌సింగ్‌లు స్ఫూర్తి అని చెప్పుకునేవాడు.